ପୁରୀ ଅଫିସ,୧୮ା୫: ରଥଖଳାରେ ତିନିରଥର ନିର୍ମାଣ କାର୍ଯ୍ୟ ଆଗେଇ ଚାଲିଛି। ବୁଧବାର ସନ୍ଧ୍ୟା ସୁଦ୍ଧା ତିନି ରଥର ମୋଟ ୪୨ ଚକ ମଧ୍ୟରୁ ୩୮ଟି ଚକର ନିର୍ମାଣ ସରିଥିବା ବେଳେ ଗୁରୁବାର ବାକି ୪ ଚକ କାମ ଶେଷ ପର୍ଯ୍ୟାୟରେ ପହଞ୍ଚିଛି। ତାଳଧ୍ୱଜ ରଥର ଶେଷ ଦୁଇଟି ଚକର ତୁମ୍ବ ଅରରେ ପଇ ସଂଯୋଗ ପୂର୍ବକ ପଇରେ କିଳାବାଡ଼ିଆ ସହ ପଇ ସଂଯୋଗ ସ୍ଥଳରେ କାପ ବା କଳସା କାର୍ଯ୍ୟ ଜାରି ରହିଛି। ସେହିପରି ଦର୍ପଦଳନ ଓ ନନ୍ଦିଘୋଷ ରଥର ଶେଷ ଚକ ଦ୍ୱୟର ତୁମ୍ବଅରରେ ପଇପିନ୍ଧା ସରି ପଇକଳଶା କାମ ଚାଲିଛି। ତିନିରଥର ଆବଶ୍ୟକ ସଂଖ୍ୟକ ଅଖ ନିର୍ମାଣ ଶେଷ ପର୍ଯ୍ୟାୟରେ ପହଞ୍ଚିଛି। ତିନିରଥର ଗୋଟିଏ ଲେଖାଏ ପଡ଼ିନାହାକା ଅଖର ଆଁଶମରା କାର୍ଯ୍ୟ ଚାଲୁ ରହିଛି। ଗୁରୁବାର ତିନି ରଥର ଅଖ ଓ ଚକ ନିର୍ମାଣ ସରିବ ବୋଲି ସୂଚନା ମିଳିଛି। ବର୍ତ୍ତମାନ ସୁଦ୍ଧା ତିନି ରଥର ୧୨ଟି ଲେଖାଏ ୨୦ ଫୁଟିଆ ଚଉତା କାଠର ଚଉପଟ ଶେଷହୋଇ ସମସ୍ତ ଚଉତାର ଦୁଇମୁହଁ କାପ କରାଯାଇଛି। ଗୁରୁବାର ଚଉତା କାଠର ଦୁଇ ମୁହଁରେ ବିନ୍ଧ ଅନୁକୂଳ କାର୍ଯ୍ୟ ହେବ, ସେଥିପାଇଁ ମହାରଣାମାନେ ଚଉତାଗୁଡିକରେ ମାପଚିହ୍ନ ମାରିଛନ୍ତି। ପ୍ରତି ରଥର ତିନୋଟି ଭୂଇଁ ନିର୍ମାଣ ପାଇଁ ୪ଟି ଲେଖାଏ ଚଉତା କାଠ ଆବଶ୍ୟକ ହୋଇଥାଏ। ଏହା ରଥର ଚାରି ନାହାକା ଉପରେ ସଂଯୋଗ କରଯାଇଥାଏ। କରତି ସେବକମାନେ ତାଳଧ୍ୱଜ ରଥର ୪୦ ଫୁଟିଆ ପୋଲ ଗୟଳର ଚିରଟ ଶେଷ କରିଛନ୍ତି। ନନ୍ଦିଘୋଷ ରଥର ପୋଲ ଗୟଳ ଚିରଟ ପାଇଁ ପୋଲ ଗୟଳ କାଠର ଦୁଇପାଶର୍ବ ଚିତା କାର୍ଯ୍ୟ ଆରମ୍ଭ ହେବ। ରୂପକାର ସେବକମାନେ ତିନିରଥର କୋଣଗୁଜଗୁଡିକରେ ରୂପ କାର୍ଯ୍ୟ ଖୋଦେଇ ସହ ପଲିସ ଜାରି ରଖିଛନ୍ତି। ଦୋଳବେଦିସ୍ଥିତ ଅସ୍ଥାୟୀ କମାରଶାଳରେ ଓଝା ସେବକମାନେ ତିନିରଥର ଦଣ୍ଡା କଣ୍ଟା, ଗୟଳ କଣ୍ଟା, ଯୋଖା କଣ୍ଟା ଏବଂ କଇଁଚି କଣ୍ଟା ତିଆରିରେ ବ୍ୟସ୍ତ ରହିଛନ୍ତି।
