ନୂଆଦିଲ୍ଲୀ,୧୯।୧୦: ଜମ୍ମୁ-କଶ୍ମୀରରେ ଆତଙ୍କବାଦୀ କାର୍ଯ୍ୟକଳାପ ବଢିବାରେ ଲାଗିଛି। ଗତ କିଛିଦିନ ହେବ ଆତଙ୍କବାଦୀମାନେ ସାଧାରଣ ନାଗରିକଙ୍କୁ ଟାର୍ଗେଟ କରୁଛନ୍ତି। ଏସବୁ ଘଟଣା ଭିତରେ ଆସନ୍ତା ୨୪ରେ ଟି-୨୦ ବିଶ୍ୱକପ୍ରେ ଭାରତ ଏବଂ ପାକିସ୍ତାନ ମଧ୍ୟରେ ମ୍ୟାଚ୍ ଅନୁଷ୍ଠିତ ହେବାର ଅଛି। ଦେଶରେ ଏହି ମ୍ୟାଚ୍କୁ ନେଇ ବିରୋଧ ପ୍ରଦର୍ଶନ କରାଯାଉଛି। ଏହି ମ୍ୟାଚ୍ ରଦ୍ଦ କରିବାକୁ ଦାବି ଉଠିଛି। କେନ୍ଦ୍ର ମନ୍ତ୍ରୀ ଗିରିରାଜ ସିଂ, ତାରକିଶେର ପ୍ରସାଦଙ୍କ ପରେ ଏଆଇଏମଆଇଏମ୍ ସଭାପତି ଅସଦଉଦ୍ଦିନ ଓଓ୍ବାଇସି ମଧ୍ୟରେ ଏହି ମ୍ୟାଚ୍କୁ ବିରୋଧ କରିଛନ୍ତି। ସେ କହିଛନ୍ତି ଜମ୍ମୁ-କଶ୍ମୀରରେ ଆମର ୯ ଯବାନ ନିହତ ହେଲେ, କିନ୍ତୁ ସେପଟେ ଭାରତ-ପାକିସ୍ତାନ ମ୍ୟାଚ୍ ଖେଳାଯିବ। ଏନେଇ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଟାର୍ଗେଟ କରିଛନ୍ତି। ପ୍ରଧାନମନ୍ତ୍ରୀ ୨ଟି ଜିନିଷ ଉପରେ କେବେ ମୁହଁ ଖୋଲୁନାହାନ୍ତି ଗୋଟିଏ ହେଉଛି ପେଟ୍ରୋଲ-ଡିଜେଲ ଦର ବୃଦ୍ଧି ଏବଂ ଦ୍ୱିତୀୟଟି ଲଦାଖରେ ଚାଇନାର ଅନୁପ୍ରବେଶକୁ ନେଇ କିଛି କହୁନାହାନ୍ତି ପ୍ରଧାନମନ୍ତ୍ରୀ ବୋଲି ସେ କହିଛନ୍ତି।
ନିକଟରେ ଜମ୍ମୁ କଶ୍ମୀରରେ ଗୁପଚୁପ ବିକ୍ରେତାଙ୍କୁ ଆତଙ୍କବାଦୀମାନେ ଟାର୍ଗେଟ କରିଥିଲେ। ଗୁଳି ମାଡ ଯୋଗୁ ଉକ୍ତ ବ୍ୟକ୍ତିଙ୍କ ମୃତ୍ୟୁ ଘଟିଥିଲା। ବାଙ୍କାରୁ ଆସିଥିବା ଏହି ବ୍ୟକ୍ତିଙ୍କ ପିତା ବର୍ତ୍ତମାନ ଟି -୨୦ ବିଶ୍ୱକପରେ ଭାରତ-ପାକିସ୍ତାନ ମ୍ୟାଚକୁ ବାତିଲ କରିବାକୁ ଦାବି କରିଥିଲେ।
