ଦୁବାଇ,୧୧।୮ : ନିକଟରେ ଅମୀମାଂସିତ ଭାବେ ଶେଷ ହୋଇଥିବା ଟ୍ରେଣ୍ଟ ବ୍ରିଜ ଟେଷ୍ଟରୁ ଆରମ୍ଭ ହୋଇଛି ବିଶ୍ୱ ଟେଷ୍ଟ ଚାମ୍ପିୟନଶିପ୍ (ଡବ୍ଲ୍ୟୁଟିସି)ର ଦ୍ୱିତୀୟ ସଂସ୍କରଣ। ପ୍ରଥମ ସଂସ୍କରଣର ଉପବିଜେତା ଭାରତ ଓ ଇଂଲଣ୍ଡ ଆରମ୍ଭରୁ ହିଁ ଝୁଣ୍ଟି ପଡ଼ିଛନ୍ତି। ପ୍ରଥମ ମ୍ୟାଚ୍ରେ ଧୀମା ବୋଲିଂ ହାର କାରଣରୁ ଉଭୟ ଦଳର ଗୋଟିଏ ଲେଖାଏ ଡବ୍ଲ୍ୟୁଟିସି ପଏଣ୍ଟ କାଟ କରାଯାଇଛି। ଏଥି ସହିତ କାଟି ଦିଆଯାଇଛି ଦୁଇ ଦଳର ଖେଳାଳିଙ୍କ ୪୦ ପ୍ରତିଶତ ମ୍ୟାଚ୍ ଫି’।
ଧାର୍ଯ୍ୟ ସମୟ ମଧ୍ୟରେ କୌଣସି ଦଳ ପ୍ରଦତ୍ତ ଓଭର ବୋଲିଂ କରି ପାରି ନ ଥିଲେ। ଉଭୟ କ୍ଷେତ୍ରରେ ଦୁଇ ଓଭର ବଳକା ରହି ଯାଇଥିଲା। ଏଥି ଯୋଗୁ ଦୁଇ ଦଳ ଉପରେ ଏହି ଦଣ୍ଡାଦେଶ ଲଦି ଦେଇଛନ୍ତି ଆଇସିସିର ମ୍ୟାଚ୍ ରେଫରି କ୍ରିସ ବ୍ରଡ୍। ବିରାଟ କୋହଲି ଓ ଜୋ ରୁଟ୍ ଦଣ୍ଡାଦେଶ ସ୍ବୀକାର କରି ନେଇଥିବାରୁ କୌଣସି ଶୁଣାଣିର ଆବଶ୍ୟକତା ନାହିଁ। ପ୍ରଥମ ଟେଷ୍ଟ ଡ୍ର’ ହେବା କାରଣରୁ ଦୁଇ ଦଳକୁ ୪ ପଏଣ୍ଟ ଲେଖା ମିଳିଥିଲା। କିନ୍ତୁ ଧିମା ବୋଲିଂ କାରଣରୁ ଗୋଟିଏ ଲେଖା ପଏଣ୍ଟ ହ୍ରାସ ହେବାରୁ ଡବ୍ଲ୍ୟୁଟିସି ତାଲିକାରେ ଭାରତ ଓ ଇଂଲଣ୍ଡର ପଏଣ୍ଟ ୩କୁ ଖସିଛି।
