ସିଡନୀ,୧୪।୧୧: ଡିସେମ୍ବର ୧୭ରୁ ଭାରତ-ଅଷ୍ଟ୍ରେଲିଆ ମଧ୍ୟରେ ବର୍ଡର-ଗାଭାସ୍କର ସିରିଜ୍ ଖେଳାଯିବ। ୪ ଟେଷ୍ଟ ମ୍ୟାଚ୍ ବିଶିଷ୍ଟ ସିରିଜ୍ ଖେଳିବା ପାଇଁ ଭାରତୀୟ ଟିମ୍ ଅଷ୍ଟ୍ରେଲିଆରେ ପହଞ୍ଚି ସାରିଛି। ତେବେ ୨୦୧୮-୧୯ ସିରିଜରେ ଅଷ୍ଟ୍ରେଲିଆକୁ ୨-୧ରେ ହରାଇ ଇତିହାସ ରଚିଥିଲା ଭାରତ। ଏହି ଅବସରରେ ଦୁଇ ଅଧିନାୟକ ଟିମ ପୈନ ଏବଂ ବିରାଟ କୋହଲିଙ୍କ ମଧ୍ୟରେ ତଗଡ଼ା ବିବାଦ ଦେଖିବାକୁ ମିଳିଥିଲା। ନିକଟରେ ପୈନ୍ ଏକ ସାକ୍ଷାତକାରରେ କୋହଲିଙ୍କ ସହ ତାଙ୍କର ସମ୍ପର୍କକୁ ନେଇ ପ୍ରତିକ୍ରିୟା ରଖିଛନ୍ତି।
ପୈନ୍ କହିଛନ୍ତି, ମୋତେ ବିରାଟଙ୍କ ବିଷୟରେ ଅନେକ ପ୍ରଶ୍ନ କରାଯାଏ। ସେ ମୋ ପାଇଁ ଅନ୍ୟ ଖେଳାଳିଙ୍କ ଭଳି। ମୋତେ ସେ ବେଶି ହଇରାଣ କରନ୍ତି ନାହିଁ। ହେଲେ ଯଦି ସତ କହିବି ତେବେ ତାଙ୍କ ସହ ମୋ ସମ୍ପର୍କ ବହୁତ ମଜଭୂତ ନୁହେଁ। ଟସ୍ ସମୟରେ ତାଙ୍କ ସହ ଦେଖାହୁଏ। ତାଙ୍କ ବିପକ୍ଷରେ ମୁଁ ଖେଳେ। ବିରାଟଙ୍କୁ ଅଷ୍ଟ୍ରେଲିୟ ଖେଳାଳି ଘୃଣା କରିବାକୁ ପସନ୍ଦ କରନ୍ତି, ହେଲେ କ୍ରିକେଟର ପ୍ରଶଂସକ ଭାବେ ତାଙ୍କ ଖେଳ ସମସ୍ତେ ପସନ୍ଦ କରନ୍ତି। ଗୋଟିଏ ପଟେ ଆମେ ତାଙ୍କ ଖେଳ ପସନ୍ଦ କରୁଥିବା ବେଳେ ଅନ୍ୟପକ୍ଷେ ସେ ବେଶି ରନ୍ କରନ୍ତୁ ନାହିଁ ବୋଲି ଚାହୁଁ। ଅନେକ ସମୟରେ ତାଙ୍କ ମୋ ଭିତରେ ତୁତୁମେମେ ହୋଇଛି।
ଏହାପଛରେ ଆମ ଅଧିନାୟକତ୍ୱ ନୁହେଁ ବରଂ ଅନ୍ୟ କାରଣ ରହିଛି। ଯେତେବେଳେ କେହି ଭଲ ଖେଳେ ଆମକୁ ଚିନ୍ତା ଲାଗେ। ଚଳିତ ବର୍ଷ ଅଷ୍ଟ୍ରେଲିଆ ଟିମ୍ରେ ସ୍ଟିଭ୍ ସ୍ମିଥ୍ ଏବଂ ଡେଭିଡ ଓ୍ବାର୍ନର ସାମିଲ ଅଛନ୍ତି। ଏଣୁ ସିରିଜ୍ଟି ରୋମାଞ୍ଚକର ହେବ। ଏହାକୁ ପ୍ରଶଂସକମାନେ ଅପେକ୍ଷା କରି ରହିଛନ୍ତି।
