ବିବାହ ପରେ ଝିଅମାନେ ବିଦା ହୋଇ ଶାଶୁଘରକୁ ଯାଇଥାନ୍ତି। ହେଲେ ବାହାବେଦିରୁ ଉଠି ସିଧା କଲେଜକୁ ଯିବା କଥା କେବେ ଶୁଣିଛନ୍ତି! ଏମିତି ଏକ ଭିନ୍ନ ଧରଣର ଦୃଶ୍ୟ ଦେଖିବାକୁ ମିଳିଛି ଝାଡ଼ଖଣ୍ଡରେ। ଏଠାରେ ବେଙ୍ଗାବାଦ ଥାନାର ମୋତିଲେଦା ଅଞ୍ଚଳର ପୂଜା କୁମାରୀ ଦୁଇ ଦିନ ତଳେ ପାଖ ଅଞ୍ଚଳର ବିକାଶ ଯାଦବଙ୍କୁ ବିବାହ କରିଥିଲେ। ସେ ବିଏ ସେମିଷ୍ଟର-୧ର ଛାତ୍ରୀ ଥିଲେ ଓ ବିବାହର ଠିକ୍ ପରଦିନ ତାଙ୍କର ପରୀକ୍ଷା ମଧ୍ୟ ଥିଲା। ଏକଥା ଜାଣିବା ପରେ ଶାଶୁଘର ଲୋକେ ତାଙ୍କୁ ପରୀକ୍ଷା ବନ୍ଦ ନ କରିବା ପାଇଁ କହିଥିଲେ। ପୂଜା ମଧ୍ୟ ପରୀକ୍ଷା ପାଇଁ ସବୁ ପ୍ରସ୍ତୁତି କରିଥିଲେ। ଆଉ ଶାଶୁଘର ଲୋକଙ୍କ ସହାୟତାରେ ତାଙ୍କର ବିବାହ କର୍ମ ସବୁ ରାତିରେ ଶୀଘ୍ର ଶୀଘ୍ର ଶେଷ କରି ଦିଆଯାଇଥିଲା। ଏହାପରେ ସକାଳୁ ସକାଳୁ ଝିଅ ବିଦାବିଧି ମଧ୍ୟ ସମ୍ପନ୍ନ ହୋଇଥିଲା। ତେବେ ବିଦା ହେବା ପରେ ପୂଜା ତାଙ୍କ ନବ ବିବାହିତ ସ୍ବାମୀଙ୍କ ସହିତ ସିଧା ଯାଇଥିଲେ ପରୀକ୍ଷା ହଲ୍କୁ। ନବବଧୂ ବେଶରେ ପରୀକ୍ଷା ହଲ୍ରେ ଅନ୍ୟମାନେ ତାଙ୍କୁ ଦେଖି କିଛି ସମୟ ପାଇଁ ଆଶ୍ଚର୍ଯ୍ୟ ହୋଇଯାଇଥିଲେ, ହେଲେ ପର ମୁହୂର୍ତ୍ତରେ ତାଙ୍କ ଉଦ୍ୟମକୁ ପ୍ରଶଂସା କରିଥିଲେ। ଅନ୍ୟପଟେ ବର ବେଶରେ ପରୀକ୍ଷା ହଲ୍ ବାହାରେ ବିକାଶ ତାଙ୍କ ସ୍ତ୍ରୀଙ୍କ ପାଇଁ ଅପେକ୍ଷା କରି ରହିଥିଲେ ଓ ପରୀକ୍ଷା ସରିବା ପରେ ପୂଜା ତାଙ୍କ ସହ ଶାଶୁଘରକୁ ଯାଇଥିଲେ।
