ନୂଆଦିଲ୍ଲୀ: ଭାରତ ଟିକସ ଆତଙ୍କବାଦରୁ ଟିକସ ସ୍ବଚ୍ଛତା ଆଡକୁ ବଢୁଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବୁଧବାର କହିଛନ୍ତି। କେନ୍ଦ୍ର ସରକାର ଟିକସ ବ୍ୟବସ୍ଥାରେ ନୂଆ ଫେସ୍ଲେସ ଅପିଲ, ବିବାଦ ସମାଧାନ ବ୍ୟବସ୍ଥା ଭଳି ନୂଆ ସଂସ୍କାର ଆରମ୍ଭ କରିଛନ୍ତି। ଏହାର ଲାଭ ଅର୍ଥ ବ୍ୟବସ୍ଥାକୁ ମିଳୁଛି ବୋଲି କଟକ ବେଞ୍ଚ ଆୟକର ଆପିଲେଟ ଟ୍ରିବ୍ୟୁନାଲ (ଆଇଟିଏଟି) ନୂଆ କାର୍ଯ୍ୟାଳୟ ଏବଂ ରେସିଡେନସିଆଲ କମ୍ପ୍ଲେକ୍ସ ଶୁଭାରମ୍ଭ କରି ମୋଦି ଏହା କହିଛନ୍ତି। ସେ ପୁଣି କହିଛନ୍ତି ଯେ, ସରକାର ବର୍ତ୍ତମାନ ସଂସ୍କାର, କାର୍ଯ୍ୟଧାରା ଏବଂ ପରିବର୍ତ୍ତନ ଉପରେ ଫୋକସ କରିଛନ୍ତି। ଦେଶର ଟିକସ ବ୍ୟବସ୍ଥାରେ ସ୍ବଚ୍ଛତା ପ୍ରୟାସକୁ ସେ ପ୍ରଶଂସା କରିଛନ୍ତି। ଟିକସଦାତାଙ୍କ ଦାୟିତ୍ୱ ଏବଂ ଅଧିକାରକୁ ସଂକଳିତ କରି ଏହାକୁ ଆଇନର ରୂପ ଦେବାରେ ଭାରତ ବିଶ୍ୱର ପ୍ରମୁଖ ଦେଶ ମଧ୍ୟରେ ସାମିଲ ହୋଇଛି। ଏହି ପଦକ୍ଷେପ ଦ୍ୱାରା ଟିକସଦାତା ଏବଂ ଟିକସ ସଂଗ୍ରହକାରୀଙ୍କ ମଧ୍ୟରେ ସ୍ବଚ୍ଛତା ଏବଂ ବିଶ୍ୱାସ ଆଣିବା ଦିଗରେ ସହାୟକ ହେଉଛି। ସରକାରଙ୍କ ଟିକସ ହ୍ରାସ ପଦକ୍ଷେପ ଉପରେ ମଧ୍ୟ ମୋଦି ଗୁରୁତ୍ୱାରୋପ କରିଛନ୍ତି। ସେହିଭଳି ବ୍ୟକ୍ତିଗତ ଟିକସଦାତାଙ୍କ ଲାଗି ଟିକସ ଢାଞ୍ଚାକୁ ସରଳ କରିବା, ଫେସ୍ଲେସ ଅପିଲ ଏବଂ ତ୍ୱରିତ ରିଫଣ୍ଡ ଉପରେ ସେ ମତ ରଖିଛନ୍ତି। ଅର୍ଥ ବ୍ୟବସ୍ଥାରେ ସମ୍ପତ୍ତି ସୃଷ୍ଟିକାରୀଙ୍କ ଗୁରୁତ୍ୱପୂର୍ଣ୍ଣ ଭୂମିକା ରହିଛି। ଏହାକୁ ଦେଖିଲେ ଟିକସଦାତାଙ୍କୁ ସମ୍ମାନିତ କରିବାର ଆବଶ୍ୟକତା ରହିଛି। ଟିକସଦାତାଙ୍କ ସମସ୍ୟା ସମାଧାନ ହେଲେ ଅଧିକ ଲୋକ ବ୍ୟବସ୍ଥା ସହ ଯୋଡି ହେବେ ବୋଲି ସେ ମତ ପ୍ରକାଶ କରିଛନ୍ତି।
