ପୂର୍ବତନ ଭାରତୀୟ ଅଧିନାୟକ ତଥା ଆଇପିଏଲରେ ସିଏସ୍କେର ମଙ୍ଗୁଆଳ ମହେନ୍ଦ୍ର ସିଂ ଧୋନୀ ବୁଧବାର ୪୦ତମ ଜନ୍ମଦିନ ପାଳିଛନ୍ତି। ଏହି ବିସ୍ଫୋରକ ବ୍ୟାଟ୍ସମ୍ୟାନ ତାଙ୍କ ମ୍ୟାଚ୍ ଫିନିଶିଂ ଦକ୍ଷତା ପାଇଁ ବେଶ୍ ଜଣାଶୁଣା। ୨୦୧୬ ଆଇପିଏଲର କଥା। ସେତେବେଳେ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ବାସନ୍ଦ ଥିବାରୁ ଆଇପିଏଲରେ ପୁଣେ ସୁପରଜ୍ୟାଣ୍ଟ୍ସ ପାଇଁ ଖେଳୁଥିଲେ ଧୋନୀ।
କିଙ୍ଗ୍ସ ଏକାଦଶ ପଞ୍ଜାବ ବିପକ୍ଷ ଲିଗ୍ର ଅନ୍ତିମ ମ୍ୟାଚ୍କୁ ଜିତିବା ପାଇଁ ପିଏସ୍ଜିକୁ ଫାଇନାଲ ଓଭରରେ ଦରକାର ଥାଏ ୨୩ ରନ୍। ଧୋନୀଙ୍କ ସାମ୍ନାରେ ଥିଲେ ବାମହାତୀ ସ୍ପିନର ଅକ୍ଷର ପଟେଲ। ପ୍ରଥମ ବଲ ମିସ୍ କରିଥିଲେ ଧୋନୀ। ଦ୍ୱିତୀୟ ବଲ ଓ୍ବାଇଡ୍ ହେବାରୁ ଅନ୍ତିମ ୫ ବଲରେ ପିଏସ୍ଜିକୁ ଦରକାର ଥିଲା ୨୨ ରନ୍। ଦ୍ୱିତୀୟ ବଲକୁ ଲଙ୍ଗ୍ ଅଞ୍ଚଳକୁ ବିଶାଳ ଛକା ମାରିଥିଲେ ଅଧିନାୟକ। ତୃତୀୟ ବଲରେ ମଧ୍ୟ ଭଲ ଶଟ୍ ଖେଳିଥିଲେ। କିନ୍ତୁ ବଲକୁ ଡିପ କଭର ବାଉଣ୍ଡ୍ରି ଅଞ୍ଚଳରେ ରୋକି ଦେଇଥିଲେ ହାଶିମ ଆମଲା। ୪ର୍ଥ ଓ ୫ମ ବଲକୁ ଡିପ ମିଡ୍ ଉଇକେଟ ଅଞ୍ଚଳରେ ଚୌକା ଓ ଛକା ଲଗାଇଥିଲେ ଚିନ୍ନା ଥାଲା। ଅନ୍ତିମ ବଲକୁ ମଧ୍ୟ ସମାନ ମିଡ୍ ଉଇକେଟ ଅଞ୍ଚଳରେ ବିଶାଳ ଛକା ମାରି ପିଏସ୍ଜିକୁ ମ୍ୟାଚ୍ ଜିତାଇଥିଲେ ଧୋନୀ। ମାତ୍ର ୩୨ ବଲରେ ଧୋନୀ ୬୪ ରନ୍ର ବିସ୍ଫୋରକ ଇନିଂସ ଖେଳିଥିଲେ। ତାଙ୍କ ପାଳିରେ ଥିଲା ୪ ଚୌକା ଓ ୫ ଛକା। ଆଇପିଏଲରେ ଧୋନୀଙ୍କ ଦଳ ପ୍ଲେ-ଅଫ୍ସରେ ପ୍ରବେଶ ନ କରିବାର ଏହା ଥିଲା ପ୍ରଥମ ଘଟଣା।
