ନୂଆଦିଲ୍ଲୀ,୩୧।୮: ଦେଶରେ କରୋନା ଭାଇରସ ସଂକ୍ରମଣର ପ୍ରତିଦିନ କ୍ରମାଗତ ଭାବରେ ଉତ୍ଥାନ-ପତନ ଦେଇ ଗତି କରୁଛି। ମଙ୍ଗଳବାର ପ୍ରକାଶିତ ତଥ୍ୟ ଅନୁଯାୟୀ ଗତ ୨୪ ଘଣ୍ଟା ମଧ୍ୟରେ ଦେଶରେ ୩୦,୯୪୧ଟି ନୂଆ କରୋନା ସଂକ୍ରମିତ ଚିହ୍ନଟ ହୋଇଛନ୍ତି। ଏଥି ସହିତ କେତେକ ରାଜ୍ୟରେ କରୋନା ସଂକ୍ରମଣ ଚିନ୍ତାଜନକ ରହିଛି। ଏ ନେଇ ଇଣ୍ଡିଆନ କାଉନସିଲ ଅଫ ମେଡିକାଲ ରିସର୍ଚ୍ଚ (ଆଇସିଏମଆର୍)ର ଏପିଡେମୋଲୋଜି ଏବଂ କମ୍ୟୁନିକେବଲ ଡିଜିଜେସ୍ର ମୁଖ୍ୟ ଡା. ସମୀର ପଣ୍ଡା କହିଛନ୍ତି ଯେ, ଯେଉଁ ରାଜ୍ୟଗୁଡ଼ିକରେ କରୋନା ସଂକ୍ରମଣର ଦ୍ୱିତୀୟ ଲହର ସମୟରେ ଭୟ ଦେଖା ଦେଇ ନାହିଁ, ଏବେ ସେହି ରାଜ୍ୟରେ କରୋନା ମାମଲା ବୃଦ୍ଧି ପାଉଛି। ଏହା କରୋନା ତୃତୀୟ ଲହରର ପ୍ରାରମ୍ଭିକ ସଙ୍କେତ ଅଟେ ବୋଲି ସେ କହିଛନ୍ତି।
ଡକ୍ଟର ପଣ୍ଡା କହିଛନ୍ତି ଯେ, ସମଗ୍ର ଭାରତ ବିଷୟରେ ଆଲୋଚନା ନ କରି ସମ୍ପୃକ୍ତ ରାଜ୍ୟଗୁଡିକ ନିର୍ଦ୍ଦିଷ୍ଟ ଆଭିମୁଖ୍ୟ ଗ୍ରହଣ କରିବା ଜରୁରୀ। କାରଣ ସମସ୍ତ ରାଜ୍ୟରେ ପରିସ୍ଥିତି ସମାନ ନୁହେଁ। ବିଭିନ୍ନ ରାଜ୍ୟ ମହାରାଷ୍ଟ୍ର ଏବଂ ଦିଲ୍ଲୀ ଭଳି ରାଜ୍ୟରୁ ଶିକ୍ଷା ଗ୍ରହଣ କରି କୋଭିଡ ୧୯ ଉପରେ ପ୍ରତିବନ୍ଧକ ଲଗାଇବା ଏବଂ ଟିକାକରଣ ବୃଦ୍ଧି କରିବା ଆରମ୍ଭ କରିଥିଲେ। କେତେକ ରାଜ୍ୟରେ କୋଭିଡ ମାମଲା ବୃଦ୍ଧି ଏକ ତୃତୀୟ ଲହରକୁ ସୂଚାଉଛି। ପ୍ରଥମ ଏବଂ ଦ୍ୱିତୀୟ ଲହର ସମୟରେ କରୋନା ସଂକ୍ରମଣର ସଂଖ୍ୟା ଏବଂ ପରିମାଣକୁ ବିଶ୍ଳେଷଣ କରି ସମସ୍ତ ରାଜ୍ୟ ନିଜକୁ ତୃତୀୟ ଲହରରୁ ରକ୍ଷା କରିବା ପାଇଁ ରଣନୀତି ପ୍ରସ୍ତୁତ କରିବା ଉଚିତ୍ ବୋଳି ସେ କହିଛନ୍ତି।
ବିଦ୍ୟାଳୟଗୁଡ଼ିକର ପୁନଃ ଖୋଲିବା ବିଷୟରେ ଡକ୍ଟର ପଣ୍ଡା କହିଛନ୍ତି ଯେ ଆମକୁ ଏ ବିଷୟରେ ଭୟଭୀତ ହେବାର ଆବଶ୍ୟକତା ନାହିଁ। ଚତୁର୍ଥ ଜାତୀୟ ସେରୋ ସର୍ଭେରେ ଏହା ଜଣାପଡିଛି ଯେ ପ୍ରାୟ ୫୦ ପ୍ରତିଶତ ପିଲା ସଂକ୍ରମିତ ହୋଇଛନ୍ତି। ତେଣୁ କୌଣସି କାରଣ ବିନା ଆମକୁ ଭୟଭୀତ କରିବାର ଆବଶ୍ୟକତା ନାହିଁ । ସେ କହିଛନ୍ତି ଯେ, ବିଦ୍ୟାଳୟ ଖୋଲିବା ନିରାପଦ କି ନୁହେଁ ଚିନ୍ତା କରିବା ଅପେକ୍ଷା ଭଲ ପ୍ରସ୍ତୁତି କରିବା ଅଧିକ ଗୁରୁତ୍ୱପୂର୍ଣ୍ଣ। ଶିକ୍ଷକ, ଅଭିଭାବକ, ସହାୟକ କର୍ମଚାରୀ, ବସ ଡ୍ରାଇଭର ଏବଂ କଣ୍ଡକ୍ଟରଙ୍କୁ ଟିକାକରଣ କରାଯିବା ଉଚିତ୍। କୋଭିଡ ଉପଯୁକ୍ତ ଅଭ୍ୟାସ (ସିଏବି) କାର୍ଯ୍ୟକାରୀ ହେବା ଜରୁରୀ ଅଟେ, ଏବଂ ସିଏବି ସୂଚାଉଥିବା ହୋର୍ଡିଂ ଜରୁରୀ।
