ନୂଆଦିଲ୍ଲୀ,୬।୮: ସ୍ବାଧୀନତା ଦିବସ ତଥା ଅଗଷ୍ଟ ୧୫ ପୂର୍ବରୁ ରାଜଧାନୀ ଦିଲ୍ଲୀର ଲାଲ କିଲ୍ଲାର ଚାରିପାଖରେ ସୁରକ୍ଷା ବ୍ୟବସ୍ଥା ବଢ଼ାଇ ଦିଆଯାଇଛି। ଦିଲ୍ଲୀ ରାଜରାସ୍ତାରେ ଏବେ ବି କୃଷକଙ୍କ ଆନ୍ଦୋଳନ ଜାରି ରହିଛି। ଏଭଳି ସ୍ଥିତିରେ ଜାନୁଆରୀ ୨୬ରେ ହୋଇଥିବା ହିଂସାକୁ ଦୃଷ୍ଟିରେ ରଖି ଚଳିତ ଥର ଦିଲ୍ଲୀ ପୋଲିସ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ଇତିମଧ୍ୟରେ ଲାଲ କିଲ୍ଲା ପାଖରେ ବଡ଼ ବଡ଼ କଣ୍ଟେନର୍ସ ଲଗାଯାଇଥିବା ଦେଖିବାକୁ ମିଳିଛି। ଲାଲ କିଲ୍ଲାର ମେନ ଗେଟ୍ରେ ଏହି କଣ୍ଟେନର୍ସ ଲଗାଯାଇଛି। କାରଣ ଯଦି କୌଣସି ବିକ୍ଷୋଭ ପ୍ରର୍ଦଶନକାରୀ ପୋଲିସର ଚକ୍ରବ୍ୟୁହକୁ ଭାଙ୍ଗି ଆସନ୍ତି, ତେବେ ସେମାନେ ଏହି କଣ୍ଟେନର୍ସକୁ ପାର କରିଯାଇପାରିବେ ନାହିଁ। ଗୋଇନ୍ଦା ବିଭାଗରୁ କ୍ରମାଗତ ଭାବେ ମିଳୁଥିବା ସୂଚନା ଅନୁସାରେ ଅଗଷ୍ଟ ୧୫ରେ ପ୍ରଦର୍ଶନକାରୀମାନେ ଗଣ୍ଡୋଗଳ କରିବା ସହ ଲାଲ କିଲ୍ଲାରେ ବିରୋଧ ପ୍ରଦର୍ଶନ କରିପାରନ୍ତି। ତେଣୁ ପୂର୍ବରୁ ଆଗୁଆ ପଦକ୍ଷେପ ଗ୍ରହଣ କରାଯାଇଛି। ସୂଚନାଯୋଗ୍ୟ, ପ୍ରତି ଅଗଷ୍ଟ ୧୫ରେ ପ୍ରଧାନମନ୍ତ୍ରୀ ଲାଲ କିଲ୍ଲାରେ ପତାକା ଉତ୍ତୋଳନ କରିଥାନ୍ତି। କରୋନା ସଙ୍କଟ ଯୋଗୁ ଚଳିତ ଥର ବହୁ କମ୍ ଲୋକଙ୍କୁ ଦର୍ଶକ ଗ୍ୟାଲେରୀରେ ସ୍ଥାନ ମିଳିପାରେ। କିନ୍ତୁ ଏହାସତ୍ତ୍ୱେ ସୁରକ୍ଷା ବ୍ୟବସ୍ଥାକୁ କଡ଼ା କରାଯିବା ସହ ପ୍ରତ୍ୟେକ ସ୍ଥାନରେ ସୁରକ୍ଷାକର୍ମୀଙ୍କୁ ନିୟୋଜିତ କରାଯାଇଛି। ଅନ୍ୟପଟେ ଚଳିତ ଥର ଏଭଳି କଡା ସୁରକ୍ଷା ବ୍ୟବସ୍ଥା ହେବାର ମୁଖ୍ୟ କାରଣ କୃଷକ ଆନ୍ଦୋଳନକୁ କୁହାଯାଉଛି। କାରଣ କୃଷି ଆଇନକୁ ବିରୋଧ କରୁଥିବା କୃଷକମାନେ ଗତ ଏକ ବର୍ଷ ଧରି ଦିଲ୍ଲୀ ସୀମାରେ ଆନ୍ଦୋଳନ କରିଆସୁଛନ୍ତି। ବର୍ତ୍ତମାନ ସଂସଦର ଅଧିବେଶନ ସମୟରେ ବି ସେମାନେ ଜନ୍ତର ମନ୍ତ୍ରରେ ପ୍ରଦର୍ଶନ କରୁଛନ୍ତି।
