ଇଚ୍ଛାଶକ୍ତି ଥିଲେ ସବୁକିଛି ସମ୍ଭବ। ଏହା ପ୍ରମାଣ କରିଛନ୍ତି ରାଜସ୍ଥାନର ମହିଳା ସରପଞ୍ଚ ନିରୁ ଯାଦବ। ଛାପ୍ରାର ସଲିମପୁର ଗାଁରେ ତାଙ୍କ ଜନ୍ମ। ବିଜ୍ଞାନରେ ସ୍ନାତକୋତ୍ତର ଡିଗ୍ରୀ ହାସଲ କରିଛନ୍ତି। ବିବାହ ପରେ ସେ ଝୁନ୍ଝୁନ୍ ଜିଲା ଲାମ୍ବିଅହିର ଗାଁକୁ ଯିବା ପରେ ୨୦୨୦ରେ ପ୍ରଥମ ମହିଳା ସରପଞ୍ଚ ଭାବେ ନିର୍ବାଚିତ ହୋଇଥିଲେ ।
ସେବେଠାରୁ ସେ ମହିଳା ସଶକ୍ତୀକରଣ ଓ ଗ୍ରାମୀଣ ବିକାଶ କ୍ଷେତ୍ରରେ ନୂତନ ଦୃଷ୍ଟିକୋଣ ଆପଣାଇ ଏକ ଉଦାହରଣ ସୃଷ୍ଟି କରିପାରିଛନ୍ତି। ନିରୁ ଗ୍ରାମୀଣ ଝିଅମାନଙ୍କୁ ହକି ପ୍ରଶିକ୍ଷଣର ବ୍ୟବସ୍ଥା କରି ଜଣେ କୋଚ୍ଙ୍କୁ ସବୈତନିକ ନିଯୁକ୍ତି ଦେଇଛନ୍ତି। ଏ ବାବଦରେ ସେ ତାଙ୍କ ଭତ୍ତାକୁ ଖର୍ଚ୍ଚ କରିବା ସହ ବିଭିିନ୍ନ ଦିଗରୁ ପାଣ୍ଠି ସଂଗ୍ରହ କରି ଆଗେଇ ନେଉଛନ୍ତି। ଏଠାରୁ ଝିଅମାନେ ବ୍ଲକ୍ ଓ ଜିଲାସ୍ତରୀୟ ଟୁର୍ନାମେଣ୍ଟରେ ପ୍ରତିନିଧିତ୍ୱ କରିସାରିଲେଣି ଓ ଜାତୀୟ ସ୍ତରର ଟୁର୍ନାମେଣ୍ଟରେ ଭାଗ ନେବା ଲାଗି ପ୍ରସ୍ତୁତି ଚଳାଇଛନ୍ତି। କୃଷକ ଉତ୍ପାଦକ ସଂଗଠନ ଆରମ୍ଭ କରି କୃଷକମାନଙ୍କୁ ରିହାତିରେ ସାର, ବିହନ ଓ ଆନୁଷଙ୍ଗିକ କୃଷି ଉପକରଣ ଯୋଗାଇ ଦେଉଛନ୍ତି। ଏହାସହ ସ୍ଥାନୀୟ ସରକାରୀ ସ୍କୁଲଗୁଡ଼ିକର ଡିଜିଟାଇଜେଶନ କରୁଛନ୍ତି। ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ ସହଭାଗିତାରେ ଗାଁଗୁଡ଼ିକରେ ଆର୍ଥିକ ସମାବେଶୀ କାର୍ଯ୍ୟକ୍ରମ ଚଳାଉଛନ୍ତି। ଏଭଳି ବହୁମୁଖୀ କାର୍ଯ୍ୟକ୍ରମ ପାଇଁ ନିରୁଙ୍କୁ ଜାତୀୟ ତଥା ଅନ୍ତର୍ଜାତୀୟ ସ୍ତରରେ ସମ୍ମାନିତ କରାଯାଇଛି।
