ଜୟପୁର,୨୬ା୭(ପି.ଟି.): ରାଜସ୍ଥାନରେ ଅଶୋକ ଗେହଲଟ ସରକାରକୁ ଭାଙ୍ଗିଦେବା ପାଇଁ ଭାଜପା ଷଡ଼ଯନ୍ତ୍ର କରୁଥିବା ଅଭିଯୋଗ କରି କଂଗ୍ରେସ ପକ୍ଷରୁ ସାରା ରାଜ୍ୟରେ ବିକ୍ଷୋଭ ପ୍ରଦର୍ଶନ କରାଯାଇଛି। ଜୟପୁର ସମେତ ସମସ୍ତ ଜିଲା ସଦର ମହକୁମାରେ କଂଗ୍ରେସ କର୍ମୀମାନେ ଏକାଠି ହୋଇ ଭାଜପା ବିରୋଧରେ ସ୍ଲୋଗାନ ଦେବା ସହ ରାଜ୍ୟପାଳ ତୁରନ୍ତ ବିଧାନସଭା ଅଧିବେଶନ ଡାକିବାକୁ ଦାବି କରିଥିଲେ। ସଂଖ୍ୟାଗରିଷ୍ଠତାର ପ୍ରମାଣ ଦେବା ଲାଗି ସୁଯୋଗ ଦିଆଯାଉନି। ଭାଜପାର ଏହି ଷଡ଼ଯନ୍ତ୍ର କଦାପି ସଫଳ ହେବନାହିଁ। ଆବଶ୍ୟକ ପଡ଼ିଲେ ଭାରତର ରାଷ୍ଟ୍ରପତିଙ୍କ ପାଖକୁ ଯିବା ପାଇଁ ପ୍ରସ୍ତୁତ ଥିବା ମୁଖ୍ୟମନ୍ତ୍ରୀ ଗେହଲଟ କଂଗ୍ରେସ ବିଧାୟକମାନଙ୍କୁ କହିଛନ୍ତିି। ରାଷ୍ଟ୍ରପତି ଭବନ ଏବଂ ପ୍ରଧାନମନ୍ତ୍ରୀଙ୍କ ବାସଭବନ ଆଗରେ ପିକେଟିଂ କରିବାକୁ ପଡ଼ିଲେ ମଧ୍ୟ ସେଥିପାଇଁ ପ୍ରସ୍ତୁତ ରହିବାକୁ ଗେହଲଟ ତାଙ୍କ ବିଧାୟକମାନଙ୍କୁ କହିଛନ୍ତି।
ସଚିନ ପାଇଲଟଙ୍କ ନେତୃତ୍ୱରେ ବିଦ୍ରୋହୀ କଂଗ୍ରେସ ବିଧାୟକମାନଙ୍କୁ ଅଯୋଗ୍ୟ ଘୋଷଣା କରିବାରୁ ରାଜସ୍ଥାନ ହାଇକୋର୍ଟ ସାମୟିକ ସୁରକ୍ଷା ଦେବା ପରେ ସୋମବାର ବିଧାନସଭା ଅଧିବେଶନ ଡାକିବା ଦାବିରେ ଶୁକ୍ରବାର ଗେହଲଟ ଓ କଂଗ୍ରେସ ବିଧାୟକମାନେ ରାଜ୍ୟପାଳ କଲରାଜ ମିଶ୍ରଙ୍କ ବାସଭବନରେ ଦୀର୍ଘସମୟ ଧାରଣାରେ ବସିଥିଲେ। ସେ ୧୦୨ ବିଧାୟକଙ୍କ ସମର୍ଥନ ଥିବା ଏକ ପତ୍ର ରାଜ୍ୟପାଳଙ୍କୁ ଦେଇଥିଲେ। ବିଧାନସଭା ଅଧିବେଶନ ଡାକିବା ପାଇଁ ସାଧାରଣତଃ ୨୧ଦିନିଆ ନୋଟିସ ଆବଶ୍ୟକ ହୋଇଥାଏ। କ୍ୟାବିନେଟ ନୋଟ୍ରେ ଅଧିବେଶନ ଡାକିବା ଲାଗି ତାରିଖ ଉଲ୍ଲେଖ ନ ଥିବା ରାଜ୍ୟପାଳ କହିବା ସହ କରୋନା ସ୍ଥିତିକୁ ଧ୍ୟାନରେ ରଖିବା ପାଇଁ ସରକାରଙ୍କୁ ପରାମର୍ଶ ଦେଇଥିଲେ। ଏହା ପରେ ଗେହଲଟ କଂଗ୍ରେସ ବିଧାୟକମାନଙ୍କ ସହ ବୈଠକ କରିବା ସହ କ୍ୟାବିନେଟ ବୈଠକରେ ପରବର୍ତ୍ତୀ ପଦକ୍ଷେପ ସମ୍ପର୍କରେ ଆଲୋଚନା କରିଥିଲେ। ଚାପର ବଶବର୍ତ୍ତୀ ହୋଇ ରାଜ୍ୟପାଳ ଅଧିବେଶନକୁ ବିଳମ୍ବ କରାଉଥିବା ସେ ଅଭିଯୋଗ କରିଥିଲେ। ପୁନର୍ବାର ସେ ରାଜ୍ୟପାଳଙ୍କୁ ଭେଟି ସାନି ଅନୁରୋଧ ପତ୍ର ଦେବେ ବୋଲି ଜଣାପଡ଼ିଛି। ଏନେଇ କ୍ୟାବିନେଟ ବୈଠକରେ ନିଷ୍ପତ୍ତି ହୋଇଥିଲା।
ସେପଟେ ରାଜସ୍ଥାନ ଭାଜପା ସଭାପତି ସତୀଶ ପୁନିଆ ଏବଂ ବିରୋଧୀ ଦଳ ନେତା ଗୁଲାବ ଚନ୍ଦ୍ର କଟାରିଆଙ୍କ ନେତୃତ୍ୱରେ ଏକ ପ୍ରତିନିଧି ଦଳ ରାଜ୍ୟପାଳଙ୍କୁ ଶନିବାର ଭେଟି କୋଭିଡ୍-୧୯ ସ୍ଥିତି ସମ୍ପର୍କରେ ଆଲୋଚନା କରିଥିବା ଜଣାପଡିଛି। ରାଜସ୍ଥାନରେ ସାମ୍ବିଧାନିକ ସଙ୍କଟ ସୃଷ୍ଟି ହୋଇଥିବା ପୁନିଆ ରାଜଭବନରୁ ଫେରିବା ପରେ ଖବରଦାତାମାନଙ୍କୁ କହିଛନ୍ତି। ମୁଖ୍ୟମନ୍ତ୍ରୀ ନାଟକବାଜି ଚଳାଇବା ସହ ରାଜ୍ୟପାଳଙ୍କୁ ସାମ୍ବିଧାନିକ ଦାୟିତ୍ୱ ନିର୍ବାହ କରିବାରେ ପ୍ରତିବନ୍ଧକ ସୃଷ୍ଟି କରୁଥିବା ଭାଜପା ନେତା ସମାଲୋଚନା କରିଛନ୍ତି। ରାଜଭବନରେ ଧାରଣାରେ ବସିବା ଏକ ନାଟକବାଜି। ରାଜସ୍ଥାନରେ କରୋନା ମହାମାରୀ ନିୟନ୍ତ୍ରଣ ବାହାରକୁ ଯାଇଥିବାବେଳେ ଏହାକୁ ଗୁରୁତର ସହ ନିଆଯିବା ଆବଶ୍ୟକ ବୋଲି ପୁନିଆ କହିଛନ୍ତି।