ନୂଆଦିଲ୍ଲୀ,୨।୯: ଚଳିତ ବର୍ଷ ଅଗଷ୍ଟ ମାସରେ ଓଡିଶାରେ ସାମଗ୍ରୀ ଓ ସେବା ଟିକସ(ଜିଏସ୍ଟି) ସଂଗ୍ରହ ୬% ହ୍ରାସ ପାଇଛି। ଗତ ବର୍ଷ ଅଗଷ୍ଟରେ ୨୪୯୭ ଟଙ୍କା ଜିଏସ୍ଟି ସଂଗ୍ରହ ହୋଇଥିବା ବେଳେ ଚଳିତ ବର୍ଷ ଅଗଷ୍ଟରେ ଏହା ୨୩୪୮ କୋଟି ଟଙ୍କାକୁ ହ୍ରାସ ଘଟିଥିବା ଜଣାପଡିଛି। ଚଳିତ ବର୍ଷ ଜୁଲାଇରେ ସରକାର ୮୭,୪୨୨ କୋଟି ଟଙ୍କାର ଟିକସ ସଂଗ୍ରହ କରିଥିଲେ। ଅଗଷ୍ଟ ମାସରେ ସାରା ଦେଶରେ ୮୬,୪୪୯ କୋଟି ଟଙ୍କାର ଜିଏସ୍ଟି ସଂଗ୍ରହ ହୋଇଛି। ଏହା ମଧ୍ୟରେ କେନ୍ଦ୍ର ଜିଏସ୍ଟି(ସିଜିଏସ୍ଟି) ବାବଦ ୧୫,୯୦୬ କୋଟି ଟଙ୍କା, ରାଜ୍ୟ ଜିଏସ୍ଟି (ଏସ୍ଜିଏସ୍ଟି) ବାବଦ ୨୧,୦୬୪ ଟଙ୍କା ଏବଂ ସମନ୍ବିତ ଜିଏସ୍ଟି(ଆଇଜିଏସ୍ଟି) ୪୨,୨୬୪ କୋଟି ଟଙ୍କା ରହିଛି। ଏହା ମଧ୍ୟରେ ସାମଗ୍ରୀ ଆମଦାନୀରୁ ୧୯,୧୭୯ କୋଟି ଏବଂ ସେସ୍ ବାବଦ ୭୨୧୫ କୋଟି ଟଙ୍କା ରହିଥିବା ଜଣାପଡିଛି। କେନ୍ଦ୍ର ଜିଏସ୍ଟିରୁ ୧୮,୨୧୬ କୋଟି ଏବଂ ଏସ୍ଜିଏସ୍ଟିରୁ ୧୪୬୫୦ କୋଟି ଟଙ୍କା କେନ୍ଦ୍ର ସରକାର ନିୟମିତ ସମାଧାନ ଦ୍ୱାରା ସେଟେଲ କରିଛନ୍ତି। ନିୟମିତ ସମାଧାନ ପରେ କେନ୍ଦ୍ର ଏବଂ ରାଜ୍ୟ ସରକାର ଯଥାକ୍ରମେ ସିଜିଏସ୍ଟି ବାବଦରେ ୩୪,୧୨୨ କୋଟି ଏବଂ ଏସ୍ଜିଏସ୍ଟି ବାବଦ ୩୫,୭୧୪ କୋଟି ଲାଭ କରିଛନ୍ତି। ୨୦୧୯ ଅଗଷ୍ଟରେ ସରକାର ୯୮, ୨୦୨ କୋଟି ରାଜସ୍ବ ଲାଭ କରିଥିଲେ। ଗତ ବର୍ଷ ଅଗଷ୍ଟରେ ସରକାର ଯେତେ ପରିମାଣର ଜିଏସ୍ଟି ଆଦାୟ କରିଥିଲେ ଚଳିତ ବର୍ଷ ଅଗଷ୍ଟରେ ଏହାର ୮୮% ରାଜସ୍ବ ଆଦାୟ କରିଛନ୍ତି। ସାମଗ୍ରୀ ଆମଦାନୀରୁ ଜିଏସ୍ଟି ଆଦାୟ ୭୭% ରହିଥିବା ବେଳେ ଘରୋଇ ଟ୍ରାଞ୍ଜାକସନରୁ ସଂଗ୍ରହ ୯୨% ରହିଛି। କରୋନା ମହାମାରୀ ଯୋଗୁ ଜିଏସ୍ଟି ସଂଗ୍ରହ ପ୍ରଭାବିତ ହୋଇ ରହିଛି। ଏଥିରେ ଗତ କିଛି ମାସ ହେବ ଲଗାତର ହ୍ରାସ ପରିଲକ୍ଷିତ ହୋଇଛି।
