ମୁମ୍ବାଇ,୧୫୧୧(ପି.ଟି.): ଦିନିକିଆ କ୍ରିକେଟ ବିଶ୍ୱକପ୍ ଏହାର ଅନ୍ତିମ ଚରଣରେ ପହଞ୍ଚିଛି। ବୁଧବାର ପ୍ରଥମ ସେମିଫାଇନାଲରେ ଆୟୋଜକ ଭାରତ ଓ ନ୍ୟୁଜିଲାଣ୍ଡ ପରସ୍ପର ମୁକାବିଲା କରିବେ। ଚମତ୍କାର ପ୍ରଦର୍ଶନ ଜରିଆରେ ଲିଗ୍ ପର୍ଯ୍ୟାୟରେ ସମସ୍ତ ମ୍ୟାଚ୍ ଜିତି ଭାରତ ସେମିଫାଇନାଲରେ ପ୍ରବେଶ କରିଥିବା ବେଳେ ନ୍ୟୁଜିଲାଣ୍ଡ ମଧ୍ୟ ଲଢୁଆ ପ୍ରଦର୍ଶନ କରିଛି। ଘରୋଇ ଦର୍ଶକଙ୍କ ସମର୍ଥନ ଓ ବର୍ତ୍ତମାନର ଫର୍ମକୁ ଦୃଷ୍ଟିରେ ରଖିଲେ ଭାରତକୁ ଏହି ମ୍ୟାଚ୍ ପାଇଁ ଫେଭରିଟ୍ ଭାବରେ ବିବେଚନା କରାଯିବ।
ତେବେ ଆଇସିସି ଟୁର୍ନାମେଣ୍ଟଗୁଡିକରେ ନ୍ୟୁଜିଲାଣ୍ଡ ବିପକ୍ଷରେ ଭାରତର ରେକର୍ଡ ସାମାନ୍ୟ ଚିନ୍ତାଜନକ। ଭାରତ ଚତୁର୍ଥ ଥର ପାଇଁ ବିଶ୍ୱକପ୍ ଫାଇନାଲରେ ପ୍ରବେଶ କରିବାକୁ ଲକ୍ଷ୍ୟ ରଖିଛି। ଏହାପୂର୍ବରୁ ଦଳ ୧୯୮୩, ୨୦୦୩ ଓ ୨୦୧୧ରେ ବିଶ୍ୱକପ୍ ଫାଇନାଲରେ ପ୍ରବେଶ କରିସାରିଛି। ୨୦୧୯ରେ ଦିନିକିଆ ବିଶ୍ୱକପ୍ ସେମିଫାଇନାଲ ଓ ୨୦୨୧ ବିଶ୍ୱ ଟେଷ୍ଟ ଚାମ୍ପିୟନଶିପ୍ରେ ଭାରତର ପରାଜୟକୁ ଫ୍ୟାନ୍ମାନେ ଏଯାଏ ଭୁଲିନାହାନ୍ତି। ତେବେ ଚଳିତ ବର୍ଷ ଭାରତୀୟ ଦଳ ଚମତ୍କାର ପ୍ରଦର୍ଶନ କରିଛି। ବ୍ୟାଟିଂ, ବୋଲିଂ ଓ ଫିଲ୍ଡିଂ ସବୁଥିରେ ଭାରତ ଅନ୍ୟ ଦଳମାନଙ୍କୁ ଢେର ପଛରେ ଛାଡିଛି। ତେବେ ବୁଧବାର ଓ୍ବାଙ୍ଖଡେ ଷ୍ଟାଡିୟମରେ କୌଣସି ବି ଭୁଲ ଭାରତୀୟ ଫ୍ୟାନ୍ଙ୍କ ପାଇଁ ଏକ ଜାତୀୟ ବିପର୍ଯ୍ୟୟ ହେବ, ତେଣୁ ଭାରତ ଏହାର ଧ୍ୟାନ ରଖିବ। ଭାରତକୁ ମ୍ୟାଚ୍ ଜିତିବା ସହିତ ୧୪୦ କୋଟି ଭାରତୀୟଙ୍କ ଆଶା ଓ ଭରସାର ଚାପକୁ ମଧ୍ୟ ମୁକାବିଲା କରିବାକୁ ପଡିବ। ଏହି ଚାପରୁ ଉପରକୁ ଉଠି ଭାରତୀୟ ଦଳକୁ ପ୍ରଦର୍ଶନ କରିବାକୁ ପଡିବ।
ଅଧିନାୟକ ରୋହିତ ଶର୍ମା ଓ କୋଚ୍ ରାହୁଲ ଡ୍ରାଭିଡ୍ କ୍ରିକେଟର ଦୁଇ ଭିନ୍ନ ବ୍ୟକ୍ତିତ୍ୱ। ତେବେ କେଉଁଭଳି ଚାପର ମୁକାବିଲା କରି ଶାନ୍ତ ରହିବାକୁ ହୁଏ ଉଭୟ ଏହି କଳାରେ ମାହିର। ଏହି ପଡିଆରେ ରନ୍ର ପିଛା କରିବା କଷ୍ଟସାଧ୍ୟ ହେଉଥିବା ବେଳେ ଭାରତୀୟ ଫ୍ୟାନ୍ମାନେ ରୋହିତ ଶର୍ମା ଟସ୍ ଜିତିବା ନେଇ ଆଶା କରିବେ। ଦ୍ୱିତୀୟ ବ୍ୟାଟିଂ କରିବା ସମୟରେ ଲାଇଟ୍ ଆଗରେ ବଲ୍ ଅଧିକ ସୁଇଂ ହୋଇଥାଏ, ଯେଉଁ କାରଣରୁ ଅନେକ ବ୍ୟାଟିଂ ବିପର୍ଯ୍ୟୟ ଘଟିଥାଏ। ଉଭୟ ଦଳରେ ବିପର୍ଯ୍ୟୟ ସୃଷ୍ଟିକାରୀ ବୋଲର ରହିଥିବା ବେଳେ ଯେଉଁ ଦଳ ଟସ୍ ଜିତିବ ତାହା ପ୍ରଥମେ ବ୍ୟାଟିଂ ନେବାକୁ ପ୍ରୟାସ କରିବ। ଭାରତୀୟ ଦଳର ଓପନର ନିର୍ଭୀକତାର ସହ ଆକ୍ରମଣାତ୍ମକ ବ୍ୟାଟିଂ କରୁଛନ୍ତି। ରୋହିତ ଶର୍ମା ଏହି ଟୁର୍ନାମେଣ୍ଟରେ ୫୦୩ ରନ୍ ସ୍କୋର କରିଥିବା ବେଳେ ଶୁବମନ୍ ଗିଲ୍ ୨୭୦ ରନ୍ କରିଛନ୍ତି। ବ୍ଲାକ୍କ୍ୟାପ୍ ଦଳ ବିପକ୍ଷରେ ମଧ୍ୟ ଉଭୟ ସମାନ ରଣନୀତିର ସହ ଓହ୍ଲାଇପାରନ୍ତି।
୫୯୩ ରନ୍ କରିଥିବା ବିରାଟ କୋହଲି ଟୁର୍ନାମେଣ୍ଟର ସର୍ବାଧିକ ସ୍କୋରର ରହିଛନ୍ତି। ଐତିହାସିକ ୫୦ତମ ଶତକରୁ ଗୋଟିଏ ପାଦ ଦୂରରେ ରହିଥିବା ବିରାଟ ଭାରତର ବିଜୟରେ ଏହି ଶତକ ସ୍କୋର କରିବାକୁ ଆଶା କରିବେ। ଅନ୍ୟପକ୍ଷରେ ୨୦୧୫ ଓ ୨୦୧୯ ଦିନିକିଆ ବିଶ୍ୱକପ୍ ସେମିରେ ଭାରତ ପରାଜିତ ହୋଇଥିବା ବେଳେ ଚଳିତ ବର୍ଷ ଏହାକୁ ଏଡାଇବାକୁ ପ୍ରୟାସ କରିବେ କୋହଲି। ମିଡିଲ ଅର୍ଡରରେ ଲୋକେଶ ରାହୁଲ ଓ ଶ୍ରେୟସ୍ ଆୟର ଫର୍ମକୁ ଫେରିବା ଭାରତ ପାଇଁ ଶୁଭ ସଙ୍କେତ। ଅନ୍ୟତମ ବ୍ୟାଟର ସୂର୍ଯ୍ୟକୁମାର ଯାଦବଙ୍କ ବ୍ୟାଟରୁ କିଛି ରନ୍ ଆଶା କରିବେ ଫ୍ୟାନ୍। ଭାରତୀୟ ବୋଲିଂରେ ଯଶପ୍ରୀତ୍ ବୁମ୍ରା ଓ କୁଲ୍ଦୀପ ଯାଦବ ନିୟମିତ ଭଲ ପ୍ରଦର୍ଶନ କରିଛନ୍ତି ଏହା ନିଃସନ୍ଦେହ। ତେବେ ମହମ୍ମଦ ଶାମି ଓ ମହମ୍ମଦ ସିରାଜ୍ ଲାଇମ୍ ଲାଇଟ୍ ନିଜ ଉପରକୁ ନେବାରେ ସମର୍ଥ ହୋଇଛନ୍ତି। ଭାରତର ବୋଲିଂ ଆକ୍ରମଣ ଚଳିତ ବିଶ୍ୱକପ୍ରେ ଯେଉଁଭଳି ସଫଳତା ପାଇଛି ତାହା ଅନ୍ୟ କୌଣସି ଦଳ ପାଇପାରି ନାହିଁ।
ନ୍ୟୁଜିଲାଣ୍ଡର ବୋଲିଂ ଆକ୍ରମଣ ମଧ୍ୟ ସମପରିମାଣରେ ଶକ୍ତିଶାଳୀ। ଟ୍ରେଣ୍ଟ ବୋଲ୍ଟ, ଟିମ୍ ସାଉଦି ଓ ଲୋକି ଫର୍ଗୁସନଙ୍କ ସହିତ ବାମହାତୀ ସ୍ପିନର ମିଚେଲ ସାଣ୍ଟନର ଦଳକୁ ଶକ୍ତିଶାଳୀ କରୁଥିଲେ ମଧ୍ୟ ଦଳର ପଞ୍ଚମ ବୋଲର ସମସ୍ୟା ରହିଛି। ବ୍ୟାଟିଂରେ ରାଚିନ୍ ରବୀନ୍ଦ୍ରଙ୍କୁ ଟୁର୍ନାମେଣ୍ଟର ଆବିଷ୍କାର ବୋଲି କୁହାଯାଉଛି। ଦୁଇଟି ଶତକ ସହ ସେ ୫୬୫ ରନ୍ ସ୍କୋର କରିଛନ୍ତି। ତେବେ ଅନ୍ୟତମ ଓପନର ଡେଭନ୍ କନ୍ଓ୍ବେ କିନ୍ତୁ ଫର୍ମରେ ନାହାନ୍ତି। ପ୍ରଥମ ମ୍ୟାଚରେ ଇଂଲଣ୍ଡ ବିପକ୍ଷରେ ୧୫୨* ରନ୍ର ଇନିଂସ ଖେଳିବା ପରେ ତାଙ୍କ ବ୍ୟାଟ ନୀରବ ରହିଛି। ମଧ୍ୟକ୍ରମର ଭାର ଅଧିନାୟକ କେନ୍ ଓ୍ବିଲିୟମସନ୍ ଓ ଡାରିଲ୍ ମିଚେଲ୍ଙ୍କ ଉପରେ ରହିଛି। କାଗଜକଲମରେ ଭାରତୀୟ ଦଳ ଅଧିକ ଶକ୍ତିଶାଳୀ ରହିଥିଲେ ମଧ୍ୟ ନ୍ୟୁଜିଲାଣ୍ଡ ଦଳ ପଛରେ ନାହିଁ।
