ଭାରତରେ ଆବଶ୍ୟକତାଠାରୁ ଅଧିକ କାନାଡା କୂଟନୀତିଜ୍ଞ ଅଛନ୍ତି: ବୈଦେଶିକ ମନ୍ତ୍ରଣାଳୟ
04 ନୂଆଦିଲ୍ଲୀ,୨୧।୯: ଖାଲିସ୍ତାନୀ ନେତାଙ୍କ ହତ୍ୟାକୁ ନେଇ ଭାରତ ଏବଂ କାନାଡା ମଧ୍ୟରେ ଚାଲିଥିବା ବିବାଦ ମଧ୍ୟରେ କୂଟନୀତିଜ୍ଞଙ୍କ ସୁରକ୍ଷାକୁ ନେଇ ପ୍ରଶ୍ନ ଉଠିଛି। ଗୁରୁବାର ସରକାର ଏହାର ଜବାବ ଦେଇଛନ୍ତି।
ଭାରତରେ କାନାଡାର କୂଟନୀତିଜ୍ଞଙ୍କୁ ମିଳିଥିବା ଧମକପୂର୍ଣ୍ଣ ରିପୋର୍ଟ ଉପରେ ବୈଦେଶିକ ମନ୍ତ୍ରଣାଳୟର ମୁଖପାତ୍ର ଅରିନ୍ଦମ ବାଗ୍ଚି କହିଛନ୍ତି , ଆମେ ବିଦେଶୀ ଦେଶର ପ୍ରତ୍ୟେକ କୂଟନୀତିଜ୍ଞଙ୍କୁ ସୁରକ୍ଷା ଦେଉଛୁ। ଆମେ ଆମର ଦାୟିତ୍ୱରୁ ଦୂରେଇ ଯାଇନାହୁଁ ।
ବାଗ୍ଚି କହିଛନ୍ତି, ଆମେ ଆମର ଦାୟିତ୍ୱକୁ ଅତି ଗୁରୁତର ସହ ନେଇଥାଉ। ଆମେ ନିଶ୍ଚିତ ଭାବରେ ଭାରତରେ ବିଦେଶୀ କୂଟନୀତିଜ୍ଞଙ୍କୁ ସମସ୍ତ ପ୍ରକାର ସୁରକ୍ଷା ଯୋଗାଇବୁ। ଆମେ ମଧ୍ୟ ଆଶା କରୁଛୁ କାନାଡା ଆମର କୂଟନୀତିଜ୍ଞଙ୍କ ପ୍ରତି ସମାନ ସମ୍ବେଦନଶୀଳତା ଦେଖାଇବ।
ବାଗ୍ଚି କହିଛନ୍ତି, କାନାଡାରେ ଭାରତୀୟ କୂଟନୀତିଜ୍ଞଙ୍କ ତୁଳନାରେ ଭାରତରେ ଅଧିକ କାନାଡିୟ କୂଟନୀତିଜ୍ଞ ଅଛନ୍ତି। ଏଭଳି ପରିସ୍ଥିତିରେ ଦୁଇ ଦେଶ ମଧ୍ୟରେ ସଂଖ୍ୟା ସମାନ ହେବା ଉଚିତ୍। ସେ ଆହୁରି କହିଛନ୍ତି, ଆମେ ଆଶା କରୁଛୁ କାନାଡା ଆମ ଦେଶରେ ଆତଙ୍କବାଦ ଉପରେ ଏବଂ ଦେଶରେ ଭାରତ ବିରୋଧୀ କାର୍ଯ୍ୟକଳାପ ସହ ଜଡିତ ଆମର ଚିନ୍ତାଧାରାକୁ ଦୂର କରିବ।