ନୂଆଦିଲ୍ଲୀ,୧୮।୧: ଭାରତ ବିପକ୍ଷ ଟି -୨୦ ସିରିଜରେ ଆଫଗାନିସ୍ତାନକୁ ୩-୦ ପରାଜୟର ସମ୍ମୁଖୀନ ହେବାକୁ ପଡିଛି। ଆଫଗାନିସ୍ତାନ ହାରିଥିଲେ ମଧ୍ୟ ସେମାନେ ପୂରା ସିରିଜରେ ଭଲ ପ୍ରଦର୍ଶନ କରିଛନ୍ତି। ଦଳର ଅଧିନାୟକ ଇବ୍ରାହିମ ଜାଦ୍ରାନ ମଧ୍ୟ ଏଥିରେ ଖୁସି ଅଛନ୍ତି। ତୃତୀୟ ଟି -୨୦ ମ୍ୟାଚରେ ଆଫଗାନିସ୍ତାନ ଭାରତକୁ ସହଜରେ ଜିତିବାକୁ ଦେଇ ନ ଥିଲା। ପ୍ରଥମେ ମ୍ୟାଚ ଟାଏ ହୋଇଥିଲା ଏବଂ ଏହା ପରେ ସୁପର ଓଭର ମଧ୍ୟ ଟାଏ ହୋଇଥିଲା। ଫଳରେ ଦ୍ୱିତୀୟ ସୁପର ଓଭରରେ ଟିମ ଇଣ୍ଡିଆ ଜିତିଥିଲା। ଏହି ମ୍ୟାଚ ସମ୍ପର୍କରେ ଜାଦ୍ରାନ ନିଜର ପ୍ରତିକ୍ରିୟା ପ୍ରକାଶ କରିଛନ୍ତି।
ମ୍ୟାଚ ପରେ ଜାଦ୍ରାନ କହିଛନ୍ତି କି ତାଙ୍କ ଦଳ ପରାଜିତ ପରେ ମଧ୍ୟ ସେ କାହିଁକି ଖୁସି ଅଛନ୍ତି। ସେ କହିଛନ୍ତି, ମୁଁ ଆମର ପ୍ରଦର୍ଶନ ଯୋଗୁ ଖୁସି। ଆମେ ଭଲ ଖେଳିଛୁ, କିନ୍ତୁ ସୁପରରେ ହାରିବା ଦୁର୍ଭାଗ୍ୟଜନକ ଥିଲା। ଏହି ସିରିଜରୁ ଆମେ ବହୁତ କିଛି ଶିଖିବାକୁ ପାଇଛୁ ଏବଂ ଆମ ପାଇଁ ବହୁତ ସକାରାତ୍ମକ ଥିଲା । ଏଠାରେ ଆମର ଅଭିଜ୍ଞତା ଟି -୨୦ ବିଶ୍ୱକପ୍ରେ ଉପଯୋଗୀ ହେବ। ଆମର ଖେଳାଳିମାନେ ଗତ ତିନୋଟି ମ୍ୟାଚରେ ସର୍ବୋତ୍ତମ ପ୍ରଦର୍ଶନ କରିଛନ୍ତି।
ପ୍ରଥମ ସୁପର ଓଭରରେ ଗୋଟିଏ ଉଇକେଟ୍ ହରାଇବା ପରେ ଆଫଗାନିସ୍ତାନ ୧୬ ରନ୍ ସଂଗ୍ରହ କରିଥିଲା। ଏହାର ଜବାବରେ ଟିମ ଇଣ୍ଡିଆ ମଧ୍ୟ ୧୬ ରନ୍ କରିଥିଲା। ଏହା ପରେ ଦ୍ୱିତୀୟ ଓଭରରେ ୧ ଉଇକେଟ୍ ହରାଇବା ପରେ ଭାରତ ୧୧ ରନ୍ ସଂଗ୍ରହ କରିଥିଲା। ହେଲେ ଏହାର ଜବାବରେ ଆଫଗାନିସ୍ତାନ ଦଳ ମାତ୍ର ୧ରନ ସ୍କୋର କରିପାରିଥିଲା। ଏହିପରି ଟିମ ଇଣ୍ଡିଆ ବେଙ୍ଗାଲୁରୁରେ ଏକ ରୋମାଞ୍ଚକର ବିଜୟ ପଞ୍ଜିକରଣ କଲା।
