ନୂଆଦିଲ୍ଲୀ,୨୫।୧୧: ୨୦୨୩ ଜାନୁୟାରୀ ୨୬ ସାଧାରଣତନ୍ତ୍ର ଦିବସରେ ମୁଖ୍ୟ ଅତିଥି ଭାବେ ଯୋଗଦେବା ପାଇଁ ଇଜିପ୍ଟର ରାଷ୍ଟ୍ରପତି ଫତା ଅଲ୍-ସିସିଙ୍କୁ ଭାରତ ପକ୍ଷରୁ ନିମନ୍ତ୍ରଣ କରାଯାଇଛି।
ଅନ୍ୟପକ୍ଷେ କାଇରୋ ସହିତ ଭାରତର ରାଜନୈତିକ ଏବଂ ସାମରିକ ସମ୍ପର୍କକୁ ମଜଭୁତ କରିବା ଲାଗି ନୂଆଦିଲ୍ଲୀ ଏକ ପ୍ରୟାସ ଆରମ୍ଭ କରିଛି। ଉଭୟ ଦେଶ ପୂର୍ବରୁ କୂଟନୈତିକ ସମ୍ପର୍କର ୭୫ତମ ବାର୍ଷିକୀ ମଧ୍ୟ ପାଳନ କରିସାରିଛନ୍ତି।
ଏହି ନିମନ୍ତ୍ରଣ ଆଗାମୀ ଦିନରେ ଦିଲ୍ଲୀ-କାଇରୋ ସମ୍ପର୍କକୁ ଆହୁରି ଦ୍ୱିଗୁଣିତ କରିବ। ଚଳିତ ବର୍ଷ ପ୍ରାରମ୍ଭରେ ବୈଦେଶିକ ବ୍ୟାପାର ମନ୍ତ୍ରୀ ଡକ୍ଟର୍ ଏସ୍. ଜୟଶଙ୍କର ଏବଂ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଇଜିପ୍ଟ ଗସ୍ତ କରିଥିଲେ। ଏହି ଗସ୍ତ ସମୟରେ ଉଭୟ ମନ୍ତ୍ରୀ ଇଜିପ୍ଟର ରାଷ୍ଟ୍ରପତିଙ୍କୁ ଭେଟିଥିଲେ। ସେତେବେଳେ ଜୟଶଙ୍କର ରାଷ୍ଟ୍ରପତି ସିସିଙ୍କୁ ପ୍ରଧାନମନ୍ତ୍ରୀ ମୋଦିଙ୍କ ଏକ ‘ବିଶେଷ ବାର୍ତ୍ତା’ ପ୍ରଦାନ କରିଥିଲେ।
୨୦୧୬ ସେପ୍ଟେମ୍ବରରେ ରାଷ୍ଟ୍ରପତି ସିସି ଭାରତ ଗସ୍ତରେ ଆସିଥିଲେ। ସେହି ସମୟରେ ଇଜିପ୍ଟ ଭାରତର ତେଜସ ଫାଇଟର୍ ବିମାନ କିଣିବାକୁ ଆଗ୍ରହୀ ଥିବା ଜଣାପଡିଥିଲା।
