ଲକ୍ଷ୍ନୌ,୨୭ ।୮: ଉତ୍ତର ପ୍ରଦେଶର ନୋଏଡାରେ ଅବୈଧ ଭାବେ ନିର୍ମାଣ କରାଯାଇଥିବା ସୁପରଟେକ ଟ୍ୱିନ ଟାୱାର୍ସକୁ ନେଇ ଏବେ ଚର୍ଚ୍ଚା । ସରକାରଙ୍କ ନିର୍ଦ୍ଦେଶ କ୍ରମରେ ଏବେ ଏହି ଟାୱାର୍ସକୁ ଭଙ୍ଗାଯିବ । ତେବେ ଏହାକୁ ଭାଙ୍ଗିବା ସମୟରେ ସୁରକ୍ଷା ପ୍ରତି ଦୃଷ୍ଟି ଦେବାକୁ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ନିର୍ଦ୍ଦେଶ ଦେଇଛନ୍ତି । ଯୋଗୀ କହିଛନ୍ତି ଟାୱାର ଭଙ୍ଗାଯିବା ସମୟରେ ଏହାର ଆଖପାଖରେ ରହୁଥିବା ଲୋକଙ୍କ ସୁରକ୍ଷାକୁ ପ୍ରଥମେ ଗୁରୁତ୍ୱ ଦିଆଯିବ । ଟାୱାରକୁ ୨୮ ଅଗଷ୍ଟ ଦିନ ୨ଟା ୩୦ ମିନିଟରେ ଭଙ୍ଗାଯିବ । ମାତ୍ର ୧୨ ସେକେଣ୍ଡରେ ଟାୱାର ଧ୍ୱଂସ ହୋଇଯିବ ବୋଲି କୁହାଯାଉଛି ।
ତେବେ ଟାୱାର ଧ୍ୱଂସ ହେବା ସମୟରେ ଏହାର ଆଖାପାଖି ରାସ୍ତାରେ ଗମନା ଗମନ ବନ୍ଦ କରି ଦିଆଯିବ । ନୋଏଡା-ଗ୍ରେଟର ନୋଏଡା ଏକ୍ସପ୍ରେସ ୱେକୁ ବି ଅଧ ଘଣ୍ଟା ପାଇଁ ବନ୍ଦ କରି ଦିଆଯିବ । ମୋଟାମୋଟି ଭାବେ ଟାୱାର ଭଙ୍ଗାଯିବା ସମୟରେ ସମସ୍ତ ସୁରକ୍ଷା ବ୍ୟବସ୍ଥା କରାଯାଇଥିବ ସୂଚନା ମିଳିଛି ।
ଟାୱାର୍ସକୁ ଧ୍ୱଂସ କରିବାକୁ ୩୭୦୦ କିଲୋଗ୍ରମା ବିସ୍ଫୋରକ ସାମଗ୍ରୀ ବ୍ୟବହାର କରାଯିବ । ଏଥିପାଇଁ ଦୁଇଟି ଯାକ ଟାୱାରରେ ୯୬୦୦ ହୋଲ ବା କଣା କରାଯାଇ ବିସ୍ଫୋରକକୁ ଖଞ୍ଜି ଦିଆଯାଇ ସରିଛି । ଏବେ ଏହାକୁ ଚାର୍ଜ କରାଯାଉଛି । ରବିବାର ଅର୍ଥାତ୍ ୨୮ ଅଗଷ୍ଟ ଦିନ ଠିକ ୨ଟା ୩୦ରେ ବଟନ ଦବାଇ ମାତ୍ର ୧୨ ସେକେଣ୍ଟରେ ଗୋଟିଏ ୩୦ ମହଲା ଓ ଅନ୍ୟଟି ୩୧ ମହଲା ଟାୱାରକୁ ମାଟିରେ ମିଶାଇ ଦିଆଯିବ । ଏଥିରୁ ପ୍ରାୟ ୮୦,୦୦୦ ଟନ ବର୍ଯ୍ୟବସ୍ତୁ ବାହାରିବ ବୋଲି ଅନୁମାନ କରାଯାଉଛି । ଏହି ବର୍ଯ୍ୟବସ୍ତୁକୁ ୩ ମାସ ମଧ୍ୟରେ ଅନ୍ୟ କାମରେ ଲାଗାଇ ଦିଆଯିବାର ଯୋଜନା କରାଯାଇଛି ।
