ଫାଇନାନ୍ସ ସମ୍ପର୍କରେ ଶିକ୍ଷା କରିବା ଲାଗି ୫ମ ଶ୍ରେଣୀର ପିଲାମାନେ ଏକ ନିଜସ୍ବ ବ୍ୟାଙ୍କ ଚଳାଇବା କିଛି କମ୍ କଥା ନୁହେଁ। ଏଭଳି ଏକ ବ୍ୟାଙ୍କ ଖୋଲାଯାଇଛି କର୍ନାଟକ ମୁଲର୍ର ଏକ ସରକାରୀ ସ୍କୁଲରେ। ଏହି ବ୍ୟାଙ୍କ ସ୍କୁଲ ଶିକ୍ଷକ ସି.ଏସ୍ ସତୀଶ୍ଙ୍କ ଦ୍ୱାରା ଆରମ୍ଭ କରାଯାଇଛି। ଏହାର ନାମ ରଖାଯାଇଛି ବ୍ୟାଙ୍କ ଅଫ୍ ମୁଲର୍। ଏହି ବ୍ୟାଙ୍କରେ ପଞ୍ଚମ ଶ୍ରେଣୀର ୩୭ ପିଲାଙ୍କ ଆକାଉଣ୍ଟ ଖୋଲାଯାଇଛି। ପ୍ରତି ପିଲାଙ୍କର ନିଜସ୍ବ ଲକର ରହିଛି, ଯେଉଁଠି ସେମାନେ ଟଙ୍କା ରଖୁଛନ୍ତି। ସେମାନଙ୍କୁ ହାତତିଆରି ପାସ୍ବୁକ୍ ଦିଆଯାଇଛି। ସେଥିରେ ସଞ୍ଚତ୍ତ ଟଙ୍କାର ପରିମାଣ ଶିକ୍ଷକ ଉଲ୍ଲେଖ କରିଥାଆନ୍ତି। ପିଲାମାନେ ହାତତିଆରି ଚାଲାଣ କିମ୍ବା ଏକ ଚେକ୍ ମାଧ୍ୟମରେ ଟଙ୍କା ଉଠାଇବାର ବ୍ୟବସ୍ଥା ହୋଇଛି। ବ୍ୟାଙ୍କ ଚଳାଇବା ଲାଗି ପିଲାମାନଙ୍କ ମଧ୍ୟରେ ମ୍ୟାନେଜର, ଆକାଉଣ୍ଟାଣ୍ଟ ଏବଂ କ୍ୟାଶିୟର ବି ରହିଛନ୍ତି। ଆକାଉଣ୍ଟରେ ୧୦୦ ଟଙ୍କା ସଞ୍ଚୟ ହେଲେ ପେନ୍ସିଲ, ୨୦୦ ଟଙ୍କା ହେଲେ ପେନ୍, ୩୦୦ ଟଙ୍କାରେ ନୋଟ୍ବୁକ ବୋନସ ଆକାରରେ ପାଉଛନ୍ତି। ୫୦୦ ଟଙ୍କା ସଞ୍ଚୟରେ ସେମାନଙ୍କୁ ୫ ପ୍ରତିଶତ ସୁଧ ଦିଆଯାଉଛି ଏବଂ ୧୦୦୦ ଟଙ୍କା ସଞ୍ଚୟ ହୋଇଗଲେ ସେ ଟଙ୍କା ସେମାନଙ୍କ ପ୍ରକୃତ ବ୍ୟାଙ୍କ ଖାତାକୁ ପଠାଇ ଦିଆଯାଉଛି। ପରେ ପିଲାମାନେ ସେହି ସଞ୍ଚତ୍ତ ଟଙ୍କାକୁ ପାଠ୍ୟ ଉପକରଣ କିଣିିବା, ପିକ୍ନିକ୍ ଯିବା ଆଦିରେ ଖର୍ଚ୍ଚ କରିପାରିବେ ବୋଲି କହିଛନ୍ତି ସତୀଶ୍।
