ନୂଆଗାଁ, ୫।୫ (ଡି.ଏନ.ଏ.):ନୟାଗଡ଼ ଜିଲା ନୂଆଗାଁ ବ୍ଲକ ଗୁମୀ ପଞ୍ଚାୟତରେ ଥିବା ଡିମିରିପଲ୍ଲୀ ସରକାରୀ ଉଚ୍ଚ ବିଦ୍ୟାଳୟ (ଅନୁସୂଚିତ ଜାତି ଓ ଅନୁସୂଚିତ ଜନଜାତି ଉନ୍ନୟନ ବିଭାଗ) ଓ ଖଣ୍ଡୁଗାଁ ସରକାରୀ ଉନ୍ନିତ ଉଚ୍ଚ ବିଦ୍ୟାଳୟ ୫-ଟି ଯୋଜନାରେ ରୂପାନ୍ତରଣ ହୋଇଛି। ଡିମିରିପଲି ସରକାରୀ ଉଚ୍ଚ ବିଦ୍ୟାଳୟର ରୂପାନ୍ତରଣ କାର୍ଯ୍ୟ ସମ୍ପୂର୍ଣ୍ଣ ହୋଇ ନ ଥିଲେ ମଧ୍ୟ ଅଧପନ୍ତରିଆ କାର୍ଯ୍ୟରେ ମୁଖ୍ୟମନ୍ତ୍ରୀ ମଙ୍ଗଳବାର ଲୋକର୍ପଣ କରିଛନ୍ତି।
ଅନୁସୂଚିତ ଜାତି ଓ ଅନୁସୂଚିତ ଜନଜାତିର ଛାତ୍ରୀଛାତ୍ରଙ୍କ ଅଧ୍ୟୟନ ପାଇଁ ଡିମିରିପଲ୍ଲୀଠାରେ ୧୯୫୬ ମସିହାରେ ସ୍କୁଲ ପ୍ରତିଷ୍ଠା କରାଯାଇଛି। ଯେଉଁ ସ୍କୁଲରେ ଜିଲା ତଥା ଜିଲା ବାହାରୁ ଅନେକ ଛାତ୍ର ହଷ୍ଟେଲରେ ରହି ପାଠ ପଢନ୍ତି। ଉକ୍ତ ସ୍କୁଲଟି ନୂଆଗାଁଠାରୁ ବାହାଡ଼ାଝୋଲା ଦେଇ ଓଡ଼ଗାଁ ଯାଇଥିବା ରାସ୍ତା କଡ଼ରେ ଅବସ୍ଥିତ। ଦୂରଦୂରନ୍ତ ଜିଲା ବାହାରୁ ଛାତ୍ରମାନେ ଆସି ରହୁଥିବାବେଳେ କୌଣସି ଛାତ୍ରଙ୍କ ସୁବିଧା ଅସୁବିଧା ହେଲେ କିମ୍ବା ରୋଗରେ ପଡ଼ିଲେ କାହା ସହ ଯୋଗାଯୋଗ କରିବାକୁ ମୋବାଇଲ ନେଟଓ୍ବାର୍କ ନାହିଁ। ଛାତ୍ରୀଛାତ୍ରମାନଙ୍କୁ ନୂତନ ଜ୍ଞାନକୌଶଳ ତଥା ଡିଜିଟାଲ ଶିକ୍ଷା ଦେବା ଚଳିତବର୍ଷ ଡିମିରିପଲ୍ଲୀ ସରକାରୀ ଉଚ୍ଚବିଦ୍ୟାଳୟକୁ ୫-ଟି ଯୋଜନାରେ ରୂପାନ୍ତରଣ କରି ୫୦ ଲକ୍ଷରୁ ଊର୍ଦ୍ଧ୍ୱ ଟଙ୍କା ବ୍ୟୟ କରାଯାଇଛି। ସେଥିପାଇଁ ସ୍ମାର୍ଟ କ୍ଲାସ୍ରୁମରେ ଏଲଇଡି ଲଗାଯିବା ସହ ୧୦ଟି କମ୍ପ୍ୟୁଟର ରହିଛି। ତେବେ ନେଟଓ୍ବାର୍କ ନ ଥିଲେ ଛାତ୍ରୀଛାତ୍ର କିଭଳି ଡିଜିଟାଲ ମାଧ୍ୟମରେ ପାଠ ପଢ଼ିବେ ତାହା ବଡ଼ ପ୍ରଶ୍ନବାଚୀ ସୃଷ୍ଟି କରିଛି। ଛାତ୍ରୀଛାତ୍ରମାନଙ୍କ ପାଇଁ ଖେଳ ସାମଗ୍ରୀ ଦିଆଯାଇଥିଲେ ମଧ୍ୟ ନିୟମିତ ଖେଳ ଶିକ୍ଷକ ନାହାନ୍ତି। ବିଜ୍ଞାନ ପାଠ ପଢ଼ାଇବା ପାଇଁ ହାଇସ୍କୁଲରେ ବିଜ୍ଞାନ ଶିକ୍ଷକଙ୍କ ଅଭାବ ରହିଛି। ରୂପାନ୍ତରଣ କାର୍ଯ୍ୟ ପାଇଁ ଅନେକ ଅର୍ଥ ବ୍ୟୟ କରାଯାଇଥିଲେ ମଧ୍ୟ ନିମ୍ନମାନର କାର୍ଯ୍ୟ କରାଯାଇଛି। ଫଳରେ ଉଦ୍ଘାଟନ ହେବା ପୂର୍ବରୁ ପାଚେରୀ ଫାଟି ଅଁା କଲାଣି। ଅଦ୍ୟାବଧି ଗେଟ୍, ଶୌଚାଳୟ, ପାଚେରୀ ନିର୍ମାଣ ଅସମ୍ପୂର୍ଣ୍ଣ ହୋଇଥିଲେ ମଧ୍ୟ ତରବରିଆ ଭାବେ ଉଦ୍ଘାଟନ କରି ଦିଆଯାଇଛି। ଏ ସମ୍ପର୍କରେ ନୂଆଗାଁ ବିଡିଓ ସଚ୍ଚିଦାନନ୍ଦ ମିଶ୍ରଙ୍କୁ ପଚାରିବାରେ ଏଠି ଯୋଗ ଦେବା ପୂର୍ବରୁ କାର୍ଯ୍ୟ ଚାଲୁ ରହିଥିଲା। ତେଣୁ ଏ ବିଷୟରେ ଯନ୍ତ୍ରୀଙ୍କ ସହ କଥା ହେବା ପରେ କହିବି ବୋଲି ସେ କହିଛନ୍ତି।
