ଯାଜପୁର ଅଫିସ/ଧର୍ମଶାଳା/ଯାଜପୁର ସଦର,୧୬।୨(ଡି.ଏନ.ଏ.):ଯାଜପୁର ଜିଲାରେ ବୁଧବାର ପଞ୍ଚାୟତ ନିର୍ବାଚନର ପ୍ରଥମ ପର୍ଯ୍ୟାୟ ମତଦାନରେ ବ୍ୟାପକ ବିଭ୍ରାଟ ଦେଖାଯାଇଛି। ଯାଜପୁର ଓ ଧର୍ମଶାଳା ବ୍ଲକର ୪ଟି ବୁଥରେ କେତେକ ଅଜଣା ଲୋକ ପଶି ବାଲେଟ ପେପର ଲୁଟ, ଭଙ୍ଗାରୁଜା, ମାଡପିଟି ଭଳି ଅସାମାଜିକ କାର୍ଯ୍ୟ କରିଥିବା ସୂଚନା ମିଳିଛି। କେତେକ ବୁଥରେ ବୋମା ମାଡ ମଧ୍ୟ ହୋଇଥିବା ଜଣାପଡିଛି। ଏହିକ୍ରମରେ ଯାଜପୁର ଜିଲାପାଳ ଚକ୍ରବର୍ତ୍ତି ସିଂ ରାଠୋର ୯ଟି ବୁଥରେ ମତଦାନକୁ ସ୍ଥଗିତ ନିର୍ଦ୍ଦେଶ ଜାରି କରିଛନ୍ତି।
ସୂଚନାଯୋଗ୍ୟ ଯେ, ଯାଜପୁର ବ୍ଲକ ସୁଜନପୁର ପଞ୍ଚାୟତ ଦୁର୍ଗାପୁର ଅଙ୍ଗନବାଡି କେନ୍ଦ୍ରର ୧ ନମ୍ବର ବୁଥରେ ଅଜଣା ଲୋକ ଆସି ମାଡପିଟ କରିବା ସହ କବାଟ ଭାଙ୍ଗି ଦେଇଛନ୍ତି। ଏପରିକି ବାଲେଟ ପେପର ଓ ଷ୍ଟାମ୍ପ ଲୁଟ କରି ନେଇଛନ୍ତି। ଉତ୍ତେଜନା ପରେ ଘଟଣାସ୍ଥଳରେ ପୋଲିସ ପହଞ୍ଚି ଲୋକଙ୍କୁ ଘଉଡାଇବା ସହ ମତଦାନକୁ ବନ୍ଦ ରଖିଥିଲେ। ପରବର୍ତ୍ତୀ ସମୟରେ ସେଠାରେ କଡ଼ା ପୋଲିସ ସୁରକ୍ଷା ବଳୟରେ ମତଦାନ ହୋଇଥିଲା। ଏହାବାଦ ଯାଜପୁର ବ୍ଲକ ଏରବାଙ୍କ ପଞ୍ଚାୟତର ହରିଜନ ସାହି ସ୍କୁଲର ୨, ୩ ଓ ୪ନମ୍ବର ବୁଥରେ ବୋମା ମାଡ ହୋଇଥିବା ସୂଚନା ମିଳିଛି। ଏହାକୁ ନେଇ ହରିଜନ ସାହିରେ ଉତ୍ତେଜନା ଓ ରାସ୍ତାରୋକୋ ହୋଇଥିଲା। ପୋଲିସ ପହଞ୍ଚି ଲୋକଙ୍କୁ ବୁଝାଶୁଝା କରିବା ପରେ ପରିସ୍ଥିତି ଶାନ୍ତ ହୋଇଥିଲା। ଏହି ବୁଥରେ ସାନି ନିର୍ବାଚନ ହେବ ବୋଲି ପ୍ରଶାସନ ପକ୍ଷରୁ ପ୍ରତିଶ୍ରୁତି ଦେବା ପରେ ଅଞ୍ଚଳବାସୀ ଆନ୍ଦୋଳନରୁ ହଟିଥିଲେ। ଏହି ଘଟଣାରେ ଜଣେ ଅଭିଯୁକ୍ତଙ୍କୁ ଗିରଫ କରାଯାଇଛି।
ଧର୍ମଶାଳା ବ୍ଲକର ଦେଓଦା ପଞ୍ଚାୟତର ଚଇନହୁଡା ପ୍ରାଥମିକ ସ୍କୁଲର ୬ ଓ ୭ ନମ୍ବର ବୁଥରେ ନିର୍ବାଚନୀ ହିଂସା ହୋଇଛି। ଏଠାରେ ସକାଳ ୭ ରୁ ୯ଟା ପର୍ଯ୍ୟନ୍ତ ସୁରୁଖୁରରେ ମତଦାନ ଚାଲିଥିଲା। ଏହାପରେ କେତେକ ଅସାମାଜିକ ବ୍ୟକ୍ତି ବୁଥ ଭିତରକୁ ଜବରଦସ୍ତ ପଶି ବୁଥ କବଜା କରିଥିଲେ। ବାଲେଟ ପେପର ଓ ଷ୍ଟାମ୍ପକୁ ଲୁଟ କରି ମତଦାନ କରିଥିଲେ। ସେହିପରି ଅରାବଳ ପଞ୍ଚାୟତ ନାଳକୁଳ ଗ୍ରାମର ପ୍ରାଥମିକ ସ୍କୁଲରେ ମଧ୍ୟ ଅନୁରୂପ ଭାବେ କେତେକ ଅଜଣା ବ୍ୟକ୍ତି ପଶି ବୁଥକୁ ନିଜ କବଜାରେ ନେଇ ଭୋଟଦାନ କରିଥିବା ସୂଚନା ମିଳିଛି। ଜିଲାପାଳ ଘଟଣାସ୍ଥଳରେ ପହଞ୍ଚି ପରିସ୍ଥିିତିର ଅନୁଧ୍ୟାନ କରିବା ସହ ନିର୍ବାଚନ କମିଶନଙ୍କୁ ସବିଶେଷ ରିପୋର୍ଟ ପ୍ରଦାନ କରାଯିବ ବୋଲି କହିଛନ୍ତି।
