ନୁୟର୍କ,୨୮।୭: ସଂଯୁକ୍ତ ରାଷ୍ଟ୍ରରେ ଭାରତର ସ୍ଥାୟୀ ପ୍ରତିନିଧୀ ରୁଚିରା କମ୍ବୋଜ ସଂଯୁକ୍ତ ରାଷ୍ଟ୍ରର ୬୨ତମ ସାମାଜିକ ବିକାଶ ଆୟୋଗର ଚେୟାରମ୍ୟାନ ଭାବରେ ଦାୟିତ୍ୱ ଗ୍ରହଣ କରିଛନ୍ତି। ଗତ ପ୍ରାୟ ୫୦ବର୍ଷ ମଧ୍ୟରେ ଏହା ପ୍ରଥମ ଥର ପାଇଁ ଭାରତ ଏହାର ଅଧ୍ୟକ୍ଷତା ହାସଲ କରିଛି। ଏହାପୂର୍ବରୁ ୧୯୭୫ରେ ଭାରତ ଏହି ଆୟୋଗର ଅଧ୍ୟକ୍ଷତା କରିଥିଲା।
ଗୁରୁବାର ଅଧ୍ୟକ୍ଷତା ଗ୍ରହଣ କରିବା ପରେ କମ୍ବୋଜ ଟୁଇଟ୍ କରି ଲେଖିଛନ୍ତି ଯେ ସାମାଜିକ ବିକାଶ ଆୟୋଗର ଅଧ୍ୟକ୍ଷ ହେବା ପାଇଁ ଭାରତ ଗର୍ବିତ ଅନୁଭବ କରୁଛି। ବିଶ୍ୱ ସମୁଦାୟର କଲ୍ୟାଣ ଏବଂ ସମୃଦ୍ଧତା ପାଇଁ କାର୍ଯ୍ୟ କରି ଭାରତ ଏହାର ମୂଳ ନୀତି ସହିତ ନେତୃତ୍ୱ ନେବାକୁ ପ୍ରତିଶ୍ରୁତିବଦ୍ଧ। ସଂଯୁକ୍ତ ରାଷ୍ଟ୍ରରେ ଭାରତୀୟ ମିଶନ ଏକ ବିବୃତ୍ତିରେ କହିଛି ଯେ, ରୁଚିରା କମ୍ବୋଜ ସାମାଜିକ ବିକାଶ ପ୍ରସଙ୍ଗରେ ଅନ୍ତର୍ଜାତୀୟ ସହଯୋଗକୁ ପ୍ରୋତ୍ସାହିତ କରିବେ।
