ଲାଞ୍ଜିଗଡ,୧୯।।୧୧(ଡି.ଏନ.ଏ.): କଳାହାଣ୍ଡି ଜିଲା ଲାଞ୍ଜିଗଡ ବ୍ଲକ ମୁଖ୍ୟାଳୟ ବିଶ୍ୱନାଥପୁରଠାରେ ବିଭିନ୍ନ ପଞ୍ଚାୟତର ବୁଢ଼ାବୁଢ଼ୀ ଭିନ୍ନକ୍ଷମ ସଙ୍ଗଠନ ପକ୍ଷରୁ ଭତ୍ତା ବୃଦ୍ଧି ନେଇ ବ୍ଲକ ଅଫିସ ଘେରାଉ କରାଯାଇଛି। ସରକାରଙ୍କ ମଧୁବାବୁ ପେନସନ ଯୋଜନାରେ ଭତ୍ତା ବୃଦ୍ଧି ନେଇ ବାରମ୍ବାର ପ୍ରଶାସନକୁ ଜଣାଇଥିଲେ ମଧ୍ୟ କର୍ଣ୍ଣପାତ କରି ନ ଥିଲେ। ବ୍ଲକର ୨୬ଟି ପଞ୍ଚାୟତରୁ ଶତାଧିକ ଭିନ୍ନକ୍ଷମ ଓ ବୁଢାବୁଢ଼ୀମାନେ ଏକତ୍ରିତ ହୋଇ ବିଶନାଥପୁର କଲେଜ ଛକଠାରୁ ଏକ ଶୋଭାଯାତ୍ରାରେ ବାହାରି ବ୍ଲକ ସମୁଖରେ ବିକ୍ଷୋଭ ପ୍ରଦର୍ଶନ କରିବାସହ ଧାରଣା ଦେଇଥିଲେ। ସରକାର ସମସ୍ତ ସୁବିଧା ସୁଯୋଗ ଯୋଗାଇ ଥିବା କହିଛନ୍ତି, ହେଲେ ଭିନ୍ନକ୍ଷମ ଓ ବୁଢ଼ାବୁଢ଼ୀଙ୍କୁ ଅଣଦେଖା କରୁଛନ୍ତି ବୋଲି ପ୍ରଶ୍ନ କରିଥିଲେ। ମନ୍ତ୍ରୀ ଏବଂ ବିଧାୟକମାନେ ଲକ୍ଷ ଲକ୍ଷ ଟଙ୍କା ଭତ୍ତା ନେଉଛନ୍ତି ଓ ତାଙ୍କ ଭତ୍ତା ବୃଦ୍ଧି ଦାବି କରିଛନ୍ତି। ହେଲେ ଯେଉଁମାନଙ୍କ ଭୋଟ ପାଇଁ ଆଜି ନେତା ମନ୍ତ୍ରୀ ହେଇଛନ୍ତି ସେହି ବୁଢା ବୁଢ଼ୀଙ୍କୁ ସରକାର ଅଣଦେଖା କରୁଛନ୍ତି। ଅନ୍ୟ ରାଜ୍ୟ ତୁଳନାରେ ଆମ ରାଜ୍ୟରେ ସବୁଠାରୁ କମ ଭତ୍ତା ମିଳୁଥିବା କହିଥିଲେ। ଦୁର୍ଗମ ଅଞ୍ଚଳରେ ବ୍ୟାଙ୍କକୁ ଯାଇପାରୁ ନାହାନ୍ତି ଭିନ୍ନକ୍ଷମ ଓ ବୃଦ୍ଧବୃଦ୍ଧା। ବ୍ୟାଙ୍କ ଯିବାକୁ ଦୂର ହେଉଛି ଏବଂ ଖର୍ଚ୍ଚାନ୍ତ ମଧ୍ୟ ହେଉଛି। ଏଥିପାଇଁ ୫୦୦ରୁ ୧୫୦୦କୁ ବୃଦ୍ଧି କରିବା ପାଇଁ ସେମାନେ ଦାବି କରିଛନ୍ତି। ଲାଞ୍ଜିଗଡ଼ ବ୍ଲକ କାର୍ଯ୍ୟାଳୟ ସମୁଖରେ ଦୀର୍ଘ ସମୟ ଧରି ବିକ୍ଷୋଭ ଓ ଧାରଣା ଦେବା ପରେ ମଧ୍ୟ ବ୍ଲକ ପ୍ରଶାସନ ମଧ୍ୟରୁ କୌଣସି କର୍ମଚାରୀ କିମ୍ବା ବିଡିଓ ସେମାନଙ୍କ ପାଖକୁ ଦାବିପତ୍ର ନେବା ପାଇଁ ଆସି ନ ଥିଲେ। ଏହାକୁ ନେଇ ସେମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା। ବିଶନାଥପୁର ମୁଖ୍ୟ ରାସ୍ତା ଅବରୋଧ କରିଥିଲେ। ଫଳରେ ଏକ ଘଣ୍ଟା ଯାତାୟାତ ବନ୍ଦ ରହିଥିଲା। ବିଡିଓ ଜିତେନ୍ଦ୍ର କୁମାର ମିଶ୍ର ଧାରଣାସ୍ଥଳକୁ ଆସି ଦାବିପତ୍ର ଗ୍ରହଣ କରିଥିଲେ। ଭିନ୍ନକ୍ଷମ ଓ ବୁଢାବୁଢ଼ୀ ସଙ୍ଗଠନ ଆବାହକ ବ୍ରିଟିଶ କୁମାରଙ୍କ ନେତୃତ୍ୱରେ ଲିଙ୍ଗରାଜ ଆଜାଦ, ସତ୍ୟ ମାହାର, ବୈଦ୍ୟନାଥ ନାଏକ, ରାଜ କିଶୋର ଦୁଲହରି, ଉପେନ୍ଦ୍ର ଦ୍ରାବିଡ଼, କୁଞ୍ଜ ମାଝି, ବନ ମାଝି, ଲୋକନାଥ ମାଝି, ବିକାଶ ମାଝି, ସୀତା ମାଝି, ମାଧବ ନାଏକ, ଗୈରାଙ୍ଗ ନାଏକ, ଜ୍ୟୋତ୍ସା ମାଝି ପ୍ରମୁଖ ଆନ୍ଦୋଳନରେ ସାମିଲ ହୋଇଥିଲୋ।
