ନୂଆଦିଲ୍ଲୀ,୨୩ ।୧୨: ଚାଇନାରେ କରୋନା ସଂକ୍ରମଣ ବଢି ଚାଲିଥିବା ବେଳେ ଏବେ ଭାରତକୁ ଏହାର ଭୟ ଫେରିଛି । ଚାଇନାରେ ଓମିକ୍ରନର ସବ ଭାରିଏଣ୍ଟ ବିଏଫ.୭ ସ୍ଥିତିକୁ ଏକବାର ବିଗାଡି ଦେଇଛି । ଏବେ ଏହି ସଂକ୍ରମଣକୁ ରୋକିବାକୁ ଭାରତ ପ୍ରସ୍ତୁତ ହୋଇ ଗଲାଣି । ଗୁରୁବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହାକୁ ନେଇ ଏକ ଉଚ୍ଚ ସ୍ତରୀୟ ବୈଠକ କରିଛନ୍ତି । ଏହା ବ୍ୟତୀତ କିଛି ରାଜ୍ୟର ମୁଖ୍ୟମନ୍ତ୍ରୀ ଓ ସ୍ୱାସ୍ଥ୍ୟମନ୍ତ୍ରୀ କୋଭିଡ-୧୯ ପ୍ରସ୍ତୁତି ଓ ପ୍ରୋଟୋକଲକୁ ନେଇ ସମିକ୍ଷା ବୈଠକ କରିଛନ୍ତି । ଏଥିରେ ଭିଡ ସ୍ଥାନରେ ମାସ୍କ ପିନ୍ଧିବା ଜୁରରି କରିବା, ଜିନୋମ ସିକ୍ୱିନସିଂ ବଢାଇବା ଓ ଯେତେଶୀଘ୍ର ସମ୍ଭବ ଲୋକଙ୍କୁ କରୋନା ଭ୍ୟାକ୍ସିନର ତୃତୀୟ ଡୋଜ ଦେବା ଉପରେ ଗୁରୁତ୍ୱାରୋପ କରାଯାଇଛି ।
ଦେଶର ପ୍ରାୟ ସମସ୍ତ ରାଜ୍ୟ କରୋନା ସଂକ୍ରମଣକୁ ନେଇ ସତର୍କ ହୋଇଯାଇଥିବା ବେଳେ ଉତ୍ତର ପ୍ରଦେଶ, କର୍ନାଟକ ଓ ମୁମ୍ବାଇରେ ମାସ୍କ ପିନ୍ଧିବା ବାଧ୍ୟତାମୂଳକ କରାଯାଇଛି । ସେହିପରି ଦିଲ୍ଲୀ ଏମ୍ସରେ ବି ଆଡଭାଇଜରି ଜାରି କରାଯାଇ ଏମ୍ସ ପରିସରରେ ମାସ୍କ ପିନ୍ଧିବା ବାଧ୍ୟତାମୂଳକ କରାଯିବା ସହ ୫ରୁ ଅଧିକ ଲୋକ ଏକାଠି ନ ହେବାକୁ କୁହାଯାଇଛି ।
