ନୂଆଦିଲ୍ଲୀ/ବେଜିଂ, ୯।୧୦: ଉତ୍ତରାଖଣ୍ଡରେ ଚାଇନା ସୈନ୍ୟ ଅନୁପ୍ରବେଶ କରିବା ଘଟଣାର ମାସକ ପରେ ଗତ ସପ୍ତାହରେ ପୁଣି ଥରେ ସେମାନେ ପ୍ରକୃତ ନିୟନ୍ତ୍ରଣରେଖା (ଏଲ୍ଏସି) ଅତିକ୍ରମ କରି ଅରୁଣାଚଳପ୍ରଦେଶରେ ଅନୁପ୍ରବେଶ କରିଥିଲେ। ତାଓ୍ବାଙ୍ଗରେ ଚାଇନା ସୈନ୍ୟଙ୍କ ସହ ଭାରତୀୟ ଯବାନ ମୁହଁାମୁହିଁ ହୋଇଛନ୍ତି। ଉକ୍ତ ଅଞ୍ଚଳରେ ପ୍ରକୃତ ନିୟନ୍ତ୍ରଣ ରେଖାକୁ ନେଇ ମତପାର୍ଥକ୍ୟ ରହିଥିବାରୁ ଉଭୟ ପକ୍ଷ ସେମାନଙ୍କ ଧାରଣାର ନିୟନ୍ତ୍ରଣ ରେଖା ପର୍ଯ୍ୟନ୍ତ ପାଟ୍ରୋଲିଂ କରିଥାନ୍ତି। ତେବେ ଚାଇନା ସୈନ୍ୟ ଭାରତୀୟ ଅଞ୍ଚଳ ମଧ୍ୟକୁ ପଶିଆସିଥିବାରୁ ତାଓ୍ବାଙ୍ଗ ସେକ୍ଟରର ୟାଙ୍ଗସେ ନିକଟରେ ଉଭୟ ପକ୍ଷ ମଧ୍ୟରେ ଯୁକ୍ତିତର୍କ ହେବା ସହ ଠେଲାପେଲା ହୋଇଥିଲା ବୋଲି ଜଣେ ଅଧିକାରୀ କହିଛନ୍ତି। ସ୍ଥାନୀୟ କମାଣ୍ଡରଙ୍କ ହସ୍ତକ୍ଷେପ ପରେ ସ୍ଥିତି ନିୟନ୍ତ୍ରଣକୁ ଆସିଥିଲା ଓ ଚାଇନା ସୈନ୍ୟ ଫେରିଯାଇଥିଲେ। ପୂର୍ବ ଲଦାଖ ଅଞ୍ଚଳରୁ ସୈନ୍ୟ ପ୍ରତ୍ୟାହାର ଓ ସୀମାରେ ଶାନ୍ତି ବଜାୟ ରଖିବା ଲାଗି ଆଗକୁ ଦୁଇ ସୈନ୍ୟବାହିନୀର କମାଣ୍ଡର ସ୍ତରୀୟ ବୈଠକ ହେବାକୁ ଥିବାବେଳେ ଏହା ପୂର୍ବରୁ ପୁଣିଥରେ ଉତ୍ତେଜନା ସୃଷ୍ଟି ହୋଇଛି।
ସାମରିକ ଅଧିକାରୀଙ୍କ କହିବା ଅନୁଯାୟୀ ଭାରତ ଓ ଚାଇନା ମଧ୍ୟରେ କୌଣସି ଆନୁଷ୍ଠାନିକ ସୀମାରେଖା ଚିହ୍ନଟ ହୋଇ ନ ଥିବାରୁ ଅନେକ ସମୟରେ ପ୍ରକୃତ ନିୟନ୍ତ୍ରଣ ରେଖା ଧାରଣାକୁ ନେଇ ମତପାର୍ଥକ୍ୟ ଦେଖାଦେଇଥାଏ। ଦୁଇ ଦେଶ ମଧ୍ୟରେ ରହିଥିବା ବୁଝାମଣା ଓ ପ୍ରୋଟୋକଲ ଅନୁଯାୟୀ ସମସ୍ୟାର ସମାଧାନ କରାଯାଇ ଆସୁଛି। ଗତ ସପ୍ତାହର ମୁହଁାମୁହିଁ ସ୍ଥିତି ଯୋଗୁ ଭାରତୀୟ ପ୍ରତିରକ୍ଷା ଓ ଭିତ୍ତିଭୂମିର କୌଣସି କ୍ଷତି ହୋଇ ନ ଥିବା ଅଧିକାରୀ ସୂଚନା ଦେଇଛନ୍ତି। ଅନ୍ୟପକ୍ଷରେ ପିଏଲ୍ଏ ସୈନ୍ୟ ଅରୁଣାଚଳପ୍ରଦେଶ ମଧ୍ୟରେ ପ୍ରବେଶ କରିବା ଓ ଭାରତୀୟ ଯବାନଙ୍କ ଦ୍ୱାରା ଅଟକ ରହିବା ସମ୍ପର୍କରେ ଚାଇନାକୁ ଜଣା ନ ଥିବା ଏହାର ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ଝାଓ ଲିଜିଆନ୍ ଶୁକ୍ରବାର କହିଛନ୍ତି।
ଭାରତର ସୀମାକୁ କୌଣସି ବାହ୍ୟଶକ୍ତି ଉଲ୍ଲଂଘନ କରିବାକୁ ଦିଆଯିବ ନାହିଁ ବୋଲି ବାୟୁସେନା ମୁଖ୍ୟ ଭି.ଆର୍. ଚୌଧରୀ କହିଛନ୍ତି। ଭାରତ ଭୂଖଣ୍ଡକୁ ସୁରକ୍ଷିତ ରଖିବା ଲାଗି ବାୟୁସେନା ଯୋଦ୍ଧାମାନେ ନିଶ୍ଚୟ ସେମାନଙ୍କ ଶକ୍ତି ପ୍ରଦର୍ଶନ କରିବାକୁ ୮୯ତମ ବାୟୁସେନା ଦିବସ ଅବସରରେ ଉଦ୍ବୋଧନ ଦେଇ ଚୌଧରୀ ଆହ୍ବାନ ଦେଇଥିଲେ।
