ନୂଆଦିଲ୍ଲୀ, ୨୫।୧: କରୋନା ମହାମାରୀ ସଂକ୍ରମଣରୁ ଦୂରେଇ ରହିବା ଲାଗି ଭାରତରେ ଲକ୍ଡାଉନ୍ ଘୋଷଣା କରାଯାଇଥିଲା। ଏହି ସମୟରେ ସାଧାରଣ ଲୋକଙ୍କ ପାଇଁ ବହୁ ସମସ୍ୟା ସୃଷ୍ଟି ହୋଇଥିଲା। ଗରିବଙ୍କ ପାଖରେ ଟଙ୍କାର ଅଭାବ ସହିତ ଖାଇବାକୁ ଖାଦ୍ୟ ନ ଥିଲା। ବହୁ ଲୋକ ନିଯୁକ୍ତି ହରାଇ ବେକାର ହୋଇ ପଡ଼ିଥିଲେ। କରୋନା ଭୟ ତୁଳନାରେ ପେଟର ଭୋକ ଲୋକଙ୍କୁ ବେଶି ବାଧିଥିଲା। ତେବେ ଏହି ସମୟରେ ଦେଶର ଧନକୁବେର ଅଧିକ ଧନୀ ହୋଇଛନ୍ତି। ଏସମ୍ପର୍କିତ ଏକ ରିପୋର୍ଟ ସର୍ଭେ ସଂସ୍ଥା ଅକ୍ସଫାମ୍ ପକ୍ଷରୁ ସ୍ବିଜରଲାଣ୍ଡର ଡାଭୋସ୍ଠାରେ ଓ୍ବାଲର୍ଡ ଇକୋନୋମିକ୍ ଫୋରମ୍ରେ ସୋମବାର ଉପସ୍ଥାପନ କରାଯାଇଛି। ଦେଶର ଧନ କୁବେର ଲକ୍ଡାଉନ୍ ସମୟରେ ୩୫ ପ୍ରତିଶତ ଅଧିକ ଧନୀ ପାଲଟିଛନ୍ତି। ସେମାନଙ୍କର ଚଳ-ଅଚଳ ସମ୍ପତ୍ତି ବୃଦ୍ଧି ହୋଇଛି। ଅପରପକ୍ଷରେ ୮୪ ପ୍ରତିଶତ ପରିବାର ମୁଖ୍ୟ ବେରୋଜଗାର ହୋଇପଡ଼ିଥିଲେ। ୨୦୨୦ ଏପ୍ରିଲ୍ରେ ପ୍ରତି ଘଣ୍ଟାରେ ଲକ୍ଷେ ୭୦ ହଜାର ଲୋକ ଚାକିରି ହରାଇଥିବା ଏହି ରିପୋର୍ଟରେ ଉଲ୍ଲେଖ କରାଯାଇଛି। କିନ୍ତୁ ଧନକୁବେରଙ୍କ ଅଧିକ ଧନୀ ହେବାରେ ଲାଗିଥିଲେ। ଧନକୁବେରଙ୍କ ବୃଦ୍ଧି ହୋଇଥିବା ସମ୍ପତ୍ତିକୁ ବଣ୍ଟାଗଲେ ୧୩ କୋଟି ୮୦ ଲକ୍ଷ ଗରିବଙ୍କୁ ୯୪ ହଜାର ୪୫ ଟଙ୍କା ଲେଖାଏଁ ଚେକ୍ ପ୍ରଦାନ କରାଯାଇ ପାରିଥାନ୍ତା ବୋଲି ଏଥିରେ ଦର୍ଶାଯାଇଛି। ପୃଥିବୀର ଧନକୁବେରଙ୍କ ସମ୍ପତ୍ତି ୨୮୫ ଲକ୍ଷ କୋଟି ଟଙ୍କା( ୩.୯ ଟ୍ରିଲିୟନ୍ ଡଲାର) ବଢ଼ିଥିବାବେଳେ ଭାରତର ୧୦୦ ଜଣ ଶ୍ରେଷ୍ଠ କୁବେରଙ୍କ ସମ୍ପତ୍ତି ୧୨ ଲକ୍ଷ ୯୮ ହଜାର କୋଟି ଟଙ୍କା ବୃ୍ଦ୍ଧି ପାଇଥିବା ରିପୋର୍ଟରେ ପ୍ରକାଶ ପାଇଛି। ଲକ୍ଡାଉନ୍ ସମୟରେ ଭାରତରେ ୯ କୋଟି ୨୦ ଲକ୍ଷରୁ ଅଧିକ ଲୋକ ଚାକିରି ହରାଇଥିବା ଏଥିରେ କୁହାଯାଇଛି।
