ବ୍ୟାଙ୍କକ୍,୧୫।୨: କଲମ୍ବୋରେ ଭାରତ ଓ ପାକିସ୍ତାନ ମଧ୍ୟରେ ହେବାକୁ ଥିବା ହାଇଭୋଲଟେଜ୍ ପୁରୁଷ ଟି-୨୦ ବିଶ୍ଵକପ୍ ମ୍ୟାଚ୍ ପୂର୍ବରୁ, ବ୍ୟାଙ୍କକରେ ଭାରତୀୟ ମହିଳା ‘ଏ’ ଦଳ ପାକିସ୍ତାନକୁ ମାତ୍ ଦେଇଛି। ‘ମହିଳା ଏସିଆ କପ୍ ରାଇଜିଂ ଷ୍ଟାର୍ସ’ର ଏକ ଗୁୁରୁତ୍ଵପୂର୍ଣ୍ଣ ମୁକାବିଲାରେ ଭାରତୀୟ ମହିଳା ଦଳ ପାକିସ୍ତାନକୁ ୮ ୱିକେଟରେ ପରାସ୍ତ କରି ନିଜର ବିଜୟ ଅଭିଯାନ ଆରମ୍ଭ କରିଛି।
ୟୁଏଇ (UAE) ନିକଟରୁ ପ୍ରଥମ ମ୍ୟାଚରେ ପରାଜୟ ପରେ ଚାପରେ ଥିବା ଭାରତୀୟ ଦଳ ଏହି ମ୍ୟାଚରେ ଚମତ୍କାର ପ୍ରତ୍ୟାବର୍ତ୍ତନ କରିଛି। ପ୍ରଥମେ ବୋଲିଂ ଏବଂ ପରେ ଦମଦାର ବ୍ୟାଟିଂ ବଳରେ ଭାରତ ଏହି ଏକପାଖିଆ ବିଜୟ ହାସଲ କରିଛି।
ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିବା ପାକିସ୍ତାନ ଦଳ ଭାରତୀୟ ବୋଲରଙ୍କ ସାମ୍ନାରେ ଆତ୍ମସମର୍ପଣ କରିଥିଲା। ରାଧା ଯାଦବ (୨/୧୧), ସାଇମା ଠାକୋର (୨/୧୪) ଏବଂ ପ୍ରେମା ରାୱତଙ୍କ (୨/୧୬) ଘାତକ ବୋଲିଂ ଯୋଗୁଁ ପାକିସ୍ତାନ ୧୮.୫ ଓଭରରେ ମାତ୍ର ୯୩ ରନ କରି ଅଲଆଉଟ୍ ହୋଇଯାଇଥିଲା। ପାକିସ୍ତାନ ପକ୍ଷରୁ ଶାୱାଲ ଜୁଲଫିକର ସର୍ବାଧିକ ୨୩ ରନ କରିଥିବା ବେଳେ ଗୁଲ୍ ରୁଖ୍ ୨୧ ରନ ସଂଗ୍ରହ କରିଥିଲେ।
୯୪ ରନର ସହଜ ଲକ୍ଷ୍ୟକୁ ପିଛା କରି ଭାରତୀୟ ଦଳ ମାତ୍ର ୧୦.୧ ଓଭରରେ ୨ଟି ୱିକେଟ୍ ହରାଇ ବିଜୟ ହାସଲ କରିଥିଲା। ପ୍ରଥମ ବଲରେ ହୁମାଇରା କାଜିଙ୍କ ୱିକେଟ୍ ହରାଇଥିଲେ ମଧ୍ୟ ଓପନର୍ ବୃନ୍ଦା ଦିନେଶ ବିସ୍ଫୋରକ ବ୍ୟାଟିଂ କରି ପାକିସ୍ତାନୀ ବୋଲରଙ୍କୁ ନାକେଦମ କରିଥିଲେ। ବୃନ୍ଦା ମାତ୍ର ୨୯ଟି ବଲରୁ ୧୨ଟି ଚୌକା ସହାୟତାରେ ଅପରାଜିତ ୫୫ ରନର ମ୍ୟାଚ୍ ବିଜୟୀ ଇନିଂସ ଖେଳିଥିଲେ। ତାଙ୍କୁ ଅନୁଷ୍କା ଶର୍ମା (୨୪ ରନ) ଭରପୂର ସହଯୋଗ କରିଥିଲେ। ଏହି ବୃହତ ବିଜୟ ସହ ଭାରତୀୟ ଦଳ ନିଜର ରନ-ରେଟରେ ସୁଧାର ଆଣିବା ସହ ସେମିଫାଇନାଲ ଦୌଡ଼ରେ ନିଜକୁ ବଜାୟ ରଖିଛି। ଅନ୍ୟପଟେ ପାକିସ୍ତାନ ଦଳ ପଏଣ୍ଟ ଟେବୁଲର ତୃତୀୟ ସ୍ଥାନକୁ ଖସିଯାଇ ବିପଦରେ ପଡ଼ିଛି।
