ତେଲ୍ ଆଭିଭ୍ ,୧୯ା୩: ଇରାନ୍କୁ ବୁଧବାର ପୁଣି ଶକ୍ତ ଧକ୍କା ଲାଗିଛି। ଇସ୍ରାଏଲ ଆକ୍ରମଣରେ ଇରାନ୍ର ଗୋଇନ୍ଦା ବିଭାଗ ମନ୍ତ୍ରୀ ଇସ୍ମାଇଲ ଖାତିବ୍ ନିହତ ହୋଇଛନ୍ତି। ମଙ୍ଗଳବାର ଇରାନ୍ ପ୍ରତିରକ୍ଷା ବିଭାଗୀୟ ମୁଖ୍ୟ ଅଲୀ ଲାରିଜାନି ଏବଂ ବସିଜ୍ ଫୋର୍ସ କମାଣ୍ଡର ବ୍ରିଗେଡିୟର ଜେନେରାଲ ଗୋଲାମରେଜା ସୁଲେମାନି ଇସ୍ରାଏଲ ଆକ୍ରମଣରେ ନିହତ ହୋଇଥିଲେ। ଏହି ଘଟଣାକୁ କିଛି ଘଣ୍ଟା ନ ପୂରୁଣୁ ପୁଣି ଜଣେ ବରିଷ୍ଠ ନେତା ଇସ୍ମାଇଲ ଖାତିବ୍ଙ୍କୁ ହତ୍ୟା କରାଯାଇଥିବା ଇସ୍ରାଏଲର ଆଇଡିଏଫ୍ ଦାବି କରିଛି। ତାଙ୍କ ମୃତ୍ୟୁକୁ ଇରାନ୍ ରାଷ୍ଟ୍ରପତି ମାସୁଦ୍ ପେଜେସ୍କିଆନ୍ ସ୍ୱୀକାର କରିଛନ୍ତି।୨ ଦିନ ମଧ୍ୟରେ ଇରାନ୍ ପାଓ୍ୱାର ସେଣ୍ଟର୍ର ୩ ବରିଷ୍ଠ ନେତାଙ୍କ ମୃତ୍ୟୁ ହେବା ଘଟଣା ଇରାନ୍ ପାଇଁ ଚିନ୍ତା ବଢାଇଛି। ଏହି ୩ ବ୍ୟକ୍ତି ଆୟାତୋଲ୍ଲା ଖାମେନେଇଙ୍କ ଅତ୍ୟନ୍ତ ଘନିଷ୍ଠ ରହି ଆସିଥିଲାବେଳେ ପ୍ରତିରକ୍ଷା, ଆଭ୍ୟନ୍ତରୀଣ ସୁରକ୍ଷା ଏବଂ ବହିର୍ୱ୍ୟାପାର କ୍ଷେତ୍ରରେ ଗୁରୁତ୍ୱପୂର୍ଣ୍ଣ ଦାୟିତ୍ୱ ତୁଲାଇ ଆସୁଥିଲେ। ଲାରିଜାନି ‘ ବ୍ୟାକ୍ରୁମ୍ ପାଓ୍ୱାର ବ୍ରୋକର୍’ ଭାବେ ପରିଚିତ ଥିଲେ। ସେପଟେ ସୁପ୍ରିମ ଲିଡର ମୋଜ୍ତବା ଖାମେନେଇ ଗୁରୁତର ଆହତ ହୋଇ ବର୍ତ୍ତମାନ ରୁଷିଆରେ ଚିକିତ୍ସା ହେଉଥିବା କୁହାଯାଉଥିବାବେଳେ ଇରାନ୍ର ନେତୃତ୍ୱ ପାଇଁ ବଡ଼ ପ୍ରଶ୍ନ ଉଠିଛି। ପେବୃଆରୀ ୨୮ରେ ଇରାନ୍ ଉପରେ ଇସ୍ରାଏଲ ଆକ୍ରମଣ ଆରମ୍ଭ କରିବା ପରେ ଜଣକ ପରେ ଜଣେ ଇରାନୀୟ ନେତାଙ୍କୁ ଇସ୍ରାଏଲ ଟାର୍ଗେଟ କରି ହତ୍ୟା କରିବାରେ ଲାଗିଛି। ଆକ୍ରମଣର ପ୍ରଥମ ଦିନରେ ସୁପ୍ରିମ ଲିଡର ଆୟାତୋଲ୍ଲା ଅଲୀ ଖାମେନେଇଙ୍କ ସମେତ ତାଙ୍କର ବହୁ ପରିବାର ସଦସ୍ୟ ଏବଂ ବରିଷ୍ଠ ଅଧିକାରୀ ପ୍ରାଣ ହରାଇଥିଲେ। ବର୍ତ୍ତମାନ ଇରାନ୍ର ସର୍ୱୋଚ୍ଚ ନେତା ନିଯୁକ୍ତ ହୋଇଥିବା ଖାମେନେଇଙ୍କ ପୁଅ ମୋଜ୍ତବା ଖାମେନେଇ ମଧ୍ୟ ଏହି ଘଟଣାରେ ଗୁରୁତର ଆହତ ହୋଇଥିଲେ। କେବଳ ଇରାନ୍ ନୁହେଁ, ଇସ୍ରାଏଲ ସେନା ଲେବାନନ୍ର ହିଜ୍ବୁଲ୍ଲା ଠିକଣା ଉପରେ ମଧ୍ୟ ଆକ୍ରମଣ ଜାରି ରଖିଛି। ମଙ୍ଗଳବାର ମଧ୍ୟରାତ୍ରରେ ଲେବାନନ୍ର ବିଭିନ୍ନ ଇଲାକା ଉପରେ ଇସ୍ରାଏଲର ଆଇଡିଏଫ୍ ବୋମାମାଡ଼ କରିଥିଲାବେଳେ ଏହି ଘଟଣାରେ ଅନୂ୍ୟନ ୧୨ ଜଣଙ୍କ ମୃତ୍ୟୁ ହୋଇଥିବା କୁହାଯାଇଛି।
