ଭାରତରେ ଏବେ ଅନେକ ସହରରେ ବାୟୁ ପ୍ରଦୂଷଣ ଅସହ୍ୟ ହୋଇପଡ଼ିଛି। ବିଶେଷକରି ଦିଲ୍ଲୀରେ ବାହାରକୁ ବାହାରିବା ବିପଜ୍ଜନକ ହୋଇଯାଇଛି। ସ୍କୁଲ ବନ୍ଦ କରିବାକୁ ପଡ଼ୁଛି। ଏବେ ବିଶ୍ୱର ସବୁଠୁ ପ୍ରଦୂଷିତ ସହରଗୁଡ଼ିକ ମଧ୍ୟରେ ଭାରତର ପାଖାପାଖି ୪୦ଟି ସହର ଅଛି। ତେବେ ସହରର ପରିବେଶ ସୁରକ୍ଷା ପାଇଁ ଜଙ୍ଗଲ ସୃଷ୍ଟି କରି ରାଧାକ୍ରିଷ୍ଣନ୍ ନାଏର ଉଦାହରଣ ସୃଷ୍ଟି କରିଛନ୍ତି। ସେ ଏବେ ସୁଦ୍ଧା ବିଭନ୍ନ ରାଜ୍ୟର ସହରାଞ୍ଚଳରେ ମିୟାଓ୍ବାକି ପଦ୍ଧତିରେ ୮୦ରୁ ଅଧିକ ଜଙ୍ଗଲ କରିସାରିଲେଣି। ଜାପାନର ବଟାନିଷ୍ଟ ଅକିରା ମିୟାଓ୍ବାକି ଏହି ପଦ୍ଧତିକୁ ପ୍ରଥମେ ସାମ୍ନାକୁ ଆଣିଥିଲେ, ଯେଉଁଥିରେ ସହରାଞ୍ଚଳରେ କମ୍ ଜାଗାରେ ଘଞ୍ଚ ଜଙ୍ଗଲ ସୃଷ୍ଟି କରାଯାଇପାରୁଛି। କେରଳର କସାରଗୁଡରେ ନାଏରଙ୍କ ଜନ୍ମ । ପରେ ପରିବାର ସହ ସେ କର୍ନାଟକ ମାଙ୍ଗାଲୁର ନିକଟସ୍ଥ ଏକ ଗାଁକୁ ଚାଲିଯାଇଥିଲେ। ସେଠାରେ ଶିକ୍ଷା ଶେଷ କରି ମୁମ୍ବାଇରେ ଏକ ଟେକ୍ସଟାଇଲ ଇଣ୍ଡଷ୍ଟ୍ରିରେ କାମ କରିଥିଲେ। ପରେ ପଦୋନ୍ନତି ପାଇ ଗୁଜରାଟର ଉମରଗାଁକୁ ଯାଇଥିଲେ। ସେଠାକାର ପରିବେଶ ପ୍ରଦୂଷଣ ଦେଖି ତାହାର ପ୍ରତିକାର ପାଇଁ ଉପାୟ ଖୋଜିଥିଲେ। ସେଠାରେ ଏକ ଦଶନ୍ଧି କାମ କରିବା ପରେ ଶ୍ରୀ ପୌର୍ଣ୍ଣିକା ଏକ୍ସପୋର୍ଟ ପ୍ରଇଭେଟ ଲିମିଟେଡ ନାମକ କମ୍ପାନୀ ପ୍ରତିଷ୍ଠା କରି ରେଡିମେଡ ଶାର୍ଟ ତିଆରି କରିଥିଲେ। ସେହି ସମୟରେ ଅର୍ଥାତ୍ ୨୦୧୨ରେ ନାଏର ଉମରଗାଁ ରେ ୧ ଏକର ଜମି କିଣି ମିୟାଓ୍ବାକି ପଦ୍ଧତିରେ ୧୫,୦୦୦ ଗଛ ଲଗାଇ ଜଙ୍ଗଲଟିଏ କରିଥିଲେ। ପରେ କଚ୍ଛ ଭୂମିକମ୍ପରେ ମୃତକଙ୍କ ସ୍ମୃତିରେ ସେ ୪ ଲକ୍ଷ ଗଛ ଲଗାଇଛନ୍ତି। ଏହା ବ୍ୟତୀତ ପୁଲଓ୍ବାମା ଶହୀଦଙ୍କ ଉଦ୍ଦେଶ୍ୟରେ ୪୦,୦୦୦ ଗଛ ଲଗାଇଛନ୍ତି। ପରେ ଏକ ଅଳିଆ ଗଦା ହେଉଥିବା ସ୍ଥାନରେ ସମାନ ପ୍ରକାର ଜଙ୍ଗଲ ସୃଷ୍ଟି କରିବା ଲାଗି ମହାରାଷ୍ଟ୍ର ସରକାରଙ୍କୁ ଅନୁରୋଧ କରିଥିଲେ ଓ ସରକାରଙ୍କ ସହଯୋଗରେ ସେଠାରେ ସେ ୩୦,୦୦୦ ଗଛ ଲଗାଇ ଏକ ଘଞ୍ଚ ଜଙ୍ଗଲ କରିପାରିିଥିଲେ। ସେବେଠାରୁ ୧୨ ରାଜ୍ୟରେ ଏଭଳି ଜଙ୍ଗଲ କରିବାରେ ଲାଗିଛନ୍ତି।
