ଡେରାଡୁନ,୩୦।୧୧: ଚାଇନାରେ ବ୍ୟାପିଥିବା ରହସ୍ୟମୟୀ ରୋଗ ଏବେ ଭାରତ ମୁହାଁ ହୋଇଥିବା ଦାବି କରାଯାଉଛି। ଉତ୍ତରାଖଣ୍ଡର ବାଗେଶ୍ୱରର ଦୁଇ ପିଲାଙ୍କଠାରେ ସ୍ବାଇନ୍ ଫ୍ଲୁ ପରି ଲକ୍ଷଣ ଦେଖିବାକୁ ମିଳିଛି। ଏହି ପରିପ୍ରେକ୍ଷୀରେ ପିଲାମାନଙ୍କର ନମୁନା ପରୀକ୍ଷା ପାଇଁ ପଠାଯାଇଛି। ଉଭୟଙ୍କ ନମୁନା ପରୀକ୍ଷା ପାଇଁ ଡାକ୍ତରଖାନାକୁ ପଠାଯାଇଛି ଏବଂ ପରୀକ୍ଷା ରିପୋର୍ଟକୁ ଅପେକ୍ଷା କରାଯାଇଛି। ଯାଞ୍ଚ ରିପୋର୍ଟ ୪ ରୁ ୫ ଦିନ ମଧ୍ୟରେ ଆସିବ। ଅନୁସନ୍ଧାନ ରିପୋର୍ଟ ବାହାରକୁ ଆସିବା ପରେ ହିଁ ସବୁକିଛି ଜଣାପଡିବ। ସ୍ବାସ୍ଥ୍ୟ ବିଭାଗ ଏହି ବିଷୟରେ ସମ୍ପୂର୍ଣ୍ଣ ସତର୍କ ଥିବା ଜଣାପଡିଛି। ଚାଇନା ରୋଗକୂ ନେଇ ଉତ୍ତରାଖଣ୍ଡରେ ଏକ ସତର୍କ ସୂଚନା ଜାରି କରାଯାଇଥିଲା। ସ୍ବାସ୍ଥ୍ୟ ବିଭାଗ ସତର୍କ ସୂଚନା ଜାରି କରିବା ପରେ ସବୁକିଛି ଉପରେ ତୀକ୍ଷ୍ଣ ନଜର ରଖାଯାଇଛି।
ସୂଚନାଯୋଗ୍ୟ,ଚାଇନାରେ ଶିଶୁମାନଙ୍କୁ ବହୁଳ ଭାବେ ନିମୋନିଆ ସଂକ୍ରମଣ କରୁତ୍ଥିବାବେଳେ ଶ୍ୱାସକ୍ରିୟାଜନିତ ରୋଗ ବଢ଼ିଥିବା ବେଜିଂ ସତର୍କ କରାଇଛି। ଜ୍ୱର, ଆଡେନୋ ଭାଇରସ୍ ଏବଂ ରେସ୍ପିରେଟୋରି ସିନ୍ସିଟିଆଲ ଭାଇରସ୍ ଏବେ ମାଇକୋପ୍ଲାଜ୍ମାକୁ ଅତିକ୍ରମ କରିଯାଇଥିବା ବେଜିଂର ସ୍ବାସ୍ଥ୍ୟସେବା କର୍ତ୍ତୃପକ୍ଷ କହିଛନ୍ତି। ରୋଗୀଙ୍କଠାରେ ବାରମ୍ବାର ପାଥୋଜେନ୍ ଚିହ୍ନଟ କରାଯାଉଛି। ଟିଆନଜିନ୍ ଏବଂ ସାଙ୍ଘାଇରେ ମାଇକୋପ୍ଲାଜ୍ମା ପଜିଟିଭ୍ ହାର ହ୍ରାସ ପାଉଥିବା ଦେଖାଯାଇଛି। ବିଭିନ୍ନ ରେସ୍ପିରେଟୋରି ପାଥୋଜେନ୍ଗୁଡ଼ିକର ସଂକ୍ରମଣ ଯୋଗୁ ଶ୍ୱାସକ୍ରିୟାଜନିତ ରୋଗ ମହାମାରୀ ଭଳି ବ୍ୟାପିବା ଆଶଙ୍କା କରାଯାଇଛି। ଚାଇନାରେ ବହୁସଂଖ୍ୟାରେ ଶିଶୁ ଓ ସ୍କୁଲ୍ ଯାଉଥିବା ପିଲା ନିମୋନିଆରେ ଆକ୍ରାନ୍ତ ହୋଇଥିବାରୁ ହସ୍ପିଟାଲଗୁଡ଼ିକରେ ରୋଗୀ ରଖିବା ପାଇଁ ଜାଗାର ଅଭାବ ଦେଖାଯାଇଛି। ଏହା କରୋନା ମହାମାରୀ ଭଳି ବ୍ୟାପିବା ନେଇ ସାରା ବିଶ୍ୱରେ ଉଦ୍ବେଗ ପ୍ରକାଶ ପାଇଛି।
