ରାଜକୋଟ,୧୯।୧୧: ରାଜକୋଟରେ ଖେଳାଯାଇଥିବା ତୃତୀୟ ତଥା ଅନ୍ତିମ ଅନଅଫିସିଆଲ୍ ଦିନିକିଆ ମ୍ୟାଚରେ ଦକ୍ଷିଣ ଆଫ୍ରିକା ‘ଏ’ ଦଳ ଭାରତ ‘ଏ’କୁ ୭୩ ରନରେ ପରାସ୍ତ କରି ସାନ୍ତ୍ୱନାମୂଳକ ବିଜୟ ହାସଲ କରିଛି। ତେବେ ପୂର୍ବରୁ ଦୁଇଟି ମ୍ୟାଚ୍ ଜିତି ସାରିଥିବା ଭାରତ ‘ଏ’ ଦଳ ୨-୧ରେ ସିରିଜ୍ ଜିତିବାରେ ସଫଳ ହୋଇଛି।
ଟସ୍ ଜିତି ଭାରତ ‘ଏ’ ଅଧିନାୟକ ତିଳକ ବର୍ମା ବୋଲିଂ କରିବାକୁ ନିଷ୍ପତ୍ତି ନେଇଥିଲେ। ଦକ୍ଷିଣ ଆଫ୍ରିକା ‘ଏ’ ପାଇଁ ଓପନର ଲୁଆନ୍-ଡ୍ରେ ପ୍ରିଟୋରିଅସ୍ ଓ ରିଭାଲ୍ଡୋ ମୁନସାମୀ ଚମତ୍କାର ଶତକ ହାସଲ କରିଥିଲେ। ପ୍ରିଟୋରିଅସ୍ ୧୨୩ ଏବଂ ମୁନ୍ସାମୀ ୧୦୭ ରନ୍ କରିବା ସହ ପ୍ରଥମ ୱିକେଟ୍ ପାଇଁ ୨୪୩ ରନର ଭାଗିଦାରୀ କରିଥିଲେ। ଫଳରେ ଦକ୍ଷିଣ ଆଫ୍ରିକା ‘ଏ’ ନିର୍ଦ୍ଧାରିତ ଓଭରରେ ୬ ୱିକେଟ୍ ହରାଇ ୩୨୫ ରନ୍ ସଂଗ୍ରହ କରିଥିଲା।
୩୨୬ ରନର ବିଜୟ ଲକ୍ଷ୍ୟକୁ ପିଛା କରି ଭାରତ ‘ଏ’ ଦଳ ୨୫୨ ରନରେ ଅଲ୍-ଆଉଟ୍ ହୋଇଯାଇଥିଲା। ଆୟୁଷ ବଦୋନୀ ଓ ଇଶାନ କିଷନ ଅର୍ଦ୍ଧଶତକ (କ୍ରମଶଃ ୬୬ ଓ ୫୩ ରନ୍) କରି ଦଳକୁ ଆଶା ଦେଇଥିଲେ। ଉଭୟ ପଞ୍ଚମ ୱିକେଟ୍ ପାଇଁ ୮୮ ରନ୍ ଯୋଡ଼ିଥିଲେ ମଧ୍ୟ, ମାତ୍ର ପାଞ୍ଚ ଓଭର ବ୍ୟବଧାନରେ ଦୁହେଁ ଆଉଟ୍ ହୋଇଯିବାରୁ ଭାରତ ‘ଏ’ ଦଳର ବ୍ୟାଟିଂ ବିପର୍ଯ୍ୟୟ ଘଟିଥିଲା।
ଏହି ମ୍ୟାଚ୍ ହାରିବା ସତ୍ତ୍ୱେ, ପ୍ରଥମ ଦୁଇଟି ମ୍ୟାଚ୍ ଜିତିଥିବାରୁ ଭାରତ ‘ଏ’ ଦଳ ୩ ମ୍ୟାଚ୍ ବିଶିଷ୍ଟ ଅନଅଫିସିଆଲ୍ ଦିନିକିଆ ସିରିଜକୁ ୨-୧ରେ ନିଜ ନାଁରେ କରିଛି।
