ଭୋପାଳ, ୯ା୧: ସରକାରୀ ବ୍ୟବସ୍ଥାରେ ଅବହେଳା ଯୋଗୁ ମଧ୍ୟପ୍ରଦେଶର ଡିଣ୍ଡୋରି ସହରରେ ଥିବା ସରକାରୀ ଗୋଦାମଗୁଡ଼ିକରେ ୯ ଲକ୍ଷ କୁଇଣ୍ଟାଲର ଖାଦ୍ୟଶସ୍ୟ ସଢ଼ି ନଷ୍ଟ ହୋଇଛି। ଏକ ଜାତୀୟ ଗଣମାଧ୍ୟମର ରିପୋର୍ଟରୁ ଏହି ତଥ୍ୟ ସାମ୍ନାକୁ ଆସିଛି। ରିପୋର୍ଟ ଅନୁଯାୟୀ, ନଷ୍ଟ ହୋଇଥିବା ଖାଦ୍ୟଶସ୍ୟ ମାସେ ପର୍ଯ୍ୟନ୍ତ ମଧ୍ୟପ୍ରଦେଶର ସମସ୍ତ ଜନସାଧାରଣଙ୍କର ଭୋକ ମେଣ୍ଟାଇପାରିଥାନ୍ତା।
ନଷ୍ଟ ହୋଇଯାଇଥିବା ଖାଦ୍ୟଶସ୍ୟ ମଧ୍ୟରେ ୯୦%ରୁ ଅଧିକ ଗହମ ଥିବାନେଇ ରିପୋର୍ଟରେ ଉଲ୍ଲେଖ ରହିଛି। ମଧ୍ୟପ୍ରଦେଶ ରାଜ୍ୟ ନାଗରିକ ଯୋଗାଣ ନିଗମ ଏହି ସଢ଼ିଯାଇଥିବା ଖାଦ୍ୟଶସ୍ୟକୁ ବିକ୍ରି କରିବା ପାଇଁ ଟେଣ୍ଡର ଜାରି କରିଛି, ଯାହାଦ୍ୱାରା କିଛି ମାତ୍ରାରେ ସରକାରୀ କ୍ଷତିକୁ ପୁନରୁଦ୍ଧାର କରାଯାଇପାରିବ। ଘଟଣାକୁ ନେଇ ରାଜ୍ୟ ଖାଦ୍ୟ ଯୋଗାଣ ମନ୍ତ୍ରୀ ଗୋବିନ୍ଦ ସିଂ ରାଜପୁତ କହିଛନ୍ତି, ଏହା ଏକ ପୁରୁଣା ମାମଲା ଯାହା ତାଙ୍କ ଦୃଷ୍ଟିକୁ ଆସିଛି।
ଘଟଣାରେ ଯେଉଁମାନେ ଦାୟୀ, ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ। ଏପରି ଘଟଣାର ଯେପରି ପୁନରାବୃତ୍ତି ନ ହୁଏ ସେଥିପ୍ରତି ସଜାଗ ରହିବାକୁ ସେ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି। ସେହିପରି ପର୍ଯ୍ୟାୟକ୍ରମେ ବିଭିନ୍ନ ସରକାରୀ ଗୋଦାମଗୁଡ଼ିକୁ ଯାଞ୍ଚ କରିବା ପାଇଁ ନିର୍ଦ୍ଦେଶ ଦିଆଯାଇଛି ବୋଲି ଗୋବିନ୍ଦ କହିଛନ୍ତି। ୯ ଲକ୍ଷ କୁଇଣ୍ଟାଲ ଖାଦ୍ୟଶସ୍ୟ ନଷ୍ଟ ହେବା ଦ୍ୱାରା ମଧ୍ୟପ୍ରଦେଶ ସରକାରଙ୍କୁ ଆନୁମାନିକ ୨୦୦ କୋଟି ଟଙ୍କାର କ୍ଷତି ସହିବାକୁ ପଡ଼ିବ ବୋଲି ଉକ୍ତ ରିପୋର୍ଟରେ କୁହାଯାଇଛି।
