ନୂଆଦିଲ୍ଲୀ, ୧୫। ୩: ବିଶ୍ୱର ସବୁଠାରୁ ପ୍ରଦୂଷିତ ଦେଶ ସୂଚୀରେ ଭାରତ ଅଷ୍ଟମ ସ୍ଥାନରେ ରହିଛି। ମଙ୍ଗଳବାର ସୁଇସ୍ ଫାର୍ମ ଆଇକ୍ୟୁଏୟାର ପକ୍ଷରୁ ‘ଓ୍ବାଲର୍ଡ ଏୟାର୍ କ୍ୱାଲିଟି ରିପୋର୍ଟ’ରେ ପ୍ରକାଶ ପାଇଛି। ୨୦୨୨ରେ ସବୁଠାରୁ ପ୍ରଦୂଷିତ ରାଷ୍ଟ୍ର ସୂଚୀର ଶୀର୍ଷ ସ୍ଥାନରେ ରହିଛି ସେଣ୍ଟ୍ରାଲ ଆଫ୍ରିକାର ଚାଦ। ପ୍ରକାଶିତ ରିପୋର୍ଟ ଅନୁସାରେ ଭାରତ ବାୟୁମଣ୍ଡଳରେ ପିଏମ୍୨.୫ (ଫାଇନ୍ ପାର୍ଟିକଲ୍/ ପ୍ରଦୂଷକ)ର ପରିମାଣ ୫୩.୩ ମାଇକ୍ରୋଗ୍ରାମ୍ସ/କ୍ୟୁବିକ୍ ମିଟର, ଯାହା ବିଶ୍ୱ ସ୍ବାସ୍ଥ୍ୟ ସଙ୍ଗଠନ (ଡବ୍ଲ୍ୟୁଏଚ୍ଓ)ର ସେଫ୍ ଲିମିଟ୍ଠାରୁ ୧୦ ଗୁଣା ଅଧିକ। ସୁଇସ୍ ଆଇକ୍ୟୁଏୟାର ପକ୍ଷରୁ ପ୍ରକାଶ ପାଇଥିବା ଏହି ରିପୋର୍ଟ ପିଏମ୍ ୨.୫କୁ ଆଧାର କରି ବୈଜ୍ଞାନିକ ଓ ହେଲ୍ଥ ଏକ୍ସପର୍ଟଙ୍କ ଦ୍ୱାରା ପ୍ରସ୍ତୁତ ହୋଇଛି। ସରକାରୀ ବା ବେସରକାରୀ ଭାବେ ତୃଣମୂଳ ସ୍ତରରେ କାର୍ଯ୍ୟରତ ୧୩୧ ଦେଶର ୩୦,୦୦୦ରୁ ଊର୍ଦ୍ଧ୍ୱ ପର୍ଯ୍ୟବେକ୍ଷକଙ୍କଠାରୁ ସଂଗୃହୀତ ତଥ୍ୟ ଆଧାରରେ ଏହି ରିପୋର୍ଟ ପ୍ରସ୍ତୁତ କରାଯାଇଛି। ଦେଶରେ ୨୦-୩୦% ପ୍ରଦୂଷଣ ଟ୍ରାନ୍ସପୋର୍ଟେଶନ୍ ସେକ୍ଟର ଦ୍ୱାରା ହେଉଥିବାବେଳେ ଇଣ୍ଡଷ୍ଟ୍ରିଆନ୍ ୟୁନିଟ୍, କୋଇଲାରୁ ଶକ୍ତି ଉତ୍ପାଦନକାରୀ ପ୍ଲାଣ୍ଟ ଏବଂ ଜଙ୍ଗଲ ନିଆଁ ଦ୍ୱାରା ବାୟୁମଣ୍ଡଳରେ ପିଏମ୍୨.୫ ପ୍ରଦୂଷକର ପରିମାଣ ବଢ଼ୁଥିବା ଉଲ୍ଲେଖ କରାଯାଇଛି। ବାୟୁ ପ୍ରଦୂଷଣ ଯୋଗୁ ଭାରତର ୧୫୦ ବିଲିୟନ ଡଲାର କ୍ଷତି ହୋଇଥିବା ଅନୁମାନ କରାଯାଇଛି। ଅନ୍ୟପକ୍ଷେ ବିଶ୍ୱର ୫୦ ପ୍ରଦୂଷିତ ସହର ସୂଚୀରେ ଭାରତର ୩୯ ସହର ସ୍ଥାନ ପାଇଛି। ଶୀର୍ଷ ୧୦ ସହର ମଧ୍ୟରେ ଭାରତର ୬ ସହର ରହିଥିବାବେଳେ ଶୀର୍ଷ ୨୦ରେ ୧୪ ସହର ଅଛି। ଗାଜିଆବାଦ୍ ବାୟୁରେ ପିଏମ୍ ୨.୫ ସ୍ତର ସର୍ବାଧିକ ୮୮ ମାଇକ୍ରୋଗ୍ରାମ୍ସ ଥିବାବେଳେ ଗୁରୁଗ୍ରାମରେ ୭୦ ମାଇକ୍ରୋଗ୍ରାମ୍ସ ରହିଛି। ସେହିପରି ନୋଏଡା, ଗାଜିଆବାଦ୍, ଫରିଦାବାଦ ଆଦି ସହରରେ ବାୟୁ ପ୍ରଦୂଷଣର ମାତ୍ରା ପୂର୍ବ ଅପେକ୍ଷା କମିଛି। ପାକିସ୍ତାନର ଲାହୋର ସହର ଏହି ସୂଚୀରେ ପ୍ରଥମ ସ୍ଥାନରେ ଥିବାବେଳେ ଦ୍ୱିତୀୟରେ ଚାଇନାର ହୋଟାନ୍ ସହର ରହିଛି। ଅନ୍ୟପକ୍ଷେ ରାଜସ୍ଥାନର ଭିଓ୍ବାଦି ସହର ତୃତୀୟ ଏବଂ ଦିଲ୍ଲୀ ଯଥାକ୍ରମେ ଚତୁର୍ଥ ସ୍ଥାନ ଅଧିକାର କରିଛି। ଦକ୍ଷିଣ ଏସିଆର ୭୨ଟି ସହର ବିଶ୍ୱର ୧୦୦ ପ୍ରଦୂଷିତ ସହର ତାଲିକାରେ ସ୍ଥାନ ପାଇଛନ୍ତି। ଅଧିକାଂଶ ସହର ଭାରତ, ପାକିସ୍ତାନ, ବାଂଲାଦେଶର ହୋଇଥିବା ଜଣାପଡ଼ିଛି। ବାୟୁ ପ୍ରଦୂଷଣ ବଢ଼ିବା ଶିଶୁ, ମଧୁମେହ ରୋଗୀ, ଆଜ୍ମା ଆକ୍ରାନ୍ତ, କ୍ୟାନ୍ସର ପୀଡ଼ିତ ଏବଂ ବୟସ୍କଙ୍କ ପାଇଁ ଘାତକ। ବାୟୁରେ ପିଏମ୍ ୨.୫ର ମାତ୍ରା ବଢ଼ିବା ଦ୍ୱାରା ମଣିଷ ସ୍ବାସ୍ଥ୍ୟ ପ୍ରତି ଏହା ହାନିକାରକ।
