କେନ୍ଦୁଝର,୨୦ା୨(ସ୍ବ.ପ୍ର.): କାରରେ ନାବାଳିକାଙ୍କୁ ବଳାତ୍କାର ଉଦ୍ୟମ ଘଟଣାରେ ଶ୍ରମ ବିଭାଗ ପକ୍ଷରୁ ଠିକାଦାର ଅକ୍ଷୟ ପଣ୍ଡାଙ୍କୁ ନୋଟିସ୍ କରାଯାଇଛି। ଚିଠି ନଂ. ୪୨୧/୨୦୨୩ରେ ତାଙ୍କ ବିରୋଧରେ କାହିଁକି ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରା ନ ଯିବ ସେ ନେଇ ମାର୍ଚ୍ଚ ୧୮ ସୁଦ୍ଧା କାରଣ ଦର୍ଶାଇବାକୁ କୁହାଯାଇଛି।
ପ୍ରକାଶ ଯେ, ଗତ ୧୨ ତାରିଖ ରାତିରେ ଠିକାଦାର କାରରେ ଜଣେ ନାବାଳିକାକୁ ନେଇ କବିତ୍ରା ଗ୍ରାମ ନିକଟ ଜାତୀୟ ରାଜପଥ ୪୯ ରାସ୍ତାରେ ବଳାତ୍କାର ଉଦ୍ୟମ କରୁଥିଲେ। ସ୍ଥାନୀୟ ଲୋକଙ୍କ ହାବୁଡ଼ରେ ଧରାପଡ଼ିବା ପରେ ପୋଲିସ ଗିରଫ କରିଥିଲା। ସେ ଉକ୍ତ ନାବଳିକାଙ୍କୁ ୨ ବର୍ଷ ହେଲା ଘରୋଇ କାମରେ ନିୟୋଜିତ କରିଥିଲେ। ଏଣୁ ଶିଶୁ ସୁରକ୍ଷା ଆଇନର ଧାରା ୩ ଅନୁଯାୟୀ ବେଆଇନ ଅଟେ। ଏଣୁ ତାଙ୍କୁ ନୋଟିସ ଏଲ୍ଆଇସି କଲୋନୀ ଠିକଣାରେ ପ୍ରେରଣ ହୋଇଛି। ଅନ୍ୟପକ୍ଷେ ଠିକାଦାର ଗିରଫ ହୋଇ କେନ୍ଦୁଝର ଜେଲରେ ରହିଥିବାରୁ ନୋଟିସ୍ର ଉତ୍ତର କିଏ ଦେବ ତାହାକୁ ନେଇ ଚର୍ଚ୍ଚା ହେଉଛି। ପୂର୍ବରୁ ଏହି ଘଟଣାରେ ଓଡ଼ିଶା ରାଜ୍ୟ ଶିଶୁ ଅଧିକାର ସୁରକ୍ଷା ଆୟୋଗଙ୍କ ପକ୍ଷରୁ ମାମଲା ରୁଜୁ ହୋଇଛି। ଚିଠି ନଂ. ୧୯୦/୧୩ ଫେବୃଆରୀ ୨୩ରେ ଧରିତ୍ରୀରେ ପ୍ରକାଶିତ ଖବରକୁ ଭିତ୍ତି କରି ନିଜ ଆଡୁ ଆୟୋଗ ୪୨/୨୦୨୩ରେ ମାମଲା ରୁଜୁ କରିଛନ୍ତି। କେନ୍ଦୁଝର ଏସ୍ପି, ଜିଲା ଶିଶୁ ସୁରକ୍ଷା ଅଧିକାରୀ ଓ ଜିଲା ଶ୍ରମ ଅଧିକାରୀଙ୍କୁ ସବିଶେଷ ରିପୋର୍ଟ ମାଗିଥିଲେ।
