ମାହାଙ୍ଗା,୨୯ା୯ (ଯଯାତୀ ସିଂହ): ବର୍ଷାଦିନେ ମାଟି ମିଳିବନି ବୋଲି କୌଣସି ମାଟି ପୋତା କାମ ହୋଇ ନ ଥାଏ। କିନ୍ତୁ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନା ନିର୍ମାଣାଧୀନ ରାସ୍ଥାରେ ବର୍ଷାଦିନେ ମାଟି ପୋତା ହେଉଛି। ସରକାର ନିର୍ମାଣାଧୀନ ରାସ୍ତାର ଉଭୟପାର୍ଶ୍ୱରେ ମାଟି ପୋତିବା ପାଇଁ ଟଙ୍କା ଦେଉଛନ୍ତି। କିନ୍ତୁ ଏଠି ସେଇ ରାସ୍ତା କଡରୁ ଜେସିବି ସହାୟତାରେ ମାଟି ତଡ଼ା ଯାଇ ପକାଯାଉଛି। ସୂଚନା ମୁତାବକ କଟକ ଜିଲା ମାହାଙ୍ଗା ବ୍ଲକ ରାଣୀଗୋଡାଠାରୁ ଗୋକନ ଭାୟା ହାଟପଡା ରାସ୍ତାକୁ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ୪.୧୭ କିମି ଅନ୍ତର୍ଭୁକ୍ତ କରାଯାଇଛି। ୧୯୧.୧୧ ଲକ୍ଷ ଟଙ୍କା ବ୍ୟୟ ବରାଦରେ ଜଣେ ଠିକାଦର ବିଭୁରଞ୍ଜନ ପରିଡ଼ା କାର୍ଯ୍ୟାଦେଶ ପାଇଛନ୍ତି। ଏହି ରାସ୍ତା ନିର୍ମାଣ ପାଇଁ ୧୨ା୩ା୨୦୨୩ରେ ଶିଳାନ୍ୟାସ ବିଧାୟକ ପ୍ରତାପ ଜେନା କରିଥିଲେ। ମାତ୍ର ଶିଳାନ୍ୟାସ ଫଳକରେ ଲେଖାଥିଲା ରାଣୀଗୋଡାଠାରୁ ଓଷଙ୍ଗ ଭାୟା ହାଟପଡା। ରାସ୍ତା ଶିଳାନ୍ୟାସ ବେଳେ ବିଧାୟକ ଜେନା କହିଥିଲେ, କାଲିଠାରୁ ରାସ୍ତାର କାମ ଆରମ୍ଭ ହେବ। ଶିଳାନ୍ୟାସକୁ ଦୀର୍ଘଦିନ ପରେ ଏହି ନୂତନ ରାସ୍ତା କାର୍ଯ୍ୟ ଆରମ୍ଭ ହୋଇ ନ ଥିଲା। କିଛିମାସ ପରେ ଏହି ରାସ୍ତା ନିର୍ମାଣ ବଦଳରେ ମରାମତି କରାଯାଇଥିଲା। ଯାହାକୁ ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ପ୍ରକାଶ ପାଇଥିଲା। ତେବେ ଏହି ମରାମତି କାମ ସରିବା ପରେ ବିଭାଗ ପକ୍ଷରୁ ରାସ୍ତା କଡରେ ସୂଚନା ଫଳକ ପୋତା ହୋଇଥିଲା। ଏହି ସୂଚନା ଫଳକରେ ଲେଖାଥିଲା ରାଣୀଗୋଡାଠାରୁ ଗୋକନ ଭାୟା ଯଶୁଆପୁର, ହାଟପଡ଼ା। ଅପରପକ୍ଷେ ୧୯ା୯ା୨୦୨୨ରେ ଏହି କାର୍ଯ୍ୟ ଆରମ୍ଭ ହୋଇ ୧୮ା୬ା୨୦୨୩ରେ ଶେଷ ହୋଇଥିବା ସୂଚନା ଫଳକରେ ଲେଖା ଯାଇଛି। ତେବେ ଏଠାରେ ସାଧାରଣରେ ପ୍ରଶ୍ନ ଉଠୁଛି ବିଭାଗ ପକ୍ଷରୁ ଯଦି ଏହି ରାସ୍ତା କାର୍ଯ୍ୟ ୧୯ା୯ା୨୦୨୨ରୁ ଆରମ୍ଭ ହୋଇଥିଲା ତେବେ କାମ ଆରମ୍ଭ ହେବାର ୬ ମାସ ପରେ ୧୨ା୩ା୨୦୨୩ରେ ବିଧାୟକ ଜେନା କିପରି ଏହାର ଶିଳାନ୍ୟାସ କଲେ।
ଏବେ ବର୍ଷାଦିନେ ଠିକାଦାରଙ୍କ ପକ୍ଷରୁ ଏହି ରାସ୍ତାର କିଛିଅଂଶ ଉପରେ ପ୍ରଥମେ ମେଟାଲ ମହରମ ପକାଇଥିବା ବେଳେ ରାସ୍ତାର ଦୁଇପାର୍ଶ୍ୱରେ ମାଟି ତାଡି ପୋତା କାର୍ଯ୍ୟ ଚାଲିଛି। ସବୁ ଜାଣିଶୁଣି ବିଭାଗ ପକ୍ଷରୁ କିପରି ଠିକାଦାରଙ୍କୁ ରାସ୍ତା ପାର୍ଶ୍ୱ ମାଟି କାମ ପାଇଁ ଅନୁମତି ଦିଆଯାଇଛି ଓ କାହା ଅନୁମତିରେ କେନାଲ କଡ଼ରୁ ଜେସିବି ଲଗାଇ ଠିକାଦାର ମାଟି ତାଡି ନେଉଛନ୍ତି ତାହାକୁ ନେଇ ସାଧାରଣରେ ପ୍ରଶ୍ନ ଉଠିଛି। ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନା କାର୍ଯ୍ୟ ଶେଷ ଅବଧି ସରିବା ପରେ ଠିକାଦାରଙ୍କ ରାସ୍ତା କାର୍ଯ୍ୟକୁ ସ୍ଥାନୀୟ ଅଞ୍ଚଳରେ ଘୋର ବିରୋଧ କରାଯାଇଛି। ଏ ସମ୍ପର୍କରେ ସହକାରୀ ନିର୍ବାହୀ ଯନ୍ତ୍ରୀ ଅର୍ଜୁନ ସାହୁଙ୍କୁ ପଚାରିବାରେ ବର୍ଷାଦିନେ ମାଟି କାମ ହୋଇପାରିବ ନାହିଁ। ଯଦି ଠିକାଦାର ରାସ୍ତା କଡ଼ରୁ ମାଟି ତାଡି ପକାଉ ଥିବେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି। ଅପରପକ୍ଷେ ଦାୟିତ୍ୱରେ ଥିବା ଯନ୍ତ୍ରୀ ବିଜୟ ସାହୁଙ୍କୁ ପଚାରିବାରେ ସମ୍ପୃକ୍ତ ଠିକାଦାରଙ୍କୁ ମାଟି କାମ କରିବାକୁ ବନ୍ଦ କରାଯାଇଛି ବୋଲି ସେ କହିଛନ୍ତି। ତେବେ ଠିକାଦାରଙ୍କୁ ମାଟି କାମ କାହା ଅନୁମତିରେ କରୁଛନ୍ତି, ଏପରି ବେନିୟମ ଭାବେ ରାସ୍ତା ତାଡ଼ି ମାଟି କାମ କରାଯାଉଛି ଏହାର ଏକ ଉଚ୍ଚସ୍ତରୀୟ ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସ୍ଥାନୀୟ ଅଞ୍ଚଳରେ ଦାବି ହେଉଛି।
