ଲାଞ୍ଜିଗଡ଼, ୫ା୮(ରମେଶ ଚନ୍ଦ୍ର ନାୟକ): କଳାହାଣ୍ଡି ଜିଲା ଲାଞ୍ଜିଗଡ଼ ବ୍ଲକ ବିଶ୍ୱନାଥପୁର ଥାନା ଅନ୍ତର୍ଗତ କାଣ୍ଡାମା ଗାଁର ବୃଦ୍ଧ ରଘୁ ପାତ୍ର ନିଖୋଜର ୬ଦିନ ପରେ ମୃତଦେହକୁ ପୋଲିସ ଜବତ କରି ସନ୍ଦେହରେ ୪ଜଣଙ୍କୁ ଅଟକ ରଖିଥିବା ବେଳେ ମଙ୍ଗଳବାର ୨ ଅଭିଯୁକ୍ତଙ୍କୁ ଗିରଫ କରିଛି। ସେମାନେ ହେଲେ ନରେଶ ଦୋରା (୩୦) ଓ ପ୍ରଦୀପ ନାଏକ (୩୦)। ଏ ନେଇ ଥାନାରେ ଏକ ମାମଲା (ନଂ.୫୩/୨୫) ରୁଜୁ କରାଯାଇ ଅଭିଯୁକ୍ତ ଦ୍ୱୟଙ୍କୁ କୋର୍ଟ ଚାଲାଣ କରାଯାଇଛି। ଗୁଣିଗାରେଡି ସନ୍ଦେହରେ ହତ୍ୟାକାଣ୍ଡ ଘଟିଥିବା ଥାନା ଅଧିକାରୀ ତୁଳସୀରାମ ଶବର ପ୍ରକାଶ କରିଛନ୍ତି। ସୂଚନାନୁସାରେ ଗତ ୩୦ ତାରିଖରେ ରଘୁ ନିକଟସ୍ଥ ବଣ୍ଡେଲ ଗ୍ରାମକୁ ଯାଇ ଘରକୁ ନ ଫେରି ନ ଥିଲେ। ଖୋଜାଖୋଜି କରି ନ ପାଇବାରୁ ୩୧ରେ ରଘୁଙ୍କ ପୁଅ ମୁରଲୀ ଥାନାରେ ଲିଖିତ ଅଭିଯୋଗ କରିଥିଲେ। ଥାନାଧିକାରୀ ଶବରଙ୍କ କହିବା ଅନୁଯାୟୀ, ତଦନ୍ତ ପରେ ଉକ୍ତ ଗ୍ରାମର ସୁଶାନ୍ତ ହରିଜନ(୨୫), ନରେଶ ଦୋରା (୩୦), ଓ ପ୍ରଦୀପ ନାଏକ(୩୦)ଙ୍କୁ ଥାନାକୁ ଆଣି ପଚରାଉଚୁରା କରିଥିଲୁ। ଅଭିଯୁକ୍ତ ନରେଶର ବାପା ଦୁଃଶାସନଙ୍କ ମାସେ ତଳେ ମୃତ୍ୟୁ ଘଟିଥିଲା। ରଘୁ ତାଙ୍କୁ ଗୁଣି କରି ମାରିଥିବା ନରେଶଙ୍କ ପରିବାର ସନ୍ଦେହ କରୁଥିଲେ। ସେଇଦିନଠୁ ସେ ରଘୁଙ୍କ ଉପରେ ରାଗ ରଖିଥିଲେ। କେରଳରୁ ସେ ଗାଁକୁ ଫେରିବା ପରେ ୩୦ ତାରିଖ ସାରେ ରଘୁ ନିକଟସ୍ଥ ବଣ୍ଡେଲ ଗାଁରୁ ଫେରୁଥିବା ବେଳେ ନିଛାଟିଆ ସ୍ଥାନରେ ଆକ୍ରମଣ କରି ହତ୍ୟା କରିଥିଲେ। ତିନିଜଣଙ୍କୁ ଜେରା କରିବା ପରେ ରଘୁଙ୍କୁ ମାରି ବାଇକ୍ ଯୋଗେ ନେଇ ରାୟଗଡା ଜିଲା ଆମ୍ବାଦୋଳାଠାରୁ ଦହିଖାଲକୁ ସଂଯୋଗ କରୁଥିବା ମଞ୍ଜୁରକୁପା ନିକଟ ରେଳଧାରଣାରେ ଫୋପାଡିଥିବା ସ୍ବୀକାର କରିଥିଲେ। ୩୧ରେ ଆମ୍ବାଦୋଳା ରେଳବାଇ ପୋଲିସ ଅଜଣା ବୃଦ୍ଧଙ୍କ ମୃତଦେହ ଜବତ କରି ରାୟଗଡା ଡାକ୍ତରଖାନାକୁ ନେଇଥିଲା। ସୋମବାର ବିଶ୍ୱନାଥପୁର ପୋଲିସ ଆମ୍ବାଦୋଳା ରେଳବାଇ ପୋଲିସ ସହ ଯୋଗାଯୋଗ କରି ପରିବାର ଲୋକଙ୍କ ସହିତ ରାୟଗଡ଼ା ଯାଇ ମୃତଦେହ ଜବତ କରିବା ସହିତ ପରିବାର ବର୍ଗଙ୍କୁ ହସ୍ତାନ୍ତର କରିଥିଲା।
