ନୂଆଦିଲ୍ଲୀ/ଡାଭୋସ, ୨୩।୫ : ଭାରତରେ ଅଧିକ କରୋନା ମୃତ୍ୟୁହାର ନେଇ ସ୍ବିଜରଲାଣ୍ଡର ଡାଭୋସରେ ଚାଲିଥିବା ବିଶ୍ୱ ଅଥନୈତିକ ଫୋରମରେ କେନ୍ଦ୍ରୀୟ ସ୍ବାସ୍ଥ୍ୟ ମନ୍ତ୍ରଣାଳୟ ବିଶ୍ୱ ସ୍ବାସ୍ଥ୍ୟ ସଂଗଠନର ପ୍ରତିନିଧୀଙ୍କ ସହ ଏନୌପଚାରିକ ଆଲୋଚନା ହେବାର କାର୍ଯ୍ୟକ୍ରମ ରହିଛି। କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମନସୁଖ ମାଣ୍ଡବ୍ୟ ବର୍ତ୍ତମାନ ଜେନେଭାରେ ଅଛନ୍ତି ଏବଂ ତାଙ୍କର କିଛି କ୍ୟାବିନେଟ ସହକର୍ମୀ ବିଶ୍ୱ ଅଥନୈତିକ ଫୋରମରେ ଯୋଗଦେବେ।
ଏହି ସମୟରେ ସ୍ବାସ୍ଥ୍ୟମନ୍ତ୍ରୀ ବିଶ୍ୱ ସ୍ବାସ୍ଥ୍ୟ ସଂଗଠନର ବିବାଦୀୟ ଦାବି ପ୍ରସଙ୍ଗ ଉଠାଇ ପାରନ୍ତି ବୋଲି କୁହାଯାଉଛି। କିଛି ପୂର୍ବରୁ ବିଶ୍ୱ ସ୍ବାସ୍ଥ୍ୟ ସଂଗଠନ ଭାରତରେ କରୋନା କାରଣରୁ ମୃତ୍ୟୁ ସଂଖ୍ୟା ପ୍ରକାଶ କରିଥିଲା, ଯାହା ଭାରତ ସରକାରଙ୍କ ଆକଳନଠାରୁ ସମ୍ପୂର୍ଣ୍ଣ ଭିନ୍ନ ଥିଲା। ଏଥିରେ କୁହାଯାଇଥିଲା ଯେ କରୋନା ଯୋଗୁ ୧ ଜାନୁଆରୀ ୨୦୨୦ ରୁ ୩୧ ଡିସେମ୍ବର ୨୦୨୧ ମଧ୍ୟରେ ଭାରତରେ ୪୭ ଲକ୍ଷ ଜଣଙ୍କ ମୃତ୍ୟୁ ଘଟିଛି। ଭାରତ ସରକାରଙ୍କ ସରକାରୀ ଆକଳନ ଅନୁଯାୟୀ ଏହି ସଂଖ୍ୟା ପ୍ରାୟ ୫ ଲକ୍ଷ ୨୦ ହଜାର ବୋଲି କୁହାଯାଉଛି।
ବିଶ୍ୱ ସ୍ବାସ୍ଥ୍ୟ ସଂଗଠନର ଏହି ପରିସଂଖ୍ୟାନ ପ୍ରକାଶ ପାଇବା ପରେ ଭାରତ ସରକାର ସ୍ପଷ୍ଟ ଭାବରେ କହିଥିଲେ ଯେ କରୋନା ଆକ୍ରାନ୍ତଙ୍କ ଅଧିକ ମୃତ୍ୟୁହାର ଆକଳନ ନେଇ ସହମତ ନୁହନ୍ତି। ଭାରତ ବର୍ତ୍ତମାନ ଏହି ପ୍ରସଙ୍ଗକୁ ବ୍ୟକ୍ତିଗତ ଭାବେ ବିଶ୍ୱ ସ୍ବାସ୍ଥ୍ୟ ସଂଗଠନ ସହିତ ଆଲୋଚନା କରିବ ବୋଲି କୁହାଯାଉଛି। ୫ ମେ’ରେ, ବିଶ୍ୱ ସ୍ବାସ୍ଥ୍ୟ ସଂଗଠନ ଦ୍ୱାରା ଏକ ରିପୋର୍ଟ ପ୍ରକାଶ ପାଇଥିଲା। ଏଥିରେ ଭାରତରେ କରୋନା ଯୋଗୁ ହେତୁ ମୃତ୍ୟୁ ସଂଖ୍ୟା ନେଇ ତଥ୍ୟ ପ୍ରକାଶ ପାଇଥିଲା।
ଏହି ମୃତ୍ୟୁ ସଂଖ୍ୟା ଭାରତ ସରକାରଙ୍କ ରିପୋର୍ଟର ପ୍ରାୟ ୧୦ ଗୁଣାଥିଲା। ଭାରତ ସରକାର, ବିଶ୍ୱସ୍ବାସ୍ଥ୍ୟ ସଂଗଠନର ମୂଲ୍ୟାଙ୍କନକୁ ବିରୋଧ କରି କହଥିଲେ ଯେ, ପ୍ରକ୍ରିୟା, ପଦ୍ଧତି ଏବଂ ପରିଣାମ ଅନେକ କ୍ଷେତ୍ରରେ ତ୍ରୁଟିପୂର୍ଣ୍ଣ ରହିଛି। ବିଶ୍ୱ ସ୍ବାସ୍ଥ୍ୟ ସଂଗଠନ ରିପୋର୍ଟ ପ୍ରକାଶ ପାଇବା ପରେ ନୀତି ଆୟୋଗ ସଦସ୍ୟ ବି.କେ ପାଲ କହିଥିଲେ ଯେ ଭାରତ ଏହି ସଂଖ୍ୟାକୁ ସମ୍ପୂର୍ଣ୍ଣ ରୂପେ ପ୍ରତ୍ୟାଖ୍ୟାନ କରୁଛି। ଏହି ତଥ୍ୟ ସତ୍ୟ ନୁହେଁ ବୋଲି ଭାରତ ସରକାର କହିଥିଲେ।
