ଭୁବନେଶ୍ୱର,୨୪।୧(ଅନୁରାଧା ମହାରଣା): ସୁନା ଓ ରୁପା ଉପରେ ଆମଦାନୀ ଶୁଳ୍କ(ଇମ୍ପୋର୍ଟ ଡ୍ୟୁଟି) ଉପରେ ସରକାର ଏକ ବଡ଼ ଘୋଷଣା କରିଛନ୍ତି। ଅର୍ଥ ମନ୍ତ୍ରଣାଳୟ ସୁନା, ରୁପା ଏବଂ ମୂଲ୍ୟବାନ୍ ଧାତୁ ମୁଦ୍ରା ଉପରେ ଆମଦାନୀ ଶୁଳ୍କକୁ ୧୦ ପ୍ରତିଶତରୁ ୧୫ ପ୍ରତିଶତକୁ ବୃଦ୍ଧି କରିଛି। ଏଥିପାଇଁ ସରକାର ଏକ ବିଜ୍ଞପ୍ତି ଜାରି କରିଛନ୍ତି। ବିଜ୍ଞପ୍ତି ଅନୁଯାୟୀ ସୁନା, ରୁପା ଧାତୁ ଏବଂ ମୂଲ୍ୟବାନ୍ ଧାତୁ ମୁଦ୍ରା ଉପରେ ଆମଦାନୀ ଶୁଳ୍କ ୧୫ ପ୍ରତିଶତ ହେବ। ଏଥିରେ ୧୦ ପ୍ରତିଶତ ବେସିକ୍ କଷ୍ଟମ ଡ୍ୟୁଟି (ବିସିଡି) ଏବଂ ୫ ପ୍ରତିଶତ କୃଷି ଭିତ୍ତିଭୂମି ବିକାଶ ସେସ୍ (ଏଆଇଡିସି) ଅନ୍ତର୍ଭୁକ୍ତ। ସୋସିଆଲ୍ ଓ୍ବେଲଫେୟାର ସରଚାର୍ଜ (ଏସ୍ଡବ୍ଲ୍ୟୁସି)କୁ ଏଥିରୁ ବାଦ୍ ଦିଆଯାଇଛି। ସୁନା, ରୁପା ଭଳି ମୂଲ୍ୟବାନ୍ ଧାତୁର ମୁଦ୍ରା ଉପରେ ମଧ୍ୟ ମନ୍ତ୍ରଣାଳୟ ଆମଦାନୀ ଶୁଳ୍କ ବୃଦ୍ଧି କରିଛି। ବେସିକ୍ କଷ୍ଟମ ଡ୍ୟୁଟି (ବିସିଡି) ଏବଂ ଏସ୍ଡବ୍ଲ୍ୟୁଏସ୍ ଛାଡ଼ କରାଯାଇଥିବାବେଳେ ୪.୩୫ ପ୍ରତିଶତ ଏଆଇଡିସି ସହ ଶୁଳ୍କ ୧୪.୩୫ ପ୍ରତିଶତକୁ ବୃଦ୍ଧି କରାଯାଇଛି। ବିଜ୍ଞପ୍ତି ଅନୁଯାୟୀ, ଜାନୁଆରୀ ୨୨ରୁ ନୂତନ ହାର କାର୍ଯ୍ୟକାରୀ ହୋଇଛି। ମାତ୍ର ସାଧାରଣ ବଜେଟ ପୂର୍ବରୁ ଜେମସ୍ ଆଣ୍ଡ ଜୁଏଲେରି ଏକ୍ସପୋର୍ଟ ପ୍ରମୋଶନ କାଉନସିଲ୍ (ଜିଜେଇପିସି) ସୁନା ଏବଂ ହୀରା (କଟ୍ ଏବଂ ପଲିସ) ଉପରେ ଆମଦାନୀ ଶୁଳ୍କ ହ୍ରାସ କରିବାକୁ ସରକାରଙ୍କୁ ଅନୁରୋଧ କରିଛି। ଜିଜେଇପିସି ମୂଲ୍ୟବାନ୍ ଧାତୁ ଉପରେ ଆମଦାନୀ ଶୁଳ୍କକୁ ବର୍ତ୍ତମାନର ୧୫ ପ୍ରତିଶତରୁ ୪ ପ୍ରତିଶତ ହ୍ରାସ କରିବାକୁ ଦାବି କରୁଛି। ଏଥିରେ ସିପିଡି ଉପରେ କଷ୍ଟମ ଡ୍ୟୁଟି ବର୍ତ୍ତମାନର ୫ ପ୍ରତିଶତରୁ ୨.୫ ପ୍ରତିଶତକୁ ହ୍ରାସ କରିବାକୁ ଦାବି ହୋଇଛି।
