କଲମ୍ବୋ,୧୫।୨: ଟି-୨୦ ବିଶ୍ୱକପ୍ର ହାଇଭୋଲ୍ଟେଜ୍ ମୁକାବିଲାରେ ଭାରତୀୟ ଦଳ ପାକିସ୍ତାନକୁ ୬୧ ରନ୍ର ଏକ ବଡ଼ ବ୍ୟବଧାନରେ ପରାସ୍ତ କରିଛି। ଏହି ବିଜୟ ସହ ଭାରତ ଲଗାତାର ତିନୋଟି ମ୍ୟାଚ୍ ଜିତି ସୁପର-୮ ପର୍ଯ୍ୟାୟରେ ନିଜର ସ୍ଥାନ ପକ୍କା କରିଥିବା ବେଳେ ପାକିସ୍ତାନର ପରବର୍ତ୍ତୀ ରାସ୍ତା କଷ୍ଟକର ହୋଇପଡ଼ିଛି। ବିଶ୍ୱକପ୍ ଇତିହାସରେ ପାକିସ୍ତାନ ବିପକ୍ଷରେ ଭାରତର ବିଜୟ ରେକର୍ଡ ଏବେ ୮-୧ରେ ପହଞ୍ଚିଛି।
ପ୍ରଥମେ ବ୍ୟାଟିଂ କରିଥିବା ଭାରତୀୟ ଦଳ ୨୦ ଓଭରରେ ୭ ୱିକେଟ୍ ହରାଇ ୧୭୫ ରନ୍ ସଂଗ୍ରହ କରିଥିଲା। ଓପନର୍ ଇଶାନ କିଷାନ ମାତ୍ର ୪୦ ବଲ୍ରୁ ୭୭ ରନ୍ର (୧୦ ଚୌକା, ୩ ଛକା) ଏକ ଦୁର୍ଦ୍ଦଷ ଇନିଂସ ଖେଳି ପାକ୍ ବୋଲରଙ୍କୁ ନାକେଦମ୍ କରିଦେଇଥିଲେ। ସେ ମାତ୍ର ୨୭ ବଲ୍ରେ ନିଜର ଅର୍ଦ୍ଧଶତକ ପୂର୍ଣ୍ଣ କରିଥିଲେ। ଅଧିନାୟକ ସୂର୍ଯ୍ୟକୁମାର ଯାଦବ (୩୨) ମଧ୍ୟ ଉପଯୋଗୀ ପାଳି ଖେଳିଥିଲେ।
୧୭୬ ରନ୍ର ପିଛା କରୁଥିବା ପାକିସ୍ତାନ ଦଳ ପ୍ରାରମ୍ଭରୁ ହିଁ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା। ଭାରତୀୟ ବୋଲରଙ୍କ ଶୃଙ୍ଖଳିତ ଆକ୍ରମଣ ଆଗରେ ପାକ୍ ବ୍ୟାଟରମାନେ ସମ୍ପୂର୍ଣ୍ଣ ଅସହାୟ ମନେହେଉଥିଲେ। ପାକିସ୍ତାନ ମାତ୍ର ୧୮ ଓଭରରେ ୧୧୪ ରନ୍ କରି ଅଲ୍-ଆଉଟ୍ ହୋଇଯାଇଥିଲା। ଟି-୨୦ ଆନ୍ତର୍ଜାତୀୟରେ ଭାରତ ବିପକ୍ଷରେ ଏହା ପାକିସ୍ତାନର ସବୁଠାରୁ ବଡ଼ ପରାଜୟ।
ଭାରତ ପକ୍ଷରୁ ହାର୍ଦ୍ଦିକ ପାଣ୍ଡ୍ୟା, ଜସପ୍ରୀତ ବୁମ୍ରା, ଅକ୍ଷର ପଟେଲ ଓ ବରୁଣ ଚକ୍ରବର୍ତ୍ତୀ ପ୍ରତ୍ୟେକ ୨ଟି ଲେଖାଏଁ ୱିକେଟ୍ ଅକ୍ତିଆର କରିଥିଲେ। ପାକିସ୍ତାନର କୌଣସି ବି ବ୍ୟାଟର କ୍ରିଜ୍ରେ ସମୟ ବିତାଇ ପାରିନଥିଲେ।
ପଡ଼ିଆରେ ଲଢ଼େଇ ପୂର୍ବରୁ ଟସ୍ ସମୟରେ ମଧ୍ୟ ଉତ୍ତେଜନା ଦେଖିବାକୁ ମିଳିଥିଲା। ଭାରତୀୟ ଅଧିନାୟକ ସୂର୍ଯ୍ୟକୁମାର ଯାଦବ ପାକ୍ ଅଧିନାୟକ ସଲମାନ ଆଘାଙ୍କ ସହ ହାତ ମିଳାଇବାକୁ ମନା କରିଦେଇଥିଲେ, ଯାହା ପୁଣି ଥରେ ଦୁଇ ଦେଶ ମଧ୍ୟରେ ଥିବା ତିକ୍ତତାକୁ ପଦାରେ ପକାଇଛି।
ଏହି ଶୋଚନୀୟ ପରାଜୟ ପରେ ପାକିସ୍ତାନ ଏବେ ଗ୍ରୁପ୍-ଏ ତାଲିକାର ତୃତୀୟ ସ୍ଥାନକୁ ଖସି ଆସିଥିବା ବେଳେ ଭାରତୀୟ ଦଳ ଶୀର୍ଷ ସ୍ଥାନ ବଜାୟ ରଖିଛି।
