ନୂଆଦିଲ୍ଲୀ, ୮ା୧୧(ପି.ଟି.): ନିକଟରେ ଅନୁଷ୍ଠିତ ଏସିଆନ ଚାମ୍ପିୟନ୍ସ ଟ୍ରଫି ଓ ହାଙ୍ଗ୍ଝୋ ଏସିଆନ ଗେମ୍ସରେ ପ୍ରଭାବୀ ପ୍ରଦର୍ଶନ ପରେ ଭାରତୀୟ ମହିଳା ହକି ଦଳ ବିଶ୍ୱ ର଼୍ୟାଙ୍କିଙ୍ଗ ତାଲିକାରେ ଏହାର ଶ୍ରେଷ୍ଠ ୬ଷ୍ଠ ସ୍ଥାନ ପୁନଃ ଦଖଲ କରିବାରେ ସମର୍ଥ ହୋଇଛି। ଭାରତ ବର୍ତ୍ତମାନ ୨୩୬୮.୮୩ ରେଟିଂ ପଏଣ୍ଟ ସହ ଇଂଲଣ୍ଡ ଆଗରେ ୬ଷ୍ଠ ସ୍ଥାନରେ ରହିଛି। ଏସିଆନ ଗେମ୍ସ ପୂର୍ବରୁ ଭାରତ ୮ମ ସ୍ଥାନରେ ରହିଥିଲା। କିନ୍ତୁ ଦଳ ମହାଦେଶୀୟ ପ୍ରତିଯୋଗିତାରେ ବ୍ରୋଞ୍ଜ ପଦକ ହାସଲ କରିଥିଲା। ରାଞ୍ଚତ୍ରେ ଅପରାଜେୟ ରହିବା ସହ ଏସିଆନ ଚାମ୍ପିୟନ୍ସ ଟ୍ରଫି ଟାଇଟଲ ହାସଲ କରିବା ଦ୍ୱାରା ଏହାର ଶ୍ରେଷ୍ଠ ବିଶ୍ୱ ର଼୍ୟାଙ୍କିଙ୍ଗ୍ଙ୍କୁ ଫେରିଥିଲା। ପୂର୍ବରୁ ଦଳକୁ ଏହି ସଫଳତା ଗତବର୍ଷ ଜୁନ୍ରେ ଏଫ୍ଆଇଏଚ୍ ପ୍ରୋ-ଲିଗ୍ରେ ମିଳିଥିଲା। ଅନ୍ୟପକ୍ଷରେ ନେଦରଲାଣ୍ଡ୍ସ ବିଶ୍ୱର ଶ୍ରେଷ୍ଠ ଦଳ ଭାବେ ୩୪୨୨.୪୦ ପଏଣ୍ଟ ସହ ପୂର୍ବ ଭଳି ପ୍ରଥମ ସ୍ଥାନରେ ରହିଥିବା ବେଳେ ଅଷ୍ଟ୍ରେଲିଆ (୨୮୧୭.୭୩ ପଏଣ୍ଟ) ଓ ଆର୍ଜେଣ୍ଟିନା (୨୭୬୬.୯୦ ପଏଣ୍ଟ) ଯଥାକ୍ରମେ ଦ୍ୱିତୀୟ ଓ ତୃତୀୟ ସ୍ଥାନରେ ଅଛନ୍ତି। ଭାରତ ଉପରକୁ ଥିବା ଅନ୍ୟ ଦୁଇ ଦଳ ବେଲଜିୟମ(୨୬୦୮.୭୭ ପଏଣ୍ଟ) ଚତୁର୍ଥ ଓ ଜର୍ମାନୀ (୨୫୭୩.୭୨ ପଏଣ୍ଟ) ପଞ୍ଚମରେ ରହିଛନ୍ତି। ରାଞ୍ଚତ୍ରେ ଜାନୁୟାରୀ ୧୩ରୁ ୧୯ ପର୍ଯ୍ୟନ୍ତ ହେବାକୁଥିବା ଏଫ୍ଆଇଏଚ୍ ହକି ଅଲିମ୍ପିକ କ୍ୱାଲିଫାୟର୍ସ ପୂର୍ବରୁ ବିଶ୍ୱ ର଼୍ୟାଙ୍କିଙ୍ଗରେ ଉନ୍ନତି ଭାରତର ଆତ୍ମବିଶ୍ୱାସ ବୃଦ୍ଧିରେ ସହାୟକ ହେବ। ଆସନ୍ତାବର୍ଷର ପ୍ୟାରିସ ଅଲିମ୍ପିକ୍ସ ପାଇଁ ଯୋଗ୍ୟତା ହାସଲ ପାଇଁ ଅନୁଷ୍ଠିତ ହେବାକୁଥିବା ପ୍ରତିଯୋଗିିତାରେ ଜର୍ମାନୀ, ନ୍ୟୁଜିଲାଣ୍ଡ, ଜାପାନ, ଚିଲି, ଯୁକ୍ତରାଷ୍ଟ୍ର ଆମେରିକା, ଇଟାଲୀ ଓ ଚେକ୍ ରିପବ୍ଲିକ ସହ ମୁକାବିଲା କରିବାକୁ ହେବ।
