ୟୁପିଏସ୍ସି ପରୀକ୍ଷାରେ ସଫଳ ହୋଇ ନ ପାରିଲେ ଭିନ୍ନକ୍ଷମମାନଙ୍କ ପାଇଁ ଏ କ୍ଷେତ୍ରରେ ସାହାରା ପାଲଟିଛନ୍ତି କେରଳର ଜୋବିନ ଏସ୍ କୋଟାରାମ। ଜୋବିନଙ୍କ ବୟସ ୪୧। ଚାଙ୍ଗାନାସେରି ସହରରେ ଜନ୍ମିତ ଜୋବିନ ୨୦୧୦ରେ ସିଭିଲ ସର୍ଭିସ ପରୀକ୍ଷାରେ ଅକୃତକାର୍ଯ୍ୟ ହେବା ପରେ ଅନ୍ୟ ଆଶାୟୀମାନଙ୍କୁ କୋଚିଂ ଦେବା ଲାଗି ନିଷ୍ପତ୍ତି ନେଇଥିଲେ। ପରେ ୨୦୧୯ରେ ସେ କୋଚି, କୋଝିକୋଡେ ଏବଂ ଥିରୁଭାନନ୍ତପୁରମରେ ଅଫ୍ଲାଇନ କୋଚିଂ ସେଣ୍ଟର ଖୋଲିଥିଲେ। ପରେ ଭିନ୍ନକ୍ଷମଙ୍କୁ ୟୁପିଏସ୍ସି ପାଇଁ ପ୍ରସ୍ତୁତ କରିବାକୁ ଜୋବିନ ୨୦୨୧ରେ ଚିତ୍ରାସାଲାଭମ୍ (ପ୍ରଜାପତି) ପ୍ରୋଜେକ୍ଟ ଆରମ୍ଭ କରି ଚଳାଉଛନ୍ତି। ଭିନ୍ନକ୍ଷମ (ଶରୀରର କୌଣସି ଏକ ଅଙ୍ଗ କାମ କରୁ ନ ଥିବା)ଙ୍କୁ ମାଗଣାରେ କୋଚିଂ ଦେଉଛନ୍ତି। ଅଧିକାଂଶ ଭିନ୍ନକ୍ଷମ ହ୍ବିଲ ଚେୟାରରେ ଆସି କୋଚିଂ ନେଉଛନ୍ତି। ପ୍ରାୟ ୧୦୦ ଜଣ ଭିନ୍ନକ୍ଷମ ଏହି ପ୍ରୋଜେକ୍ଟ ମାଧ୍ୟମରେ କୋଚିଂ ନେଉଛନ୍ତି। ଏଥିରେ ଅନ୍ଲାଇନ ଓ ଅଫ୍ଲାଇନ ସୁବିଧା ଉପଲବ୍ଧ ହେଉଛି। ସବୁଠୁ ବଡ଼କଥା ହେଉଛି ୟୁପିଏସ୍ସି କୋଚିଂ ଲାଗି ୧,୧୦,୦୦୦ ଟଙ୍କା ଦେବାକୁ ପଡ଼ୁଥିବାବେଳେ ଜୋବିନ ଆଶାୟୀମାନଙ୍କୁ ସମ୍ପୂର୍ଣ୍ଣ ମାଗଣାରେ କୋଚିଂ ଦେବା ବ୍ୟବସ୍ଥା କରିଛନ୍ତି। ତେବେ ୟୁପିଏସ୍ସିର ବିଭିନ୍ନ ପରୀକ୍ଷାରେ ଏବେ ସୁଦ୍ଧା ୪୧ ଜଣ ବିଭିନ୍ନ ସର୍ଭିସରେ ନିଯୁକ୍ତି ପାଇସାରିଲେଣି।
