ଦିଲ୍ଲୀ-ଏନ୍ସିଆର, ଉତ୍ତରପ୍ରଦେଶ, ହରିୟାଣା ଏବଂ ଗୁଜରାଟର ୨୦ଟି ସରକାରୀ ଓ ୮ଟି ଘରୋଇ ସ୍କୁଲରେ ପିଲାମାନେ ଚାଷକରି ପରିବା ଉତ୍ପାଦନ କରିବାକୁ ସକ୍ଷମ ହୋଇପାରିଛନ୍ତି। ଏହା ସମ୍ଭବ ହୋଇଛି ପ୍ରଗତି ଚାଶ୍ୱାଲଙ୍କ ଅର୍ବାନ ଫାର୍ମିଂ ମିଶନ ଦ୍ୱାରା। ଏବେ ସୁଦ୍ଧା ସେ ୭୮,୦୦୦ ପିଲାଙ୍କୁ ଚାଷ ସମ୍ପର୍କିତ ପ୍ରଶିକ୍ଷଣ ଦେଇସାରିଲେଣି।
ପିଲାଙ୍କୁ ଚାଷ କରିବାରେ ବି ସେ ସହଯୋଗ କରୁଛନ୍ତି। ତାଙ୍କର ଏହି କାର୍ଯ୍ୟକ୍ରମ ଦ୍ୱାରା ପିଲାମାନେ ପୁସ୍ତକ ଜ୍ଞାନ ହାସଲ କରିବା ସହ ପ୍ରକୃତି ସହ ଜଡ଼ିତ ହେଉଛନ୍ତି। ସାରା ଜୀବନ ପାଇଁ ଏକ ଉପଯୋଗୀ ଅଭ୍ୟାସକୁ ଆପଣାଇପାରୁଛନ୍ତି। ଚାଶ୍ୱାଲ ଶୋ ଗୁଡ୍ ଫାଉଣ୍ଡେଶନ ଗଠନ କରି ୨୦୧୭ରୁ ଏହି କାର୍ଯ୍ୟ ଜାରି ରଖିଛନ୍ତି। ୨୦୧୮ରେ ସରକାରୀ ସ୍କୁଲଗୁଡ଼ିକର ଭାଗୀଦାରିରେ ପିଲାଙ୍କ ପାଇଁ ଏକ ସମନ୍ବିତ ପାଠ୍ୟକ୍ରମ ଗଢ଼ିଥିଲେ, ଯେଉଁଥିରେ ସମୟସାରଣୀରେ କୃଷିକୁ ସିଧାସଳଖ ଯୋଡ଼ି ପାରିଥିଲେ। ଶିକ୍ଷକ ଓ ପିଲାମାନେ ସ୍କୁଲରେ ପନିପରିବା ଚାଷ କରୁଛନ୍ତି । ସ୍କୁଲ ଛାତ ଉପରେ ବଗିଚା ମଧ୍ୟ କରୁଛନ୍ତି। ଏହାଦ୍ୱାରା ପିଲାମାନେ ଚାଷ ପଦ୍ଧତି, ସମୟ ଓ ଉତ୍ପାଦନ ସମ୍ପର୍କିତ ଜ୍ଞାନ ପାଉଚନ୍ତି।
