ନୂଆଦିଲ୍ଲୀ,୨୨।୨: ରାଜସ୍ଥାନର କୋଟାକୁ ଭାରତର ‘କୋଚିଂ ରାଜଧାନୀ’ କୁହାଯାଏ। ପ୍ରତିବର୍ଷ ଦେଶର ବିଭିନ୍ନ ସ୍ଥାନରୁ ଶହ ଶହ ଛାତ୍ର କୋଟାକୁ ପ୍ରତିଯୋଗିତାମୂଳକ ପରୀକ୍ଷାରେ ସଫଳ ହେବାର ସ୍ବପ୍ନ ଦେଖି ଆସିଥାଆନ୍ତି, କିନ୍ତୁ କୋଚିଂ ପାଇଁ ଏଠାକୁ ଆସିଥିବା ପିଲାମାନଙ୍କର ଆତ୍ମହତ୍ୟା ମାମଲା ଚିନ୍ତା ବଢାଇ ଦେଇଛି। ୨୦୨୪ରେ ଏପର୍ଯ୍ୟନ୍ତ ଚାରି ପିଲା ଆତ୍ମହତ୍ୟା କରିଛନ୍ତି।
କୋଟା ରାଜସ୍ଥାନର ଦକ୍ଷିଣ-ପୂର୍ବରେ ଚାମ୍ବଲ ନଦୀ କୂଳରେ ଅବସ୍ଥିତ ଏକ ସହର। ଏହା ରାଜସ୍ଥାନର ରାଜଧାନୀ ଜୟପୁରଠାରୁ ୨୪୦ କିଲୋମିଟର ଦୂରରେ ଅବସ୍ଥିତ। ସେଠାରେ ଶହ ଶହ କୋଚିଂ ସେଣ୍ଟର ଅଛି ଯାହା NEET, JEE Main, JEE Advanced, CLAT, NDA, CDS, SSC, Bank PO ଏବଂ ଅନ୍ୟାନ୍ୟ ପ୍ରତିଯୋଗିତାମୂଳକ ପରୀକ୍ଷା ପାଇଁ ପ୍ରସ୍ତୁତି ଯୋଗାଇଥାଏ।
ଗତ ବର୍ଷ କୋଟାରେ ବଢୁଥିବା ଛାତ୍ର ଆତ୍ମହତ୍ୟା ମାମଲାରେ ରାଜସ୍ଥାନର ପୂର୍ବତନ କ୍ୟାବିନେଟ ମନ୍ତ୍ରୀ ଶାନ୍ତି ଧରୱାଲ ଦାବି କରିଥିଲେ ଯେ ପ୍ରେମ ସମ୍ପର୍କ ଏବଂ ପିତାମାତାଙ୍କ ଚାପ ଯୋଗୁଁ ଏହି ମୃତ୍ୟୁ ଘଟୁଛି।
ରାଜସ୍ଥାନ ପୋଲିସର ତଥ୍ୟ ଅନୁଯାୟୀ, ୨୦୧୫ ରୁ ୨୦୨୩ ପର୍ଯ୍ୟନ୍ତ ୧୨୦ ଜଣ ଛାତ୍ର ଆତ୍ମହତ୍ୟା କରିଛନ୍ତି। ୨୦୨୩ରେ କୋଟାରେ ସର୍ବାଧିକ ୨୫ଜଣ ଛାତ୍ର ଆତ୍ମହତ୍ୟା କରିଥିଲେ। ୨୦୨୪ ରେ ଚାରି ଜଣ ଛାତ୍ରଙ୍କ ସହିତ ୧୦ବର୍ଷ ମଧ୍ୟରେ ଏପର୍ଯ୍ୟନ୍ତ ଆତ୍ମହତ୍ୟା କରିଥିବା ଛାତ୍ର ସଂଖ୍ୟା ୧୨୪କୁ ବୃଦ୍ଧି ପାଇଛି।
୧୫ଛାତ୍ର ୨୦୨୨ ରେ, ୨୦୧୯ରେ ୧୮, ୨୦୧୮ ରେ ୨୦, ୨୦୧୭ ରେ ୭, ୨୦୧୬ ରେ ୧୭ ଏବଂ ୨୦୧୫ ରେ ୧୮ ଜଣ ଆତ୍ମହତ୍ୟା କରିଥିଲେ। ତେବେ, କୋଭିଡ ମହାମାରୀ ହେତୁ କୋଚିଂ ପ୍ରତିଷ୍ଠାନ ବନ୍ଦ ଥିବାରୁ ୨୦୨୦ ଏବଂ ୨୦୨୧ରେ କୋଟାରେ କୌଣସି ଛାତ୍ର ଆତ୍ମହତ୍ୟା ହୋଇନଥିଲା।
ତେବେ ଜାତୀୟ କ୍ରାଇମ ରେକର୍ଡ ବ୍ୟୁରୋ (ଏନସିଆରବି) ଅନୁଯାୟୀ ୨୦୨୧ରେ ସାରା ଦେଶରେ ୧୩,୦୮୯ ଜଣ ଛାତ୍ର ଆତ୍ମହତ୍ୟା କରିଛନ୍ତି, ଯାହା ଗତ ଦଶନ୍ଧିରେ ୭୦ ପ୍ରତିଶତ ବୃଦ୍ଧି ଘଟିଛି। ଅର୍ଥାତ୍ ଦେଶରେ ହାରାହାରି ୩୫ ଜଣ ଛାତ୍ର ପ୍ରତିଦିନ ଆତ୍ମହତ୍ୟା କରୁଛନ୍ତି।
୨୦୧୧ରେ ଆତ୍ମହତ୍ୟା କରିଥିବା ଛାତ୍ର ସଂଖ୍ୟା ୭୬୯୬ଥିଲା। ଏଥିମଧ୍ୟରୁ ୧୬୭୩ ଟି ମାମଲାରେ ପରୀକ୍ଷାରେ ବିଫଳତା ଆତ୍ମହତ୍ୟାର କାରଣ ବୋଲି ଦର୍ଶାଯାଇଥିଲା। ସେଥିମଧ୍ୟରୁ ୯୯୧ ପୀଡିତା ପୁରୁଷ ଥିଲେ। ୨୦୨୧ରେ ଭାରତରେ ଆତ୍ମହତ୍ୟା କରି ମୃତ୍ୟୁବରଣ କରୁଥିବା ଛାତ୍ରୀଛାତ୍ରଙ୍କ ସଂଖ୍ୟା ମୋଟ ଆତ୍ମହତ୍ୟା କରିଥିବା ସଂଖ୍ୟା ମଧ୍ୟରୁ ୮% ଥିଲା।
