ନୂଆଦିଲ୍ଲୀ,୨୨।୧୧ : ସଂଯୁକ୍ତ ଆରବ ଏମିରେଟ୍ସ (ୟୁଏଇ) ର ବୈଦେଶିକ ବ୍ୟାପାର ଏବଂ ଅନ୍ତର୍ଜାତୀୟ ସହଯୋଗ ମନ୍ତ୍ରୀ ଶେଖ ଅବଦୁଲ୍ଲା ବିନ ଜାଏଦ ଅଲ ନାହାନ ଦୁଇ ଦିନିଆ ଭାରତ ଗସ୍ତରେ ଅଛନ୍ତି। ତାଙ୍କ ସହ ଏକ ଉଚ୍ଚ ସ୍ତରୀୟ ପ୍ରତିନିଧୀ ଦଳ ମଧ୍ୟ ଭାରତ ଆସିଛନ୍ତି। ତାଙ୍କ ସହିତ ଭାରତୀୟ ପ୍ରତିପକ୍ଷ ଏସ.ଜୟଶଙ୍କର ଏକ ଗୁରୁତ୍ୱପୂର୍ଣ୍ଣ ବୈଠକ ହୋଇଥିଲା।
ହାଇଦ୍ରାବାଦ ହାଉସରେ ହୋଇଥିବା ଏହି ବୈଠକରେ ଉଭୟ ନେତା ଭାରତ ଏବଂ ୟୁଏଇ ମଧ୍ୟରେ ଦ୍ୱିପାକ୍ଷିକ ବାଣିଜ୍ୟ ଉପରେ ଆଲୋଚନା କରିଥିଲେ। ଏଥିରେ ଟଙ୍କା ଏବଂ ଦିରହମରେ ବାଣିଜ୍ୟ ପ୍ରସଙ୍ଗ ଉପରେ ମଧ୍ୟ ଆଲୋଚନା କରାଯାଇଥିଲା। ଏହା ବ୍ୟତୀତ ୟୁଏଇରେ ବାସ କରୁଥିବା ୩.୫ ମିଲିୟନ ଭାରତୀୟ ଭାରତକୁ ଟଙ୍କା ପଠାଇବା ପାଇଁ ୟୁପିଆଇକୁ ଏକ ପେମେଣ୍ଟ ପ୍ଲାଟଫର୍ମ ଭାବରେ ବ୍ୟବହାର ବିଷୟରେ ଆଲୋଚନା ମଧ୍ୟ ହୋଇଥିଲା।
ଏହି ସମୟରେ ଦୁଇ ନେତା ଦ୍ୱିପାକ୍ଷିକ ସମ୍ପର୍କକୁ ଆଗକୁ ନେଇ ଏକ ମିଳିତ ଡକ୍ୟୁମେଣ୍ଟ ମଧ୍ୟ ଆରମ୍ଭ କରିଥିଲେ। ଏହି ମିଳିତ ଡକ୍ୟୁମେଣ୍ଟ ହେଉଛି ନୂତନ କ୍ଷେତ୍ରରେ ଆଗକୁ ବ ଢ଼ାଇବା ପାଇଁ ଏକ ରୋଡ ମ୍ୟାପ । ଏହି କ୍ଷେତ୍ରଗୁଡିକ ମଧ୍ୟରେ ଆଇଆଇଟି ସ୍ଥାପନ, ସବୁଜ ହାଇଡ୍ରୋଜେନ ସହଯୋଗ, ଉତ୍ସର୍ଗୀକୃତ ଖାଦ୍ୟ କୋରିଡର, ସ୍ବାସ୍ଥ୍ୟ ସହଯୋଗ, ଦକ୍ଷତା, ପ୍ରତିରକ୍ଷା ରପ୍ତାନି ଇତ୍ୟାଦି ଅନ୍ତର୍ଭୁକ୍ତ।
ଉଲ୍ଲେଖନୀୟ କଥା ହେଉଛି, ଭାରତ-ୟୁଏଇ ଦ୍ୱିପାକ୍ଷିକ ବାଣିଜ୍ୟ ଚଳିତ ବର୍ଷ ୮୮ ବିଲିୟନ ଡ଼ଲାର ଅତିକ୍ରମ କରିବ। ୟୁଏଇ ବର୍ତ୍ତମାନ ଆମେରିକା ଏବଂ ଚାଇନା ପରେ ଭାରତର ତୃତୀୟ ବୃହତ୍ତମ ବାଣିଜ୍ୟ ଭାଗିଦାରୀ ହୋଇଛି। ଚଳିତ ଆର୍ଥିକ ବର୍ଷ ପାଇଁ ଦ୍ୱିପାକ୍ଷିକ ବାଣିଜ୍ୟର ଆନୁମାନିକ ମୂଲ୍ୟାଙ୍କନ କରାଯାଇଥିବାବେଳେ ଗତ ଆର୍ଥିକ ବର୍ଷରେ ଏହା ୭୩ ବିଲିୟନ ଡ଼ଲାର ଅତିକ୍ରମ କରିଥିଲା।
