ଢେଙ୍କାନାଳ ଅଫିସ,୧୬।୨: ଦିନ ଦ୍ୱିପ୍ରହରେ ବଜାର ଉପରୁ ମହିଳାଙ୍କ ଠାରୁ ଝାମ୍ପି ନେଲେ ଲକ୍ଷେ ଟଙ୍କା। ଏଭଳି ଘଟଣା ଘଟିଛି ଢେଙ୍କାନାଳ ଟାଉନଥାନା ଅନ୍ତର୍ଗତ ବାଜିଚୌକ ନିକଟରେ। ଦୁଇ ଜଣ ଦୃର୍ବୃତ୍ତ ବାଇକ୍ରେ ଆସି ଆଖି ପିଛୁଳାକେ ମହିଳାଙ୍କଠାରୁ ଲକ୍ଷେ ଟଙ୍କା ଝାମ୍ପି ନେଇଛନ୍ତି। ସୁନନ୍ଦା ରାଉତ ନାମକ ଜଣେ ମହିଳା ଏସ୍ବିଆଇ ବଜାର ଶାଖାରୁ ଟଙ୍କା ଉଠାଇ ସ୍କୁଟି ଯୋଗେ କାରିଗର ସାହି ସ୍ଥିତ ଘରକୁ ଫେରୁଥିଲେ। ପଲିଥିନରେ ଲକ୍ଷେ ଟଙ୍କା ସମେତ ୪ଟି ପାସବୁକ ୫ଟି ଏଟିଏମ୍ ଓ ପାନକାର୍ଡ ଧରିଥିଲେ। ଏକ କିଲୋମିଟର ଯିବା ପରେ ବାଜିଚୌକ ଠାରେ ଦୁଇ ଜଣ ଦୁବୃର୍ତ୍ତ ଏକ ବାଇକରେ ଆସି ଚଳନ୍ତା ଗାଡିରୁ ପଲିଥିନଟିକୁ ଝାମ୍ପି ନେଇଥିଲେ। ସେମାନଙ୍କୁ ପିଛା କରୁଥିବା ବେଳେ ସ୍କୁଟିରୁ ପଡି ମହିଳା ଜଣକ ଆହତ ହୋଇଛନ୍ତି। ଖବର ପାଇ ଟାଉନଥାନା ପୋଲିସ ଘଟଣାସ୍ଥଳରେ ପହଞ୍ଚି ଛାନଭିନ ଆରମ୍ଭ କରିଛି। ଲୁଟେରା ମାନେ ଅନଗୋଳ ଆଡକୁ ଚାଲି ଯାଇଥିବା ସନ୍ଦେହ କରାଯାଉଛି।
