ଭୁବନେଶ୍ୱର, ୧୨।୫(ବ୍ୟୁରୋ): ମହାରାଷ୍ଟ୍ର, ଉତ୍ତରପ୍ରଦେଶ, ଦିଲ୍ଲୀ, ଆନ୍ଧ୍ର ପଦେଶ, ରାଜସ୍ଥାନ, ହରିୟାଣା, ଛତିଶଗଡ଼, ବିହାର ଭଳି ରାଜ୍ୟରେ କରୋନା ଆକ୍ରାନ୍ତଙ୍କ ସଂଖ୍ୟା କମୁଛି। କିନ୍ତୁ ଓଡ଼ିଶା ସମେତ ପଶ୍ଚିମବଙ୍ଗ, କର୍ନାଟକ, କେରଳ, ତାମିଲନାଡ଼ୁ, ଜମ୍ମୁ-କଶ୍ମୀର, ହିମାଚଳ ପ୍ରଦେଶ, ନାଗାଲାଣ୍ଡ, ତ୍ରିପୁରା ଭଳି ୧୫ରୁ ଊର୍ଦ୍ଧ୍ୱ ରାଜ୍ୟରେ ସଂକ୍ରମଣ ହାର ଅଧିକ ରହିବା ସହିତ ଆକ୍ରାନ୍ତଙ୍କ ସଂଖ୍ୟା ବଢ଼ୁଛି। ଏନେଇ ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ମଙ୍ଗଳବାର ସୂଚନା ଦିଆଯାଇଛି। ମନ୍ତ୍ରଣାଳୟ ପକ୍ଷରୁ ଆୟୋଜିତ ଖବରଦାତା ସମ୍ମିଳନୀରେ ଯୁଗ୍ମ ସଚିବ ଲବ୍ ଅଗ୍ରୱାଲ କହିଛନ୍ତି, ଜାତୀୟ ହାରକୁ ତୁଳନା କଲେ ଦେଶରେ ସଂକ୍ରମଣ କମୁ୍ଥିବାବେଳେ ଓଡ଼ିଶାରେ ବଢ଼ୁଛି। ଦେଶରେ ସଂକ୍ରମଣ ହାର ୨୧% ଥିବାବେଳେ ଓଡ଼ିଶାରେ ଏହା ୨୪.୪% ରହିଛି। ବିଶେଷକରି ୨୭ଜିଲାରେ ସଂକ୍ରମଣ ହାର ୧୦ପ୍ରତିଶତରୁ ଅଧିକ ରହିଛି। କଳାହାଣ୍ଡି ଜିଲାରେ ସର୍ବାଧିକ ୪୬.୭% ରହିଛି। ସେହିପରି ସମ୍ବଲପୁରରେ ୪୬.୬%, ସୁନ୍ଦରଗଡ଼ ୩୪.୨%, ଅନୁଗୋଳ ୩୪%, ଖୋର୍ଦ୍ଧା ୩୩.୩%, କଟକରେ ୨୭.୫% ରହିଛି। ପଣ୍ଡିଚେରୀର ୟାନମ୍ ଜିଲାରେ ସର୍ବାଧିକ ୯୧% ରହିଛି, ଯାହାକି ଦେଶରେ ସର୍ବାଧିକ। ସେହିପରି ୧୩ ରାଜ୍ୟରେ ଲକ୍ଷେରୁ ଅଧିକ ସକ୍ରିୟ ରୋଗୀ ରହିଛନ୍ତି। ୬ରାଜ୍ୟରେ ୫୦ହଜାରରୁ ୧ଲକ୍ଷ ମଧ୍ୟରେ ଏବଂ ୧୭ରାଜ୍ୟରେ ୫୦ହଜାରରୁ କମ୍ ସକ୍ରିୟ ରୋଗୀ ଥିବା ଲବ୍ ଅଗ୍ରୱାଲ କହିଛନ୍ତି। ଖବରଦାତା ସମ୍ମିଳନୀରେ ଆଇସିଏମ୍ଆର୍ ଡିଜି ଡା. ବଳରାମ ଭାର୍ଗବ କହିଛନ୍ତି ଯେ, ୨୬ରାଜ୍ୟରେ ସଂକ୍ରମଣ ହାର ୧୫%ରୁ ଅଧିକ ଥିବାବେଳେ କେବଳ ୫ଟି ରାଜ୍ୟରେ ୫%ରୁ କମ୍ ରହିଛି। ୬ଟି ରାଜ୍ୟରେ ୫ରୁ ୧୫% ରହିଛି। ସେଥିପାଇଁ ଦେଶର ସମସ୍ତ ସରକାରୀ ଓ ଘରୋଇ ହସ୍ପିଟାଲରେ ବିନା କୌଣସି ମାନ୍ୟତାରେ ଆର୍ଟି-ପିସିଆର୍ ଟେଷ୍ଟ ହେବା ଜରୁରୀ ବୋଲି ଡା. ଭାର୍ଗବ କହିଛନ୍ତି।
