ରସୁଲପୁର,୨୩ା୬(ରଞ୍ଜିତ ରାଉତ): ଯାଜପୁର ଜିଲା ରସୁଲପୁର ବ୍ଲକର ୨୮ ପଞ୍ଚାୟତ ଯାଜପୁର ଜିଲାର ୩ ପ୍ରମୁଖ ନିର୍ବାଚନମଣ୍ଡଳୀ ବରୀ, କୋରେଇ ଓ ଧର୍ମଶାଳାରେ ବାଣ୍ଟି ହୋଇରହିଛି। ଏବେ ବ୍ଲକର ବିଭିନ୍ନ ପଞ୍ଚାୟତରେ ଗୋଷ୍ଠୀ କନ୍ଦଳ ଦେଖାଦେଇଛି। ୨୦୨୪ ନିର୍ବାଚନ ପରେ ବିଧାୟକ ଓ ପଞ୍ଚାୟତ ପ୍ରତିନିଧିଙ୍କ ମଧ୍ୟରେ ଶୀତଳ ଯୁଦ୍ଧ ଆରମ୍ଭ ହୋଇଯାଇଛି। ଅଧିକାଂଶ ପଞ୍ଚାୟତରେ ନବନିର୍ବାଚିତ ବିଧାୟକ ଓ ପଞ୍ଚାୟତ ପ୍ରତିନିଧିଙ୍କ ସମର୍ଥକକୁ ନେଇ ଦୁଇ ଗୋଷ୍ଠୀରେ ବିଭାଜିତ ହୋଇଯାଇଥିବା ଦେଖିବାକୁ ମିଳୁଛି। ଗୋଷ୍ଠୀ କନ୍ଦଳ ଯୋଗୁ ଗାଁର ବିକାଶଧାରା ପ୍ରଭାବିତ ହେବା ଆରମ୍ଭ କଲାଣି।
ସାଧାରଣ ନିର୍ବାଚନ ଫଳ ବିଜେଡି ସପକ୍ଷରେ ଯାଇଥିଲା। ବ୍ଲକରେ ୩ଜଣ ବିଧାୟକ ବିଜେଡିରୁ ନିର୍ବାଚିତ ହୋଇଥିଲେ। ୨୦୨୪ ସାଧାରଣ ନିର୍ବାଚନ ଫଳାଫଳ ଭିନ୍ନ ରହିଛି। ଧର୍ମଶାଳାରେ ସ୍ବାଧୀନ ବିଧାୟକ ହିମାଂଶୁ ଶେଖର ସାହୁ, କୋରେଇରେ ଭାଜପା ବିଧାୟକ ଆକାଶ ଦାସନାୟକ ନିର୍ବାଚିତ ହୋଇଥିବା ବେଳେ ବରୀରେ ବିଜେଡି ପ୍ରାର୍ଥୀ ବିଶ୍ୱରଞ୍ଜନ ମଲ୍ଲିକ ବିଧାୟକ ହୋଇଛନ୍ତି। ସ୍ବାଧୀନ ବିଧାୟକ ହିମାଂଶୁ ଭାଜପାରେ ସାମିଲ ହେବା ପରେ ବ୍ଲକରେ ଭାଜପା ବିଧାୟକ ସଂଖ୍ୟା ୨କୁ ବୃଦ୍ଧି ପାଇଥିବା ବେଳେ ଦଳ ତା’ର ପ୍ରଭାବ ବିସ୍ତାର କରିବା ଆରମ୍ଭ କରିଛି। ବରୀରେ ବିଶ୍ୱରଞ୍ଜନ ବିଜେଡିରୁ ଜିତିଥିବା ବେଳେ ପୂର୍ବତନ ବିଧାୟକ ସୁନନ୍ଦା ଦାସ ଓ ବିଶ୍ୱରଞ୍ଜନ ଗୋଷ୍ଠୀଙ୍କ ମଧ୍ୟରେ ଦୂରତା ସ୍ପଷ୍ଟ ବାରି ହୋଇପଡୁଛି। ୨୦୨୨ ପଞ୍ଚାୟତ ନିର୍ବାଚନରେ ଫଳାଫଳ ବିଜେଡି ସପକ୍ଷରେ ଯାଇଥିଲା। ଏବେ ବି ବ୍ଲକର ଅଧିକାଂଶ ପଞ୍ଚାୟତରେ ବିଜେଡି ସମର୍ଥତ୍ତ ସରପଞ୍ଚ ଓ ସମିତି ସଭ୍ୟାସଭ୍ୟ କାର୍ଯ୍ୟ କରୁଛନ୍ତି। ଏବର ସ୍ଥିତିରେ ନବନିର୍ବାଚିତ ବିଧାୟକ ଓ ପଞ୍ଚାୟତ ପ୍ରତିନିଧିମାନଙ୍କ ମଧ୍ୟରେ ଦୂରତା ବଢ଼ିବାରେ ଲାଗିଛି। ନିର୍ବାଚନ ପରଠାରୁ ବିଧାୟକ ସମର୍ଥତ୍ତ ଗୋଷ୍ଠୀ ପ୍ରଭାବ ବିସ୍ତାର କରୁଥିବା ସାଧାରଣରେ ପରିଲକ୍ଷିତ ହେଉଛି । ଫଳରେ ଅନେକ ସ୍ଥାନରେ ପଞ୍ଚାୟତ ପ୍ରତିନିଧି ଗୋଷ୍ଠୀମାନଙ୍କ ଦ୍ୱାରା କରାଯାଉଥିବା ଉନ୍ନୟନକାର୍ଯ୍ୟକୁ ବିରୋଧ କରାଯାଉଛି। କେତେ ଜଣ ନାମ ଗୋପନ ରଖି କହୁଛନ୍ତି, ବିଧାୟକଙ୍କ ସମର୍ଥକମାନେ ନିର୍ବାଚନ ପୂର୍ବରୁ ଜାରି ରହିଥିବା ଉନ୍ନୟନକାର୍ଯ୍ୟକୁ ବିରୋଧ କରିବା ସହ ଅନେକ ସ୍ଥାନରେ କାର୍ଯ୍ୟ ବନ୍ଦ ପାଇଁ ବିଭାଗୀୟ ଅଧିକାରୀ, ବ୍ଲକରେ କାର୍ଯ୍ୟରତ ଅଧିକାରୀମାନଙ୍କ ଉପରେ ଚାପ ପକାଉଛନ୍ତି। ଦେଖିବାକୁ ଗଲେ ବିଭିନ୍ନ ପଞ୍ଚାୟତରେ ଅନେକ କୋଟି ଟଙ୍କାର ଉନ୍ନୟନମୂଳକ କାର୍ଯ୍ୟ ବନ୍ଦ ହୋଇଯାଇଛି। ରାଜନୈତିକ ବିବାଦ ଯୋଗୁ ବିକାଶମୂଳକ କାର୍ଯ୍ୟ ଆଗେଇ ପାରୁ ନ ଥିବାରୁ ନିର୍ବାଚିତ ବିଧାୟକମାନେ ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହେବା ସ୍ବାଭାବିକ।
