ନୂଆଦିଲ୍ଲୀ,୨୧।୧୧: ସରକାରୀ କର୍ମଚାରୀମାନଙ୍କର ବୟସସୀମା ବୃଦ୍ଧି କରିବା ପାଇଁ ନିଷ୍ପତ୍ତି ନେଇଛନ୍ତି କେନ୍ଦ୍ର ସରକାର । ଏଣିକି ୬୦ ବର୍ଷରେ କର୍ମଚାରୀଙ୍କୁ ମିଳିବନି ଅବସର । ଚାକିରି କ୍ଷେତ୍ରରେ କେନ୍ଦ୍ର ସରକାରୀ କର୍ମଚାରୀଙ୍କ ବୟସସୀମା ଆଉ ୨ ବର୍ଷ ବୃଦ୍ଧି କରାଇବାକୁ ସରକାର ଯୋଜନା କରୁଛନ୍ତି । ଏଣିକି କର୍ମଚାରୀ ୬୦ ବର୍ଷ ବଦଳରେ ୬୨ ବର୍ଷ ବୟସରେ ଅବସର ଗ୍ରହଣ କରିବେ । ଆସନ୍ତାବର୍ଷ ଏପ୍ରିଲ ମାସରୁ ଏହି ନୂଆ ନିୟମ ଲାଗୁ ହେବ ବୋଲି କୁହାଯାଉଛି । ଏ ନେଇ କ୍ୟାବିନେଟ ବୈଠକର ଏକ ଚିଠି ସୋସିଆଲ ମିଡିଆ ଭାଇରାଲ ହେଉଛି ।
ସୂଚନା ଅନୁସାରେ, କେନ୍ଦ୍ର କର୍ମଚାରୀଙ୍କ ଚାକିରି ବୟସକୁ ୨ ବର୍ଷ ବୃଦ୍ଧି କରାଇବାକୁ କେନ୍ଦ୍ର ସରକାର ନିଷ୍ପତ୍ତି ନେଉଛନ୍ତି । ଏ ନେଇ କ୍ୟାବିନେଟ ବୈଠକରେ ମଞ୍ଜୁରୀ ମିଳିଥିବା ଏକ ଲେଟର ବର୍ତ୍ତମାନ ଭାଇରାଲ ହେଉଛି । ଏଥିରେ କୁହାଯାଇଛି ଯେ, ଏହି ଯୋଜନାକୁ ‘ରିଟାୟାରମେଣ୍ଟ ଆୟୁ ବୃଦ୍ଧି ଯୋଜନା’ ନାମ ରଖାଯାଇଛି । ଏହି ଯୋଜନାରେ ୨୦୨୫ ଏପ୍ରିଲ ମାସରୁ ଅବସର ବୟସରେ ୨ ବର୍ଷ ବୃଦ୍ଧି ହେବ ବୋଲି କୁହାଯାଇଛି । ଏଣିକି ୬୦ ବର୍ଷ ପରିବର୍ତ୍ତେ ୬୨ ବର୍ଷ ବୟସରେ ଅବସର ନେବେ କର୍ମଚାରୀ । ଏହା ସମସ୍ତ କେନ୍ଦ୍ର କର୍ମଚାରୀଙ୍କ ପାଇଁ ଲାଗୁ ହେବ ବୋଲି ଏହି ଭାଇରାଲ ଲେଟରରେ ଦେଖିବାକୁ ମିଳିଛି । କିନ୍ତୁ ପ୍ରକୃତ କଥା ହେଉଛି ଭାଇରାଲ ହେଉଥିବା ଲେଟର ହେଉଛି ସମ୍ପୂର୍ଣ୍ଣ ମିଛ ଓ ଗୁଜବ ।
ଏହି ଯୋଜନା ଏବଂ ଏହି ଖବରକୁ ମିଛ ଏବଂ ଗୁଜବ ବୋଲି କହିଛି ପ୍ରେସ ଇନଫରମେସନ ବ୍ୟୁରୋ । ସୋସିଆଲ ମିଡିଆରେ କରାଯାଉଥିବା ଏହି ଦାବି ଭିତ୍ତିହୀନ । ଭାରତ ସରକାର ଏଭଳି କୌଣସି ନିଷ୍ପତ୍ତି ନେଇନାହାନ୍ତି । ବର୍ତ୍ତମାନ ସୁଦ୍ଧା କର୍ମଚାରୀଙ୍କ ଅବସର ବୟସ ୬୦ ବର୍ଷ ରହିଛି । ଭାଇରାଲ ହେଉଥିବା ଏହି ତଥ୍ୟ ସମ୍ପୂର୍ଣ୍ଣ ମିଛ ଏବଂ ଗୁଜବ ବୋଲି ପିଆଇବି ପକ୍ଷରୁ ସ୍ପଷ୍ଟ ହୋଇଛି ।
