୧୨ ବର୍ଷ ବୟସରେ ବାହା ହୋଇ ନିଜସ୍ବ ଉଦ୍ୟମରେ ଶିକ୍ଷାଲାଭ କରିବା ସହ ମହିଳାମାନଙ୍କୁ ନେଇ ଗ୍ରାମାଞ୍ଚଳ ନ୍ୟୁଜ୍ ନେଟ୍ଓ୍ବର୍କ ଚଳାଇବା କିଛି କମ୍ କଥା ନୁହେଁ। ଏହି ମହିଳା ଜଣକ ହେଉଛନ୍ତି ଉତ୍ତରପ୍ରଦେଶର କବିତା ଦେବୀ। କୁଞ୍ଜନ ପୁରଓ୍ବା ଗଁାର ଏକ ଦଳିତ କୃଷକ ପରିବାରରେ ତାଙ୍କ ଜନ୍ମ। ବାହାଘର ହେବାବେଳକୁ କବିତା କିଛି ପଢ଼ି ନ ଥିଲେ। ପରେ ତାଙ୍କ ଗଁା ତଥା ଆଖପାଖ ଗଁାର ଝିଅମାନଙ୍କୁ ଶିକ୍ଷା ଦେବା ପାଇଁ ଏକ ଏନ୍ଜିଓ ଶିକ୍ଷାକେନ୍ଦ୍ର ଖୋଲିବା ପରେ ସେ ସେଠାରେ ପଢ଼ିବା ଆରମ୍ଭ କରିଥିଲେ। ପଢ଼ା ଶେଷ କରି ସେହି ଏନ୍ଜିଓ ଦ୍ୱାରା ପ୍ରକାଶ ପାଉଥିବା ‘ମହିଳା ଡକିୟା’ ନ୍ୟୁଜ୍ଲେଟରରେ କାର୍ଯ୍ୟ କଲେ। ଏହା କେବଳ ଗ୍ରାମାଞ୍ଚଳ ଖବର ପ୍ରକାଶ କରୁଥିଲା ଓ ସ୍ଥାନୀୟ ଲୋକମାନଙ୍କର ପ୍ରିୟ ହୋଇ ପାରିଥିଲା କବିତାଙ୍କ ଉଦ୍ୟମରେ। ଏହା କୌଣସି କାରଣରୁ ବନ୍ଦ ହୋଇଯିବା ପରେ ସେ ଦିଲ୍ଲୀସ୍ଥିତ ନିରନ୍ତର ଏନ୍ଜିଓ ସହାୟତାରେ ତାଙ୍କ ଗଁାରେ ‘ଖବର ଲହରିୟା’ ଆରମ୍ଭ କରିଛନ୍ତି। ଏଥିରେ ୩୦ ଜଣ ମହିଳାଙ୍କୁ ନିଯୁକ୍ତି ଦେଇଛନ୍ତି। ଏମାନେ ସମସ୍ତେ ଆଖପାଖ ଗଁାର ଗରିବ ପରିବାରର ମହିଳା। ଏମାନେ ନ୍ୟୁଜ୍ ରିପୋର୍ଟିଂ କରିବା ସହ ଡିଜିଟାଲ କାର୍ଯ୍ୟ କରୁଛନ୍ତି। ସ୍ଥାନୀୟ ଖବର ସହ ରାଜ୍ୟ, ଦେଶ ବିଦେଶର ନ୍ୟୁଜ୍ ବି ସ୍ଥାନିତ କରୁଛନ୍ତି। ଅନେକ ଡିଜିଟାଲ ପ୍ଲାଟଫର୍ମରେ ‘ଖବର ଲହରିୟା’ର ଫଲୋୟରଙ୍କ ସଂଖ୍ୟା ୧୦ ଲକ୍ଷ ଊର୍ଦ୍ଧ୍ୱରେ ପହଞ୍ଚିଛି। କବିତା ଏକମାତ୍ର ଦଳିତ ମହିଳା ଭାବେ ଏଡିଟର୍ସ ଗୁଲିଡ୍ରେ ସଦସ୍ୟା ରହିଛନ୍ତି।
