ନାଁ ରୁହାନି ବର୍ମା। ବୟସ ୧୮। ସେ ଏହି ବୟସରେ ଆର୍କିଟେକ୍ ଶ୍ରୀଧର ରାଓଙ୍କ ସହ ମିଶି ଏକ କାର୍ବନ ନିର୍ଗମନ ଶୂନ୍ୟ ଶୌଚାଳୟ ନିର୍ମାଣ କରି ଉଦାହରଣ ସୃଷ୍ଟି କରିଛନ୍ତି। ବଡ଼ କଥା ହେଉଛି, ରୁହାନି ଏହି ଶୌଚାଳୟକୁ କେବଳ ପ୍ଲାଷ୍ଟିକ ବର୍ଜ୍ୟରେ ନିର୍ମାଣ କରିଛନ୍ତି। ସେ ୪ ଲକ୍ଷ ଏକକ ବ୍ୟବହାରଯୋଗ୍ୟ ପ୍ଲାଷ୍ଟିକ୍ ବ୍ୟାଗ୍ରୁ ୧୦୦୦ ଟାଇଲ ତିଆରି କରି ଶୌଚାଳୟରେ ଲଗାଇଛନ୍ତି। ରୁହାନି ଉକ୍ତ ଶୌଚାଳୟକୁ ଅମୃତସର ଅନ୍ତରାଷ୍ଟ୍ରୀୟ ବିମାନ ବନ୍ଦର ପାର୍କିଂ ସ୍ଥଳରେ ରଖିଛନ୍ତି। ରୁହାନି ଜୟପୁରର ଜୟଶ୍ରୀ ପୋରିବାଲ ଇଣ୍ଟରନ୍ୟାଶନାଲ ସ୍କୁଲରେ ପଢୁଛନ୍ତି। ସ୍କୁଲରେ ଇକୋ ପ୍ରୋଜେକ୍ଟରୁ ଏକ ପରିବେଶ ଉପଯୋଗୀ ଟଏଲେଟ ନିର୍ମାଣ କରିବାର ପ୍ରେରଣା ମିଳିଥିଲା। ଏଥିପାଇଁ ସେ ଛୁଟିରେ ଏକ ଆର୍କିଟେକ୍ଚର ଫାର୍ମରେ ଇଣ୍ଟର୍ନଶିପ୍ କରିବା ପରେ ଆର୍କିଟେକ୍ ଶ୍ରୀଧର ରାଓଙ୍କ ସହଯୋଗରେ କାର୍ଯ୍ୟ ଆରମ୍ଭ କରି ଏହି ସଫଳତା ପାଇଛନ୍ତି। ଏଭଳି ଶୌଚାଳୟ ଅଧିକ ସଂଖ୍ୟାରେ ନିର୍ମାଣ କରାଯାଇପାରିଲେ ଉଭୟ ବର୍ଜ୍ୟ ଓ କାର୍ବନ ନିର୍ଗମନ ସମସ୍ୟାର ସମାଧାନ ହୋଇପାରନ୍ତା ବୋଲି କହନ୍ତି ରୁହାନି।
