ଖୋର୍ଦ୍ଧା ଅଫିସ,୧୮ା୧୧: ରାଜଧାନୀ ଭୁବନେଶ୍ୱରରେ ଘରୋଇ ରାଷ୍ଟ୍ରଦ୍ୟୋଗ ଅଧୀନରେ ଦୀର୍ଘ ୧୪ବର୍ଷ ଧରି ଟେକ୍ନିସିଆନ ଭାବେ କାର୍ଯ୍ୟରତ କର୍ମଚାରୀଙ୍କୁ ଛଟେଇ ପ୍ରତିବାଦରେ କେନ୍ଦ୍ରୀୟ ଶ୍ରମିକ ସଙ୍ଗଠନ ସହଅନୁବନ୍ଧିତ ଅଲ ଓଡ଼ିଶା ଭାରତୀ ଇନଫାଟେଲ୍ ଟେକ୍ନିସିଆନ୍ ୟୁନିୟନ ପକ୍ଷରୁ ଆସନ୍ତା ୨୧ ଓ ୨୨ତାରିଖରେ କମ୍ପାନୀ କାର୍ଯ୍ୟାଳୟ ଆଗରେ ଅନିର୍ଦ୍ଦିଷ୍ଟ ପର୍ଯ୍ୟନ୍ତ ଧାରଣା ଦିଆଯିବ ବୋଲି ଶୁକ୍ରବାର ୟୁନିୟନ ପକ୍ଷରୁ ଖୋର୍ଦ୍ଧାରେ ଆୟୋଜିତ ଏକ ଖବରଦାତା ସମ୍ମିଳନୀରେ କୁହାଯାଇଛି। ବର୍ଷ ବର୍ଷ ଧରି କମ୍ପାନୀ ଅଧୀନରେ କାର୍ଯ୍ୟରତ କର୍ମଚାରୀଙ୍କୁ ଛଟେଇ କରାଗଲେ ପରିବାର ହଇରାଣ ହେବେ। ବର୍ତ୍ତମାନ ସମୟରେ ଖାଦ୍ୟ, ବାସଗୃହ ଏବଂ ଅନ୍ୟାନ୍ୟ ଅତ୍ୟାବଶ୍ୟକ ସହ ଟେଲିକମ୍ ମଧ୍ୟ ଏକ ଜରୁରିକାଳୀନ ସେବା ବୋଲି କମ୍ପାନୀ କହୁଥିବା ବେଳେ କର୍ମଚାରୀଙ୍କୁ ଅଗଣତାନ୍ତ୍ରିକ ଭାବେ ଛଟେଇ କେତେଦୂର ଯୁକ୍ତିଯୁକ୍ତ ବୋଲି ପ୍ରଶ୍ନ କରିଛନ୍ତି। ଏହି କମ୍ପାନୀ ଅଧୀନରେ ୪୨୪ ଜଣ ଟେକ୍ନିିସିଆନ ପ୍ରାକୃତିକ ବିପର୍ଯ୍ୟୟ, ପ୍ରତିକୂଳ ପରିସ୍ଥିତିର ସମ୍ମୁଖୀନ ହୋଇ ସେବା ଯୋଗାଇ ଆସୁଛନ୍ତିି। ନେଟଓ୍ବର୍କ ସମସ୍ୟା ନେଇ ବିିଭିନ୍ନ ସମୟରେ ଗ୍ରାହକ କର୍ମଚାରୀଙ୍କୁ ଗାଳିଗୁଳଜ କରୁଥିବା ବେଳେ ଏମାନେ ବିଭିନ୍ନ ସମସ୍ୟା ଦେଇ ଗତି କରୁଛନ୍ତି;ଯାହା ଲୋକଲୋଚନକୁ ଆସି ନ ଥାଏ। କମ୍ପାନୀ ଅଧୀନରେ କାର୍ଯ୍ୟରତ ଟେକ୍ନିସିଆନଙ୍କୁ ସ୍ଥାୟୀ ନିଯୁକ୍ତି, କାମ ଅନୁସାରେ ଦରମା, ବିନା କାରଣରେ ଦିଆଯାଉଥିବା କାରଣ ଦର୍ଶାଅ ନୋଟିସ, ବଦଳି, ବହିଷ୍କୃତ ଆଦି ଆଦେଶକୁ ପ୍ରତ୍ୟାହାର କରାଯାଉ। କିଛି ମାସ ପୂର୍ବେ ଚାକିରିରୁ ବିଦା କରାଯାଇଥିବା ଦୁଇ ଜଣ କର୍ମଚାରୀଙ୍କୁ ପୁନଃ ନିଯୁକ୍ତି ଲାଗି ଦାବି କରିଛନ୍ତି। ଏହି ସମ୍ମିଳନୀରେ ସଙ୍ଗଠନର ରାଜ୍ୟ ସଭାପତି ଡ.ପୂର୍ଣ୍ଣଚନ୍ଦ୍ର ବେହେରା, କାର୍ଯ୍ୟକାରୀ ସଭାପତି ପ୍ରଦେଶ ନାୟକ, ଉପସଭାପତି ଅଶୋକ କୁମାର, ସାଧାରଣ ସମ୍ପାଦକ ବୁଗୁରୁ ତ୍ରିନାଥ ଓ ସମ୍ପାଦକ ନୀଳେନ୍ଦ୍ରକାନ୍ତ ଆଚାର୍ଯ୍ୟ, ସିଟୁ ସମ୍ପାଦକ ଅଶୋକ ସାହୁ ପ୍ରମୁଖ ଉପସ୍ଥିତ ଥିଲେ।
